Tatanigaina 4 - Ia Foforuna Naiungene

Keni Ghe Ebolo

¹ Ianimu tuna ghe neke epu taremehana nga Adamu ia ghaseborona neke pote ghu manei va dolinina Keni. Ia fotati neke kahe ghua iahi, “Ka ia nona toka Iahova nato kuruau ghu kaike tuugumane ara.”

² Leghunana manei neke va urahini kaike tuunamane, Ebolo neke ghua ghini ghu babaolonana. Ebolo mu neke kaike mane ta kopui sipisipi, nga Keni mu neke kaike mane ponogara.

³ Kaike fafata Keni neke hio lao togoroi ghano ka Iahova ka ira haharui manei.

⁴ Ianimu tuna ghe neke hio laori nga Ebolo ka Iahova kehara ka ira vilahidi ira rekahadi sipisipi ta busi veveha dike kusu doliro taghe mala togoro. Iahova neke puina veha vanani ka Ebolo neke hio tana ghu ia nona togoro,

⁵ nga manei neke sokei Keni nia ia togoro ka manei. Keni neke toraina hali fuludu neke muko ghu ira hihilina.

⁶ Ianimu tuna ghe neke kahe ghua nga iahi Iahova ka Keni, “?Ne heve ghe no haligho nga agho? ?Ne heve ghe no va mukori nga hihiliu nira?

⁷ Noto riva ghini la agho ia leghutau ta lotoro ara a veha vanagu, nga noto rivai muko la agho o balau, sasake ne koporo ghinigho ka makatanana agho. Manei ne hagala ghini mala hioighona agho, ghe agho o toraina paufi.”

⁸ Kaike fafata Keni neke kahe ghua iahi ka Ebolo ia tahinamane, “Aria da kave age ghu ka ira galahedi kava sare.” Ka ia la dufu ta la au ghu ka galahedi kava nunuma ari, Keni neke fihiki magarina Ebolo ia tahinamane neke atungi ghu.

⁹ Ianimu tuna ghe neke kahe ghua nga iahi Iahova, “Hae mu ia tahiumane Ebolo?” “E deo ga avohi ghu,” neke ghua ungene tughuna manei. “?Ara mu ta mala kopu ghinina tahigumane ani?”

¹⁰ Ghe Iahova neke kahe ghua iahi, “?Ne heve ghe noto riva ghini nga agho leghutau ta mumukoana iahi? !Fini! Ia busakana ia tahiumane ne nakele meha ka ara ka kavana mala va kilasighona agho.

¹¹ Ghatunaina mu agho o au ka pekana tibiri, e deo ghu boka numaina agho ia kava neto ke suli va noghaio ia busakana ia tahiumane noke atungio agho.

¹² Noto va sisiva numa ghini la agho ia kava, manei e deo heve ta boka age vananighona. Agho o age deoigho malau, o ghahe liloho lao meha ghu ma ka malau iahi peka.”

¹³ Keni neke kahe ghua iahi ka Iahova, “Va kilasa iahi ka ara, ne toraina faa fuludu laoi ia ta boka hurei ara.

¹⁴ Agho noto bozo kaveau ara ka ia kava nia ka ia ta au agho e ghua. Ara mu a age ghahe lao meha a ghua ma deo malauguna ka malau iahi peka nia hei ta dufuauna ara mu e age atunguau, e ghua.”

¹⁵ Ghe Iahova neke ungene tughui, “Deo. Hei neto atungigho la agho, leleghonana mu vitu noni ta atungurira holaranana ianimu.” Nakai ghini va ghilaghila tuna Keni neke ghua Iahova mala deona gedi atungi ghu hei noni neke dufuina manei.

¹⁶ Keni neke kave kaini ghu ka ia ta au Iahova neke la au ghu ka ia malau ta va kudo ghini Nodi, visi fateona mo Ideni.

¹⁷ Keni neke epu taremehana ia ghaseborona neke pote ghu va dolinina kaike tuunamane babaolonana Inoke. Ianimu tuna ghe neke riva ghini nga kaike malau leghaha Keni, neke va baolo leghui ghu Inoke ia tuunamane taghona.

¹⁸ Inoke mu neke au kaike tuunamane babaolonana Iradi. Iradi mu neke nona mamana Mehuzaele, nia Mehuzaele mu neke nona mamana Metusaele, nia Metusaele mu neke nona mamana Lameki e ghua.

¹⁹ Lameki mu neke varihio ka palu fotati. Babaolodira mu Ada ghe Zila.

²⁰ Ada neke va urahina mu Zabala, ia faadi ira dike auro ka suga tapole nia dike pausu bulumakau, gouti nia sipisipi dike ghuaro.

²¹ Tahina manena manei mu Zubala babaolonana. Manei mu neke nodi mamana heiri haroharo ta hilavi ia leghutau ta kuru vulohona nia ia mala ufu'ufu, e ghua.

²² Zila neke va urahi haro ma kaike tuunamane babaolonana Tubala Keni, ia neke keta barasi nia aeana neke ghuao riva ghidira leghu kokolodi tulu nga. Nama mu neke tahina fotati Tubala Keni.

²³ Kaike fafata Lameki neke kahe ghua iahi ka ira palu ghaseborona, “Ada ghe Zila, o nonomoho meha ka ara, ghau palu ghaseborogu, o nonomoho ka heve na kaheina ara. Ara nato ke atungi kaike mane, vununa neke ruzau. Uve, kaike mane foforu neke ruzau.

²⁴ Neto vitu noni la ta toraina mala lemena ka ia atungi Keni atunguauna ara mu e vitu ngavuluai-vitu noni ta mala lemena.”

Seti Ghe Enosi

²⁵ Adamu neke epu taremehanani ia ghaseborona, neke va urahi ghu manei kaike tuudi maneni. Neke kahe ghua ghu iahi manei, “God neto ke vanagu kaike tuugumane mala holarina Ebolo neke atungio Keni.” Seti neke ghua ghini ghu manei baolina.

²⁶ Seti neke au molamo kaike tuunamane, Enosi neke ghua ghini ghu manei baolina. Ka fafata ianimu ghe dike tatanigai verevere lao nga maneri ka ia babaolo Iahova ia babaolona God.