Tatanigaina 35 - Ia Foforuna Naiungene

Zekopu Neke Leghu Betolo

¹ Ianimu tuna ghe neke kahe ghua nga iahi God ka Zekopu, “O lao Betolo o la au hinae ghu aianimu. La riva ghini aianimu kaike sopebeana vanagu ara ia God neke podolo ghinighono ka ia fafata pelo kaini agho ia tahiumane Iso.”

² Neke kahe ghua ghu iahi Zekopu ka ia fototatamana taghona nia ka heiri haroharo dike au taremehanaro e ghua, “O nai kairi ira god nguzunguzu ta kuru ghau noke hio mehariro nia va mamalahu ghau taghomu nia va vona poko ta ghighiho e ghua, mala taghe kaike va ghilaghilana noto va mamalahu ghau taghomu mala va totoana ghinina God ta ghuana.

³ Ghita da vona age ghatunaina ani Betolo ka ta age riva ghinio ara kaike sopebeana vananina God ia neke ungene tughuriro ira nogu verevere ka ia fafata nake auno ara ka mamarutana, nia ia ta ghahe leleghuau tudu hae ghe hae ta laona ara, e ghua.”

⁴ Maneri dike vanani ghu Zekopu ira leghu nguzunguzu god nga dike kururiro maneri nia ira teteke dike va vonariro e ghua, neke zoe tamunu ghidi ghu Zekopu ka pekana ia heke oko ani Sekemu.

⁵ Maneri dike ghahe, ghe deo hei neke bozo leghu laorira leghudi mo, vununa God neke va mamaghuri ira noni ka rekanana malau ianimu.

⁶ Zekopu taremehadi ira leghu noni nga ka manei dike la sabara ani Luzi, ia ta va kudo ghini Betolo ghatunaina ka ia kavana Kenani.

⁷ Manei neke riva ghini kaike sopebeana aianimu, neke va kudo ghini Ele-Betolo ghu malau ani, vununa God neke podolo ghini manei aianimu ka ia fafata pelo kaini manei Iso ia tahinamane.

⁸ Debora ia ghaseriva ka Rebeka neke leme ghena dike gilu ghini ghu ka pekana ia heke oko pelopekana mo Betolo. Aloni Bakuti dike ghua ghini ghu baolina heke ani.

⁹ Ka ia ke leghu mehana Zekopu sipana ani Padani Aramu, God neke podolo ghini leghuni manei neke vanani ghu ia va veha.

¹⁰ God neke kahe ghua iahi ka manei, “Babaolouna agho mu Zekopu, ghe ghatunaina vai vona ghu, babaolouna agho mu Isiraeli.” Isiraeli neke ghua ghini ghu God baolina manei.

¹¹ Nia God neke kahe ghua iahi ka manei, “Ara mu God Torai Mana. O nai va tehi rekaha o hugara ghu. Ira butubutu noni edi age pagusu meha ka agho, nia agho o age faadi ira mane ginitaukela, e ghua.

¹² Ara a age vananigho haro agho ia kava nake vanadio ara Ebarahamu ghe Aesake, nia ara a age vanadi haro molamo heiri ira ta pagusu meha ka leghuu agho, e ghua.”

¹³ Ka ia leghuna turi taremehanana Zekopu aianimu, God neke ghahe kaini manei.

¹⁴ Zekopu neke va nohe tetu vonai kaike ghahipa merumeru va tetetu aianimu ka neke turino God taremehana manei. Ianimu tuna ghe neke va oranga ghini lao waeni nia oelena olivi nga mala nai va maduanaina vananina God.

¹⁵ Betolo neke ghua ghini ghu Zekopu baolina malau ianimu.

Ira Leme Ka Reseli Ghe Aesake

¹⁶ Ianimu tuna ghe dike ghahe kaini nga maneri Betolo. E deo ngama gedi dufu ghu Efarati to karata mala va dodoli ghu Reseli, ghe neke puina mamarutana vanani fuludu.

¹⁷ Ka ia neke puina vavahagalao manei ka ia karatana rekaha, ia fotati ta mala va doli rekaha neke kahe ghua iahi ka manei, “Oka maugheu ghu Reseli, kaike tuumaneni agho koini,” neke ghua ghini.

¹⁸ Ghe Reseli neke to namo leme, neke vanani ghu babaolo Beni-Oni ia tuunamane ghe neke hingokai va nonoghana nga manei. Ghe nona mama neke vanani babaolo Benizemeni mo.

¹⁹ Ka ia lemena Reseli maneri dike gilu ghini ka ia gheremena hangana ta lao Efarati, ta va kudo ghini Betilehemu ghatunaina.

²⁰ Zekopu neke nai vonai kaike ghahipa va tetetu aianimu mala va ghilaghilanana ia lianga bekuna Reseli. Ghahipa ianimu e au ngama aianimu ka ravata iahi.

²¹ Zekopu neke rizu ghaheni neke la riva ghini ghu kaike malau tei ka manei ka ia keha pelona ia malau dike va kudo ghini Migidala Eda no maneri.

²² Ka ia auna Zekopu ka kava ianimu, Rubeni neke haghele la epu taremehana Biliha, kaikeu ka ira ghaseboro irogha nona mama, neke nomohi ghu Zekopu. Zekopu mu neke kurui tazoi palu tuunamane:

²³ Tuunamanera Lea mu: Rubeni (doli kenuna ka Zekopu), Simoni, Livae, Zuda, Isaka nia Zebulani.

²⁴ Tuunamanera Reseli mu: Zosepu ghe Benizemeni.

²⁵ Tuunamanera Biliha ia fotati mala varituhu ka Reseli mu: Dani ghe Nafutalae.

²⁶ Tuunamanera Zilipa ia fotati mala varituhu ka Lea mu: Gadi ghe Asa. Irahi lamu tuunamanera Zekopu dike dolira ani Padani Aramu.

²⁷ Zekopu neke lao ka Aesake ia nona mama taghonai ani Mamare gheremena Kiriataba ia ta va kudo ghini Heboroni ghatunaina ka dike auro Ebarahamu ghe Aesake.

²⁸ Aesake mu neke doli dufui 180 komuhuna.

²⁹ Manei neke leme ka ia toraina ta mamanekusu ghena, dike gilu ghini ghu Iso ghe Zekopu ira palu tuunamane.