Tatanigaina 30 - Ia Foforuna Naiungene

¹ Ne finini ghu Reseli neke deona taghona ge nai vanani rekaha ghu Zekopu, manei neke age kakabai ghini ia tahina ghase. Neke kahe ghua ghu iahi manei ka Zekopu, “!Vanagu rekaha, to deo la to veha ma ta leme gheguna!”

² Zekopu neke age hali ka Reseli neke kahe ghua ghu iahi, “Taghe God e deo boka ghua ghinaguna ara agho. Manei mo ne va nodoighona agho ta nai rekahana.”

³ Kahe ghua tuna iahi neke ghua Reseli, “O hioi ghaseriva iahi ka ara Biliha, o epu taremehana ghu e mala nai rekaha ghu manei vanaguna ara. Ka ghaghahena iahi, a boka meha kuruau mo kaike fototatamana ara ka manei.”

⁴ Manei neke vanani lao ghu Biliha mala taghe kaike keranauna Zekopu, neke epu taremehana ghu manei.

⁵ Biliha neke age pote neke va uraha vanani ghu Zekopu kaike tuunamane.

⁶ Kahe ghua tuna iahi neke ghua Reseli, “God ne finini ia mamarutana ta au ka ara ne va podolo kavei ghu ta lotorona ara. Manei neto ungene tughui ia verevere ka ara neto vanagu ghu kaike tuugumane.” Dani neke ghua ghini ghu manei baolina.

⁷ Biliha neke pote leghuni neke va uraha vanani ghu Zekopu kaike va paluna tuunamaneni.

⁸ Kahe ghua tuna iahi neke ghua manei, “Ara nake magara va gigima taremehana ia tahigu ghase, ghe ara nato paufi.” Nafutalae neke ghua ghini ghu manei baolina.

⁹ Ne finini ghu Lea neke to nodona taghona nai rekahana, manei neke hioi Zilipa ia ghaseriva ka taghona neke vanani lao ghu Zekopu mala taghe kaike ghaseborona ta ghua ghinina.

¹⁰ Va uraha vanani tuna Zekopu kaike tuunamane neke ghua Zilipa.

¹¹ “!Ka boka ghegu fuludura ara!” neke ghua Lea. Gadi neke ghua ghini ghu manei baolina.

¹² Zilipa ia ghaseriva ka Lea neke va uraha vanani Zekopu kaike va paluna tuunamaneni.

¹³ Ianimu tuna ghe neke kahe ghua nga iahi Lea, “!Ka va ghaseghase ghegura! Ira fotati edi age va kudo ghinagu va ghaseghase.” Asa neke ghua ghini ghu manei baolina.

¹⁴ Ka ia fafata mala haharui witi, Rubeni neke kave lao ka ira galahedi kava sare neke la finiri ghu kodolodira keha manadereki, nia hio laori tuna ka Lea ia nona uke neke ghua. Fanga lao tuna ka Lea neke ghua Reseli, “Vanagu ko kehara ka manadereki nira tuumane nia,” neke ghua ghini.

¹⁵ Ghe Lea neke ungene tughui, “?E deo ngama ge hovigho ghu agho mu noke hio taguo nga keraguau? Ghatunaina tuna goke va sisiva hio tana ghu manadereki idi ka tuugumane ini ta ghua nia.” “Puina veha,” ne ghua Reseli, “Zekopu e boka epu taremehau mo agho ghatu redu mala holaradira manadereki nira ka tuumane nia,” neke ghua ghini.

¹⁶ Ne la sura meha ghu Zekopu sipana ka ira galahedi kava sare saighona ianimu, Lea neke kave la dufui manei neke la kahe ghua ghu iahi, “Agho mu o toraina age epu taremehagu ara ghatu redu, vununa ara nato ke tabarigho ka ira nona manadereki ia tuugumane ara,” neke ghua ghini. La epu taremehana tuna Lea redu ianimu neke ghua Zekopu.

¹⁷ God neke nomohi ia verevere ka Lea neke meha pote ghu manei va uraha vananina Zekopu kaike va gahana tuunamane.

¹⁸ Lea neke kahe ghua iahi, “God neto vanagu ia tabaragu vununa ara nake vanani keraguau ia ghaseriva ka ara.” Isaka neke ghua ghini ghu manei baolina.

¹⁹ Lea neke age poteni neke va uraha vanani ghu Zekopu ia va onomona tuunamane.

²⁰ Zebulani neke ghua ghini ghu manei baolina, vununa manei neke kahe ghua iahi, “God neto vanagu kaike tabara ta veha. Ghatunaina ia keraguau e va vonavonau tuna ara vununa ara nato vanani onomo rekaha.” Zebulani neke ghua ghini ghu manei baolina.

²¹ Leghunana, manei neke va urahi kaike tuunaghase, Daina neke ghua ghini ghu baolina.

²² Ke nganai tuna Reseli neke ghua God, neke nomohi ghu ia verevere ka Reseli nia age boka kurui rekaha tuna manei, neke ghua.

²³ Manei neke age pote neke va urahi ghu kaike tuunamane. “God neto age hio kaini ia haghava ka ara,” neke ghua manei.

²⁴ Zosepu, neke ghua ghini ghu manei baolina, nia kahe ghua tuna iahi neke ghua, “Ara na verevere ghini ta vanaguna Iahova kaike tuugu maneni.”

Ia Bokaboka Ka Zekopu Ne Faa Laoni

²⁵ Leghuna ia urahana Zosepu, Zekopu neke kahe ghua iahi ka Labani, “O va malumuau a boka ke leghu lao ghu ara ka ia malaugu.

²⁶ O vanagu ira ghaseborogu nia ira nogu rekaha nake hioriro ara ka ia riva vananigho ato ghahe ghu ara. Agho no avohi mo taghe heve nake ghua ara riva ngazuluai vananighona.”

²⁷ Ghe Labani neke kahe ghua iahi ka manei, “Noto veha vananigho la ka ara, o au taremehagu. Ara nato hadu kavei ka ira ghila ta va vehauna Iahova, vununa ka ira heve tato riva ghidi agho vanaguna ara.

²⁸ O va kahe ghinagu niha ghu ta mala tabarighona ara, a tabarari ghu.”

²⁹ Zekopu neke ungene tughui, “Agho no avohi mo taghe heve nake ghua ara riva vananighona, nia taghe heve dike ghua age tehidira ira tagukava popohi ka agho ka pekana ia kopu ara.

³⁰ Ia birusuna neke kuruighono agho, ghe nake mehano nga ara, to age kodolo va faa fuludu, nia Iahova neto va vehaigho agho ka ira vahina leghutau nato ke riva ghidiro nga ara. Nga ghatunaina mu to fafata ka ara mala tatanigai va ghono vanadi keha leghutau ira rekaha ka taghogu.”

³¹ ?Heve ta age vananighona ara? neke ghua notohona Labani. “Oka vanagu ghu kaike leghutau ghu,” neke ghua Zekopu. “Ara a riva vananigho ma a lao ghu kopu vananighona nou hoghara sipisipi nira noto veha vananigho la ka ngangana iahi.

³² O va malumuau ravata iahi ta fini va huhugunarira ara vahina nou hoghara sipisipi nga nia gouti nga e ghua, a hio kaveri ghu ara leghu rekahadi sipisipi ta sisibe nga nia leghu rekahadi gouti ta doodoo ghiho nga, e ghua. O vanagu agho irahi taghe tabaraguna ara.

³³ Keha nareo e nanamo ma hadu kaveina agho nato ke sesebo la ara. Ka ia meha fifini agho ka ira tabaragu ara, noto finiri la ira gouti ta deo gedi doodoo ghiho ghu, ba ira sipisipi taka sisibe ghu, agho o age avohi nato sikori ara ka agho, ta ghuana.”

³⁴ “Ne veha mo, ghai age riva ghini mo taghe ta kaheinia agho,” neke ghua ungene tughuna Labani.

³⁵ Ghe ka ravata ianimu, Labani neke va rizu kaveri ira gouti manedi ta solasola ghiho, ba doodoo ghiho, nia ira leghu ghasedi gouti taka suri sisibe ghu, ba, ta doodoo, ba ta solasola ghiho, nia neke va rizuri haro molamo ira sipisipi ta sisibe, e ghua. Ianimu tuna ghe neke nai vanadi nga ira tuunamane mala kopuna ghidira.

³⁶ Ka ia kopu ghidi ta au ghu Zekopu ira leghu hoghara tagukava nga ka Labani, manei nia ira tuunamane e ghua dike hiori ira keha hoghara tagukava dike lao ghu varihauni ka kaike ghaghahe ta hio lito ravata sipadina ka neke auno Zekopu.

³⁷ Ianimu tuna ghe neke hio hobodi heke ta dodoli nga Zekopu ka ira heke ta va kudo ghidi popola, alamoni nia peleni e ghua, neke kulasa kaveri ghu keha pelodi kafudi mala va solasola ghihorira hobodi ari.

³⁸ Manei neke nakairi hobodi heke irahi ka kenudi ira hoghara tagukava ka ira nodi leghutau mala ketuhu. Neke nakairi nga manei aianimu ghu mu, vununa aianimu dike vari paukura ira hoghara tagukava ka ia meha ketuhudi.

³⁹ Ka ia pauku ira gouti ka kenudi ira hobodi heke, ghe gedi va doliri ira rekahadi ta solasola ghiho nia doodoo ghiho, e ghua.

⁴⁰ Zekopu neke sopai nakairi ira sipisipi nia gouti, ghe neke va tala laori nga ka ira sipisipi nia gouti ta sola nia sisibe Labani. Ka ghaghahena iahi neke age va faaina manei ira nona hoghara sipisipi nia gouti, neke sute nenemari ghu ka ira tau Labani.

⁴¹ Ka ia kekehadi ira sipisipi nia gouti ta doli veha, Zekopu neke nakairi ira hobodi heke ka giliodi ira leghutau mala ketuhu ka kenudi maneri, mala maneri edi vari pauku ghu ka kenudi hobodi heke ari.

⁴² Ghe manei e deo geke nakairi ghu ira hobodi heke ka kenudi ira popohi ta paeke. Ira sare sipisipi nia gouti ta paeke nga mu neke taghori ghu Labani nia Zekopu geke taghori ghu ira leghu ta gigima nga neke ghua.

⁴³ Ka ghaghahena iahi neke toraina meha taghotaghona Zekopu. Manei neke taghori tehi sipisipi nia gouti, kamele nia dongiki, fotati nia mane mala varituhu, e ghua.