Tatanigaina 2 - Ia Foforuna Naiungene

¹ God neke to va hokoti ghu va vuhaina ia kolanga nia malau iahi peka nia ira vahina leghutau nga ka ira giliodi.

² Ka ia va vituna ravata mu God neke maghoso, vununa ira leghu riva neke riva ghidi neke mehao ghu manei neke to va hokotori ka ia va onomona ravata.

³ God neke va vehai ghu ia va vituna ravata nia kahe kavei tuna ta maduanana ravata ianimu neke ghua, vununa ka ravata iahi neke maghosona manei ka leghuna ia kamotona riva va vuvuha neke to riva ghini va hokotono manei.

Ia Nunumana Ideni

⁴ Iahi mu ia tuturina ia vuhana ia kolanga nia malau iahi peka. Ka ia fafata va vuhai God Iahova malau iahi peka nia ia kolanga,

⁵ e deo kaike leghutau neke kodolona ka ia kava, vununa God Iahova neke deo geke va meha nanare ghu ka malau iahi peka, nia neke deo hei ta mala rivana ka ia kava, e ghua.

⁶ Nga ketuhu mo neke la futu kave mehana gilio ka ia kava neke va boesina ghu ia kamotona fatena kava.

⁷ Ianimu tuna ghe neke hio forokuna kava nga God Iahova neke riva ghini ghu ia mane. Manei neke hingo kunu laoi ia mamaafana doli ka ia nehuna, neke meha noni dolina ghu manei.

⁸ Ianimu tuna ghe neke numa ghini nga kaike nunuma God Iahova ani fateo mo giliona Ideni, neke nakaini ghu aianimu ia mane neke riva ghinio.

⁹ God Iahova neke va kodolori ira leghu kokolodi heke ta veveha nga fini laorira nia ta veha mahairira ira fuadi, e ghua. Gilio ka hoatana nunuma ani, manei neke nakaini ia hekena doli nia ia hekena avoavohona ia veha nia muko.

¹⁰ Kaike ketuhu leghaha neke ologho sipana Ideni mala va boesina ia nunuma, ghe ge la fota nga ka rodana ketuhu leghaha peghuruna Ideni.

¹¹ Babaolonana ia va kenuna hobona ketuhu leghaha mu, Pisoni. Manei e ologho lilohi ia kamotona kavana Havila ka ia ta kuru goluna.

¹² Nia ia goluna kava ianimu ghu mu e veha. Sedi ta dedeoai ta va kudo ghini deliumu nia ghahipa ta va kudo ghini onikisi e ghua, edi au molamo ka kava ianimu.

¹³ Babaolonana ia va paluna ketuhu leghaha mu Gihoni. Manei e ologho lilohi ia kamotona kavana Kusi.

¹⁴ Babaolonana ia va litona ketuhu leghaha mu Taegirisi. Manei e ologho leghui ia keha pelona visi fateona mo Asa. Nia ia va rodanana ketuhu leghaha tuna mu e va kudo ghini Iufereti, e ghua.

¹⁵ Iahova ia God neke nakaini ia mane ka ia Nunumana Ideni mala riva ghinina nia mala kopu ghinina.

¹⁶ Iahova ia God neke ungene va gigimai ia mane, “Agho o boka mahai fuadi mo ira leghu heke nga ka giliona ia nunuma,

¹⁷ nga agho oka puina mahaini ghu ia fuana ia hekena avoavohona veha nia muko. Vununa noto mahaini la agho ia fuana, agho o toraina age leme.”

¹⁸ Ianimu tuna ghe neke kahe ghua nga iahi Iahova ia God, “E deo ge veha ghu ka ia mane ta au kakaikena. Ara a riva vanani manei kaike mala va nunumai ta fata mala toka ghinina manei.”

¹⁹ Iahova ia God neke hiori ghu keha kava neke riva ghidi ghu ira leghu tagukava nga nia ira leghu memeha nga ka kolangana. Manei neke hio vanani lao ia mane e mala vanadi ghu heve babaolo ta mala sopai va kudo ghidira. Heve babaolo neke sopai vanadira manei lamu babaolo neke sopai va kudo ghidira ghu manei.

²⁰ Ia mane neke vanadi babaolo ghu ira leghu kokolodi bulumakau nga, ira memeha nga ka kolangana nia ira leghu tagukava mauke nga, e ghua. Ghe e deo kaikeu ka irahi ta fata mala va nunumaina ta toka ghinina ghu ia manei.

²¹ Va epu melukaini tuna ia mane neke ghua Iahova ia God neke hio kavei ghu kaike raragana, nia ke va kaputu ghini leghu vilahi tuna ia neke tobehio, neke ghua.

²² Ianimu tuna ghe neke tokeli nga riva ghinina kaike fotati Iahova ia God ka ia raraga neke to hio kaveio ka tinina ia mane, neke hio vanani lao ghu ia mane.

²³ Kahe ghua tuna iahi neke ghua ia mane, “Iahi tuna mu huma ka ira humagu nia vilahi ka ia vilahigu, ‘fotati’ e age ghua ghini ghu, vununa manei neke hio kavei ka mane.”

²⁴ Ne ghua mamu ia mane ghe ne ghahe kairi nga nona mama ghe nona uke ne parekete taremehana ghu ia ghaseborona, di meha kaike tini ghu maneri palu.

²⁵ Ia mane nia ia ghaseborona dike sosole haro, ghe deo ma gedi ke haghava ghedi ghu.