Tatanigaina 18 - Ia Foforuna Naiungene

God Ne Naiungene Mala Vananina Ebarahamu Kaike Tuunamane

¹ Iahova neke podolo ka Ebarahamu ka ira heke fifiluanadi ta nona Mamare ka ia fafata nohe ka ia makatanana ia nona suga tapole ka ia toraina dangavana fafata ka ia ravata.

² Ebarahamu neke mato vai lao ka ia hangana neke finiri ghu lito mane tetu namo mehadira aianimu. Ka ia fini laori, manei neke magali purudu la dufuri, la maimanihi hinae dufu laona ka kavao.

³ Ebarahamu neke kahe ghua iahi ka kaikeu ka maneri litou, “Faghina agho, neto veha la mo ka agho, oka ghahe fuludi ghu sugagu ini,” neke ghua lao.

⁴ “A la va kahe ghidina ara kehara e la hio vanamu meha ghu keha kolo mala tihirina tabalamu nira, nia o boka maghoso mo ka pekana heke iahi, e ghua.

⁵ Va malumuau ta va tana vanamuna keha ghano o mala hio gigima ghu ghau, ghe goke ghahe laoni nga. Nia vununa ghau no va vonavonau ka ia meha ghau ka sugagu ini, va malumuau ta va fafara vanamu ghano mala mahaina o hio gima ghu ka ghahe nia ghau.” “Veha mo, riva ghini ba agho ta kahei nia,” dike ghua ghini.

⁶ Magali ne ghua ma Ebarahamu, neke la kahe ghini ghu Sera ka suga tapolena. “O magali la hioi kaike baiki falao ta toraina veha, la riva ghidi ghu keha bereti.”

⁷ Ianimu tuna ghe neke purudu lao nga manei ka ira nona hoghara bulumakau, neke la faeti ghu kaike rekahana ta busi veveha, neke vanani lao ghu kaike nona maneriva neke magali la va tanai ghu.

⁸ Ianimu tuna ghe neke hiori nga manei keha miloki ta tuke, keha miloki kakato, nia ia vilahina bulumakau ta momora e ghua, neke va fafara vanadi ghu kenudi mo. Ka ia fafata mahai maneri, manei neke tetu afa ghidi gheremedi mo ka pekana kaike heke.

⁹ “?Hae mu Sera ia ghaseborou agho,” dike ghua notohina. “Manei aianihi ka suga tapolena,” neke ghua Ebarahamu.

¹⁰ Kaikeu ka maneri neke kahe ghua iahi, “Ka fafata haro iahi la ka keha komuhu nia, ara ake la leghu meha, nia Sera ghaseborou nia agho, geto age kurui ghu kaike tuunamane, e ghua.” Sera mu neke au leghuna mo manei ka makatanana suga tapole ani, neke nonomoho lao ghu.

¹¹ Ebarahamu ghe Sera mu dike to puina mamanekusu nia ghaghasekusu neke to fuludi ghu ia komuhu mala nai rekaha mu Sera.

¹² Sera neke paghoi ghu taghonai kahe ghuana iahi ka ia nganganana, “?Ghatunaina mu ara to ghaghasekusu nia paeke, ghe a bokai nga ara baini mu ia va ghazaghazana kuru rekaha? Nia kehanani e ghua mu, keraguau ini geto mamanekusu haro ghu, ta ghua ini.”

¹³ Kahe ghua tuna iahi ka Ebarahamu neke ghua Iahova, “?Ne heve ghe neke pagho nga Sera kahe ghuana iahi? ‘A boka toraina age kuruau rekaha mo ara ghatu ka tato ghaghasekusu ini ara ghatunaina?’ neke ghua nga.

¹⁴ Ara mu Iahova. E deo heve leghutau ta marutana vanaguna ara. Ka fafata haro iahi la ka keha komuhu nia, ara ake la leghu meha, nia Sera geto age kurui ghu kaike tuunamane, e ghua.”

¹⁵ Sera neke maughena neke sesebo ghu kahe ghuana iahi, “Ara deo gake pagho ghu.” Ghe Iahova neke kahe ghua iahi, “Uve, agho noke pagho mamu.”

Ebarahamu Neke Verevere Fanga Malana Sodomu

¹⁶ Ianimu tuna ghe dike ghahe kaini nga ia malau tei ka Ebarahamu ira lito mane dike lao ghu ka kaike fatena voruhu, ka dike boka la mato hinae laono Sodomu. Ebarahamu neke leghu laori mo ghu la va ghaherina.

¹⁷ Iahova neke ngangana ghua iahi, “Ara e deo ga age va poika ghini ghu Ebarahamu heve ta mala age riva ghinina ara.

¹⁸ Ira pagusu ka Ebarahamu edi age toraina kaike leghahai butubutu noni ta mana. Ira leghu noni nga ka malau iahi peka edi age hioi ia va veha, ta ghasolo kadolo meha ka manei.

¹⁹ Vununa ara nato faete kavei manei, e mala batu ghidi ghu ira nona rekaha nia ira pagusu ka manei mala nomohoauna ara nia mala riva ghinina heve ia ta lotoro nia totonu. Dito riva ghini la ianimu maneri, ara a age riva vanani vahina leghutau nake naiungene ghidiro nga ara.”

²⁰ Ianimu tuna ghe neke kahe ghua nga iahi Iahova, “Ara na nomohori ira noni ngenengene ghidi fuludura ira noni ani Sodomu nia Gomora. Ira noni ka malau leghaha iranimu di toraina rivai sasake ta muko fuludu.

²¹ Ara a toraina hinae lao a la hadu kavei ghu dito hohoghodi la ta toraina muko dudumanana ta riva ghidi ari maneri, taghe tato nomohini ara. To deo la, ara na kabai avohi.”

²² Ira palu mane dike fihiki ghahe lao visi Sodomu mo, nga Ebarahamu mu neke tetu ma neke au ghu ka kenuna Iahova.

²³ Ebarahamu neke zukuru lao ka Iahova neke notoho ghu, “?Heve, agho o toraina la takusu kairi haro ira ta lotoro nia ira ta muko, e ghua?

²⁴ ?Heve mu dito au la 50 noni ta lotoro ka malau leghaha ani? E deo go age hio va dolini ghu agho malau leghaha ani ka ia ghidi ira 50 noni ta lotoro ta au ari gilio?

²⁵ Ka ia va hohoghona ara, agho e deo go age atunguri ghu ira ta lotoro ghedi taremehadira ira ta muko. E toraina marutana fuludu mu ianimu. Agho e deo go boka riva ghini ghu ianimu. Noto ghua la agho, ira ta lotoro edi age kilasa taremehadi ira ta muko. Agho ia ta fatei malau kamoto iahi peka mu o toraina riva ghini ia totonuna.”

²⁶ Iahova neke ungene tughui, “Nato finiri la ara 50 noni ta lotoro ghedi ani Sodomu, ara a age hio va dolini ia kamotona malau leghaha vununa ka ia ghidi maneri.”

²⁷ Ebarahamu neke ngengene vonani, “Iahova va malumuau ko take ngengene agenani ara ghinina iahi. Ara mu noni ma, e deo au mana ghu ta mala kaheina kaike leghutau ghu.

²⁸ Nga heve mu dito au la 45 noni ta lotoro ghedi, nga eka 50 ghu. ?Vununa ta deo ani ge 50 noni ghu ta aura mu, heve, agho e deo go age va mukoi ghu kamotona malau leghaha ani?” Iahova neke ungene tughui. “Ara e deo ga age va mukoi ghu malau leghaha ani nato finiri la 45 noni ta lotoro.”

²⁹ Ebarahamu neke ngengene kaike fafatani, “?Heve mu ge 40 la ta aura aianimu?” Iahova neke ungene tughui, “Ara e deo ga age va mukoi ghu neto 40 la ta aura.”

³⁰ Ebarahamu neke kahe ghua iahi, “Iahova oka hali ghu ko agho, ara a toraina ke ngengeneni. ?Heve mu ge 30 lama ta aura?” “Ara e deo ga age va mukoi ghu nato finiri la 30 ghu aianimu,” neke ghua Iahova.

³¹ Ebarahamu neke kahe ghua iahi, “Iahova, va malumu au ta ke ngengene agenani ara ka agho ghinina iahi. ?Heve mu ge 20 lama ta aura?” Iahova neke ungene tughu, “Ara e deo ga age va mukoi ghu malau leghaha ani maladira 20 ari.”

³² Ebarahamu neke kahe ghua iahi, “Iahova, oka hali ghu ko agho, ake ngengene ghu ara kaike fafatani ma. ?Heve mu ge 10 lama ta aura aianimu?” Manei neke kahe ghua iahi, “Ara e deo ga age va mukoi ghu maladira 10 ari.”

³³ Ka ia nogha Iahova ngengene taremehanana Ebarahamu, manei neke ghahe, nia Ebarahamu geke leghu lao ghu ka malaunao, neke ghua.