Tatanigaina 11 - Ia Foforuna Naiungene

Ia Suga Kokuna Babiloni

¹ Ka kaike fafata, ira noni ka malau kamoto iahi peka dike ngengene ma ka kaike ngengene mo.

² Ka ia rizu vai laodi visi fateo mo, maneri dike la dufui kaike sare leghaha ka ia kava ani Babilonia, dike la au hinae ghu aianimu.

³ Dike kahe ghua ghu iahi ka vari taghodighi, “Meha, aria da rivai biriki ghu ka kava palaki, da va gimari ghu ka totoi.” Maneri dike rivai biriki mala rivai sugana, nga eka ghahipa ghu, nia dike hio taa mu mala posi va gima birikina e ghua, nga eka simede ghu.

⁴ Ianimu tuna ghe dike kahe ghua nga iahi, “Meha, aria da riva ghini ghu kaike noda malau leghaha taremehana kaike suga koku ta toraina sula dufu lao ka kolangana fateni, da mala varanga babaoloda ghu. Iahi e age posi varighara ghini ghita e deo ghu age rirahadana ka ira leghu pelodi nga ka malau iahi peka.”

⁵ Ghe Iahova neke la hinae meha mala fininina ia malau leghaha, nia ia suga koku dike riva ghinio ira noni.

⁶ Iahova neke kahe ghua iahi, “Fini, noni irahi mu nonidi ma ka kaike malau mo, nia ngengene tuna ka kaike ngengene mo, di ghua. Suga koku iahi mu va kenuna riva ma ka maneri. Leghuna iahi mu e deo heve riva ta mala riva ghinina maneri ta age marutana vanadira.

⁷ Meha, aria da hinae age ghu, da age va zirini ghu ngengene ani ka maneri, mala heve ta kaheina kehana, e deo ghu ia keha ge va fafahaki ghu.”

⁸ Ka ghaghahena ianimu neke va riraharira ghu Iahova ka ira leghu pelodi nga ka malau iahi peka, dike nodo ghu riva ghinina ia malau leghaha.

⁹ Neke ghua mamu ghe neke va kudo ghini Babiloni nga ia malau leghaha, vununa aianimu lamu neke va zirinina Iahova ia ngengene ka ira leghu noni nga nia aianimu lamu neke va riraharira manei maneri haroharo ka ira leghu pelodi nga ka malau iahi peka.

Ira Pagusu Sipa Ka Semu Dufu Ghu Ka Ebaramu

¹⁰ Irahi mu ia tuturina ia pagusu ka Semu. Palu komuhu leghuna ia ologho, ka ia 100 komuhuna Semu, manei neke kurui kaike tuunamane babaolonana Afakasadi.

¹¹ Leghuna ianimu manei neke au laoni keha 500 komuhu neke kurui ghu keha tuuna manera nia tuuna ghasera.

¹² Ka ia 35 komuhuna Afakasadi, manei neke kurui kaike tuunamane babaolonana Sela.

¹³ Leghuna ianimu, manei neke au laoni keha 403 komuhu neke kurui ghu keha tuuna manera nia tuuna ghasera.

¹⁴ Ka ia 30 komuhuna Sela, manei neke kurui kaike tuunamane babaolonana Eba.

¹⁵ Leghuna ianimu manei neke au laoni keha 403 komuhu, neke kurui ghu keha tuuna manera nia tuuna ghasera.

¹⁶ Ka ia 34 komuhuna Eba, manei neke kurui kaike tuunamane babaolonana Pelegi.

¹⁷ Leghuna ianimu manei neke au laoni keha 430 komuhu neke kurui ghu keha tuuna manera nia tuuna ghasera.

¹⁸ Ka ia 30 komuhuna Pelegi, manei neke kurui kaike tuunamane babaolonana Reu.

¹⁹ Leghuna ianimu manei neke au laoni keha 209 komuhu, neke kurui ghu keha tuuna manera nia tuuna ghasera.

²⁰ Ka ia 32 komuhuna Reu, manei neke kurui kaike tuunamane babaolonana, Serugu.

²¹ Leghuna ianimu manei neke au laoni keha 207 komuhu, neke kurui ghu keha tuuna manera nia tuuna ghasera.

²² Ka ia 30 komuhuna Serugu, manei neke kurui kaike tuunamane babaolonana Nehoa.

²³ Leghuna ianimu manei neke au laoni keha 200 komuhu neke kurui ghu keha tuuna manera nia tuuna ghasera.

²⁴ Ka ia 29 komuhuna Nehoa, manei neke au kaike tuunamane babaolonana Tera.

²⁵ Leghuna ianimu manei neke au laoni keha 119 komuhu, neke kurui ghu keha tuuna manera nia tuuna ghasera.

²⁶ Ka leghuna neke to 70 komuhunao Tera, manei neke meha nodi mamana, Ebaramu, Nehoa nia Harani, e ghua.

²⁷ Iahi mu ia tuturina ira pagusu ka Tera. Tera mu neke meha nodi mamana Ebaramu, Nehoa nia Harani. Nia Harani geke meha nona mama ghu Loti, neke ghua.

²⁸ Ka fafata neke dolino nga Tera, neke leme ghu Harani ia tuunamane ka ia malau faana Uri aianihi Babilonia neke dolino manei.

²⁹ Ebaramu ghe Nehoa mu dike varihio haro. Sarai mu neke ghaseboronana Ebaramu nia Milika tuna mu neke ghaseboronana Nehoa neke ghua; manei mu neke tuunaghase Harani ia nodi mama Milika ghe Isika.

³⁰ Sarai mu neke sasahaka neke deoi rekaha ghu.

³¹ Tera neke hioi Ebaramu ia tuunamane nia Loti ia tuunamane Harani ia keha tuunamane taghonai Tera, nia Sarai ia nona vasagha, ia ghaseboro ka Ebaramu ia tuunamane taghonai e ghua, dike kave varighara ghu sipadina ka ia malau faana Uri ani Babilonia mala laona ka ia kava Kenani. Ghe ka ia la dufudi Harani, maneri dike to la au hinae ma aianimu.

³² Tera neke la leme aianimu ka ia age palu ghobi gaha komuhuna manei.