Ruti 4 - Ia Foforuna Naiungene

Boazi Ne Varihio Ka Ruti

¹ Ka fafata iahi Boazi neke lao ka ia makatanana babarana malau fafaana neke la nohe afa ghu ka ia malau mala haedu. Ka fafata ianimu, ia keha mane taremehana ta namo ka Elimeleki neke kaheio manei, neke ghahe fuludu molamo visi aianimu mo, neke kahe ghua ghu iahi Boazi, “O meha nohe hinae aiahi mo mane baere,” ne ghua ghini. Lao tuna ge la nohi hinae ghu, neke ghua.

² Boazi neke hiori tazo manefaa ka malau fafaana ani neke fangari ghu ta la nohe taremehadira. La nohe tuna dike ghua maneri.

³ Ianimu tuna ghe neke kahe ghua nga iahi Boazi ka ia mane taremehana ta namo ka Elimeleki fuludina taghonai, “Naomi tato la leghu meha sipana ini Moabu mu ne tatabara ghini ia birusuna kava neke tauno ka ia taremehada Elimeleki.

⁴ Ka nganganagu ini ara, geala a va nonomohigho ghini iahi, o mala tabari ghu agho ka kenudi ta nohe irahi nia ka kenudi ira nonifaadi ira noni ka ara, e ghua. Noto lao hihingou la, o boka tabari mo agho. Nga noto deo la go lao hihingou ghu, o va kahe ghinagu a mala age avohi ghu ara. Vununa e deo hei ta kuruina ia mana mala riva ghinina iahi, nga agho lama ta kenuna nia ara lama tuna kehana, e ghua ma. “Ara ta age tabarina,” ne ghua ia mane.

⁵ Kahe ghua tuna iahi neke ghua Boazi, “Ka ia ravata ta tabari agho ia kava ka Naomi nia ka Ruti ia tanina Moabu e ghua, agho no hioi molamo Ruti ia ghaseborona mane ta leme ani, mala au tuduna ia babaolona mane ta leme ani ka nona kava ani,” ne ghua ghini.

⁶ “Neto ghua la ianimu, ara e deo ga boka tabari ghu, vununa ara na maughegu ta age vanagu mamarutanana ghatu ka ia kava kaikadolo taghogu. Hioi taghou ia mana mala tabari ara, vununa ara e deo ga boka tabari ghu,” ne ghua ia mane.

⁷ (Ka ira tatanigaidi fafata ani Isiraeli, taghe mala va hokotina ia va kadolo kava mu, kaike noni e hio kaini ia nona sadolo e vanani lao ghu ia keha. Iahi lamu ghaghahena ta mala nai va manaina maneri ia va kadolona ia kava.)

⁸ Kahe ghua tuna iahi ka Boazi neke ghua ia mane, “Agho o tabari taghou,” ne ghua ghini, ghe neke va hinaeri nga ira sadolo ka taghona.

⁹ Kahe kavei tuna ka ira noni babatu nia ira noni haroharo neke ghua Boazi, “Ravata ini ghau lamu no torai fini hibamuna ghinina tato tabararira ara ka Naomi ira leghu kava nga ka Elimeleki, Kilioni nia Maloni, e ghua.

¹⁰ Ara nato hioi haro molamo Ruti ia tanina Moabu ia naboko ka Maloni taghe keraguauna, mala posini ta auna ghu ia babaolona ia mane ta leme taremehanana ia kava ka manei, mala ia babaolona manei eka age kakai la ghu ka ia butubutu manei ba ka ira kakangavadi ta au ka malau fafaana ani. !Ravata ini ghau lamu no toraina fini hibamuna!”

¹¹ Ianimu tuna ghe dike kahe ghua nga iahi ira nonifaa nia ira dike auro ka makatanana babarana malau ani, “Ghai lamu na toraina fini hibamaina. Nai vananiIahova mala taghe Reseli ghe Lea dike va hugara varighara ghinio Isirael e ghua ghini ghu fotati ta haghele age nia ka sugauna agho. Nai vananigho ta age veha puhiuna agho ani Efarata nia ta age varangana babaolou nia ani Betilehemu, e ghua.

¹² Ka ia pagusu ta vananigho Iahova ka ghase foforu iahi, nai vanani e mala taghe ia butubutu ka Perezi neke va dolinio Tama vananina Zuda, e age ghua ghu.”

Tuturina Ia Pagusu Ka Boazi

¹³ Hioi tuna Ruti ge meha keranau ghu neke ghua Boazi. Ianimu tuna ghe neke epu tana nga Ruti manei neke va beani ghu Iahova boka vuhana ia rekaha ka manei nia va dolini tuna kaike tuunamane neke ghua.

¹⁴ Ira fotati dike kahe ghua iahi ka Naomi: “!Helahela ghiniIahova! Manei neto vananigho ka ravata iahi kaike mane ia ta mala age kopu ghinigho. !Nai vanani e age varanga ghu ia babaolona manei ka ia giliona kamoto Isiraeli!

¹⁵ Manei e age va foforui ia doli ka agho nia e age hio suteigho ka ia age ghaghasekusu agho. Vununa ia nou vasagha ta namaha ghinigho nia ta veha ka agho e ghua, fuludu laorira vitu tatahina mane, neto va dolini manei.”

¹⁶ Hio ebeti tuna rekaha ani ge hio sutei ghu neke ghua Naomi.

¹⁷ Ira fotati ta au aianimu dike kahe ghua iahi, “Naomi neto aui kaike tuunamane,” di ghua. Obedi dike ghua ghini ghu babaolonana. Obedi mu neke nona mamana Zese, ia nona mama Deveti.

¹⁸ Iahi ghu mu ia pagusu ka Perezi: Perezi mu neke nona mamana Hezironi,

¹⁹ Hezironi mu neke nona mamana Ramu, Ramu mu neke nona mamana Aminadabu,

²⁰ Aminadabu mu neke nona mamana Nasoni, Nasoni mu neke nona mamana Salamoni,

²¹ Salamoni mu neke nona mamana Boazi, Boazi mu neke nona mamana Obedi,

²² Obedi mu neke nona mamana Zese, Nia Zese mu neke nona mamana Deveti.