Ruti 3 - Ia Foforuna Naiungene

Ruti E Mala Varihio Ka Boazi

¹ Kaike ravata Naomi neke kahe ghua iahi ka Ruti ia nona vasagha, “Tugu ghaseo, ara geala a toraina va sisiva hadu vananigho kaike mane mala age kerauauna agho e hio suteigho ghu.

² Agho mu noto riva taremehadi ira fotati noniriva ka Boazi. Boazi mu e taremehadi ghu ira keradau ghita dike leme ghediro. !Nomoho meha! Ghatu redu manei e kai kafudi ira bali ka ia galahena mala bota va lufuru hinae subuna bali.

³ O sesele nia va longara ghinigho sedi taghou nia va vonari tuna ira nou poko ta toraina veveha e ghua. Ianimu tuna ghe go hinae lao nga ka ia galahena mala bota va lufuru hinae subuna bali, ghe oka va avoavohi ghu ta auna aianimu agho, eto age nogha ghu manei mahaina nia ketuhuna, e ghua.

⁴ Ka ia epu hinae manei, va fafahaki agho hae mo ne epuna manei. Ianimu tuna ghe go la tafei nga totoufuna ghahenari go la epu hinae ghu aianimu. Manei e va kahe ghinigho mo ghatu heve geala ta mala riva ghinina agho.”

⁵ “Veha mo, ara a age riva ghini mo heve tei ta kaheina agho,” ne ghua Ruti.

⁶ Hinae lao tuna ka ia galahena mala bota va lufuru hinae subuna bali, geke la riva ghidi ghu ira leghu neke va kahe ghiniro nga nona vasagha, neke ghua.

⁷ Ka leghuna tato age nogha no mahaina nia ketuhuna Boazi neke age veha vananio ghu manei, manei neke ghahe la epu visi ka toraina va kukuruna kabuna bali ani mo. Ruti neke vanemoho ma neke lao ghu, neke la tafe vonai ghu totoufuna ghahenari, nia la epu hinae tuna neke ghua.

⁸ Ka ia hoatai redu, Boazi neke kakazara kuruina va ghilaghila neke fihiki ghu; ta ghuana mu to finini ghu kaike fotati epuna ka ghahenari mo.

⁹ “?Hei mu agho?” Ne ghua notohina. “Ara mu Ruti ia nou noniriva,” ne ghua ghini. “Va toufu ghinagu meha va kukuruna nou totoufu nia, vununa agho mu taremehana keraguau ara e kuruigho ghu mana mala kopu ghinaguna ara.”

¹⁰ “Iahova e va beanigho tugu ghaseo,” ne ghua ungene tughuina. “Namaha varisute iahi mu e faa fuludu laoi noke kusu va podolio agho ka nou vasagha: Agho e deo go bozo leghuri ghu ira mane foforu ta taghotagho ba kuma.

¹¹ Oka maugheu la ghu tugu ghaseo. Ara a age riva vananigho mo ira leghu ta fangari nga agho. Ira leghu noni taremehagu nga ka malau ini edi avohigho agho mu kaike fotati ta toraina veha puhiu, ta ghuana.

¹² Geta hohoghona ghu ta kaikeuna ara ka ira taremehana ta namo kerauau ta boka mala hio suteighona ghe, kaike maneni ta auna ta toraina varinamo fuludu laona ka ara.

¹³ Auna agho aiahi redu ini, mala ka fufugho nia neto kabai fini kopu ghini ghau la manei, ianimu to veha mo. Nga neto deo la ge lao hihingona ghu manei, ara a va bebereana kaIahova ia ta doli ta age riva ghinina ara ianimu. Epu ma agho aiahi dufu ghu ka fufugho nia.”

¹⁴ Epu ma tuna ka ghahenari ge dufu ghu ka fufugho ani neke ghua Ruti, ghe neke dori varizeai ngama to baghunu ghu manei to kusu ghahe ghu, vununa Boazi deo geke kabai ghidi ghu kehara ta avohina kaike fotati neke meha ka galahena mala bota va lufuru subuna bali ani, ta ghuana.

¹⁵ Boazi neke kahe ghua haro ma iahi ka manei, “Va hinae mehai poko sodu va pepeghuru ta va vonai nia agho o posi va fedari ghu,” ne ghua ghini. Riva ghini tuna manei ianimu geke oranga va foudu ghini lao ghu fatana 25 kilo bali, va hure ghini laona, neke ghua. Ianimu tuna ghe neke leghu lao nga Boazi ka malau fafaana ani.

¹⁶ Ka ia ke la dufuna Ruti ka nona vasagha, Naomi neke notohi, “?Ne la heve ghua mo ngaia tugu ghaseo?” ne ghua ghini. Va kahe ghini tuna ira vahina leghutau neke to riva vananiro nga Boazi,

¹⁷ kahe ghua harona iahi, neke ghua “Manei neke vanagu varadaki kilo bali irahi, neke kahe ghua ghu iahi, ‘Oka ke leghu kakato lao ghu ka nou vasagha,’ neke ghua ghinagu.”

¹⁸ Ianimu tuna ghe neke kahe ghua nga iahi Naomi, “O au afana tugu ghaseo, o vuhai hadu kavei ghu heve ta dufuna ghatu. Vununa manei e deo ge age maghoso ghu, e vuhai va totonui ghu puhi iahi ravata ini.”