Ruti 2 - Ia Foforuna Naiungene

Ruti Ne Dufui Boazi

¹ Ka keha pelonao mo Naomi mu neke au kaike taremehana ia keranau. Mane ianimu ghu mu e kaike manefaa ta veha puhina ka ia butubutu Elimeleki, babaolonana Boazi.

² Kaike ravata Ruti ia tanina Moabu neke kahe ghua iahi ka Naomi, “O va malumuau ko ta kave laona ara ka ira nunuma bali, a la pisu subuna bali ta kunu hinae ghu ka leghuna hei ta la boka dufui ara ta fini suteauna ghu manei,” neke ghua ghini. “Lao ba agho tugu ghaseo,” neke ghua Naomi.

³ Ghahe tuna Ruti ge lao ghu ka kaike nunuma mala la sipa subudi balina ka ira heve dike kunu hinaeriro ka ira dike haharuiro, neke ghua. Taghuana mu koia, to nona nunuma bali ghu ma Boazi ia ta pagusu lao ka ia butubutu kokolo Elimeleki mu, ta la haghele ani manei.

⁴ Ne toraina hohoghona ghu, taghonai Boazi neke sipana mehao Betilehemu toke sabara neke la ungene vehari ghu ira ta tarapa bali. “Iahova e au ka ghau!” Ne la ghua ghidi. “Iahova e va beanigho agho!” Di ghua ke ungene tughu laoina.

⁵ Notohi tuna ia mane kenuna ka ira maneriva neke ghua Boazi, “Rekaha ghase ka hei mo mu ianihi?” Neke ghua ghidi lao.

⁶ “Manei mu ia fotatina Moabu neke leghu meha taremehanao Naomi sipa mehadira Moabu,” ne ghua ungene tughuna ia manefaana riva.

⁷ “Manei neke fangau ara ta mala pisu subuna balina ka leghudi ta tarapa hio bali irahi, neke riva ma neke au ghu tatanigai fufughononi dufu ghu ghatunaina, nia maghoso birusuna lao ma ka rorofena, neke ghua.”

⁸ Kahe ghua tuna iahi ka Ruti neke ghua Boazi, “Tugu ghaseo, o nonomoho meha ka ara. Oka la pisu bali ghu ka ira ta kunu hinae ka keha nunumana, nia oka kave kaini ghu numuma iahi, e ghua. O au taremehadi ma ghaseriva irahi ka ara aiahi.

⁹ O mato lao hae mo nunumasare di haharuira ira mane, o leghu laori ghu leghudi mo fotati ari. Ara nato va kahe ghidi ira mane tadika posigho agena ghu. Nia noto parangoso la agho, o la hio ketuhu ka ira zagi toke va fouduriro ira mane,” ne ghua ghini.

¹⁰ Ianimu tuna ghe neke torongaghituturu hinae nga Ruti neke maimanihi hinae ghu ghirinina kava ani, kahe ghuana iahi, “?Heve no ghua agho ghe, no toraina suteau nga ara ia noni mehagu?” Ne ghua ghini.

¹¹ Boazi neke ungene tughui, “Ara nato nomohori vahina leghutau tato riva ghidi nga agho ka ia nou vasagha taniga ia leme kaighoni kerauau—ka ia noke ghahe kairiro agho nou uke ghe nou mama nia ia nou malaukava e ghua, noke meha au taremehadira ghu ira noni noke deoro goke avohori gheu ghu sepao.

¹² Nai vanani Iahova e tabarigho ghu ka heve noke to riva ghidiro agho. Nai vanani Iahova ia God na Isiraeli e tabara va vehaigho ghu ka ia ta meha soro agho ka ira pekana laena mala kagara ghinighona.”

¹³ Ruti neke ungene tughui, “Faghina agho, ara na verevere fangai ta boka hioi ta agena ghu ara ia varisute ka agho,” ne ghua ghini. “Agho noto vanagu va kakapoto nia noto ungene namahi ia nou noniriva—geta deo au ghu ara ia papala ta varifata ka kaike ghu ka ira fotatiriva agho.”

¹⁴ Ka ia fafata mala mahai, Boazi neke kahe ghua iahi ka Ruti, “O meha aiahi. Hiori keha ghano o va tihi laori ghu ka ia waeni ta paraha” ne ghua ghini. Ka ia nohe taremedi manei ira dike tarapa hio baliro, Boazi neke vanani lao manei keha subudi bali ta momora. Manei neke mahairi haro neke kaba ghidiro nia kunu mo tuna keha ghenara, neke ghua.

¹⁵ Ka ia ke leghu lao ta la pisu subuna bali ghu manei ka ira ta kunu hinae, Boazi neke kahe ghidi va gigima ira mane foforu ka taghona, “Geta pisu bali ghu manei ka piliga bali nira ghe, oka buruai ghu.

¹⁶ Nga o koroho kave vanani kehara ka ta nai varighara ghidi nira, o nai kaveri ghu mala age sene hiorira manei, nia oka buruai ghu, e ghua.”

¹⁷ Sene hio subuna bali ta kunu hinae tuna ge vuhai age saighona ghu, neke ghua Ruti. Ianimu tuna ghe neke bota va lufuru hinaeri nga manei ira subudi bali, neke nona au ghu ka 12 kilo tahudira neke va foudina manei.

¹⁸ Manei neke hio leghu laori ka malau fafaana ani neke fini tana ghu nona vasagha taghe niha ghu neke sene varighara ghidira manei. Nia Ruti neke nai kaveri haro molamo heve neke potekairiro ka ira ghano neke to mahairiro taghona ka nunuma ani, neke vanani lao ghu Naomi.

¹⁹ Notohi tuna Ruti neke ghua nona vasagha, “?Hae mo noke la rivana agho noke la sene hiorira ghu subudi bali irahi? !(Iahova) e va beani ia mane neke fini avohigho no agho!” Ne ghua ghini. Ianimu tuna ghe neke turi lao nga Ruti ka nona vasagha ghinina ka nunuma bali hei mo neke la rivana taghonai, kahe ghuana iahi, “Babaolonana ia mane kutana ia nunuma bali ka nake la riva no ara ghaturo mu Boazi,” ne ghua ghini.

²⁰ “!Iahova e va beani manei!” Ne ghua Naomi va kahe ghini laona nona vasagha. “Manei e deo geto nodo ghu va podolina ia nona varisute ka ira ta doli nia ka ira ta leme, e ghua.” Mane ianimu ghu mu kaike taremehamai ta varinamo ma ghai; manei mu kaikeu ka ira ta mala fini kopu ghini ghai.

²¹ Kahe ghua tuna iahi neke ghua Ruti ia tanina Moabu, “Manei neke kahe ghua ghe iahi, ‘O au taremehadi nogu noniriva idi edi vuhai age haharui va noghari ghu maneri leghu bali irahi nga ka ara,’ ” neke ghua ghinagu.

²² Kahe ghua tuna iahi ka nona vasagha, neke ghua Naomi, “E age veha ka agho ghatu tugu ghaseo, ta lao taremehadira agho ira fotati ka Boazi, vununa ka ira nunuma bali ira keha noni mu edi boka age va mukoigho mo maneri,” neke ghua ghini.

²³ Au riva varinamo taremehadi ma tuna manei ira fotati ta riva ka ia nunuma bali Boazi ge vuhai age hokoto ghu ia haharui ka ira bali nia witi neke ghua manei. Ruti neke au taremehana ghu ma nona vasagha.