Ruti 1 - Ia Foforuna Naiungene

Fototatamana Elimelekiri Di Lao Moabu

¹ Ka ira ravata kopudi ira manebabatu ani Isiraeli, kaike manena Betilehemu ka giliona Zuda neke ghahe kaini malau leghaha ianimu taremehana ia ghaseborona nia ira palu tuunamane e ghua, dike la au taghe noni mehadi dike la ghua ghu ka ia soloso Moabu, vununa neke au kaike songe ka ia malau Isiraeli.

² Babaolonana mane ini mu Elimeleki, nia babaolonana ia ghaseborona mu Naomi, nia ira palu tuunamane tuna babaolodira mu Maloni ghe Kilioni, e ghua. Maneri mu kokolo Efarati tanidi ghu Betilehemu ka giliona Zuda, dike lao ghu maneri ka ia malau Moabu dike la au ghu aianimu.

³ Age leme tuna Elimeleki ia keranau Naomi, ge toke age au kakaike ma ghu manei ia naboko, au taremehadira ira palu tuunamane, neke ghua.

⁴ Palu tatahina mane irahi dike varihio ka keha palu fotatidi Moabu babaolodira Ofa ghe Ruti. E nona au bana nga ka leghuna tazo komuhu audira aianimu, ghe dike leme ghedi nga

⁵ Maloni ghe Kilioni, toke au kakaike ma ghu Naomi, deo keranauna nia tuunamanena, e ghua.

Naomi Ghe Ruti Di Leghu Betilehemu

⁶ Ka ia auna Naomi ani Moabu, manei neke nomohi toke va veharira Iahova ira nona noni ka ia vanadi ghano. Naomi nia ira palu nona vasagha dike va tana mala ke ghahe kainina Moabu take leghu laona ghu ka ia torai malauna taghonai.

⁷ Manei nia ira palu nona vasagha e ghua dike ghahe kaini ia malau dike aui dike mehao ghu leghuina ia hangana ta boka mala ke hio leghuri ka ia kavana Zuda.

⁸ Ianimu tuna ghe neke kahe ghua nga iahi Naomi ka ira palu nona vasagha, “Ghau palu oke sopai leghu la au ghemu ka ira sugadi sopai nomu ukeri. Nai vanani Iahova e hio sute ghau ghu, taghe ta ghua niala hio sute auna ara nia ira tato lemekaiau, e ghua.

⁹ Nai vanani Iahova e toka ghini ghau ghu mala ke age sopai au ghemu vehana ka ira sugadi ira sopai keramuau.” Ianimu tuna ghe neke angoho laori nga Naomi kubaerina, dike tataniga nakele va fafaa ghu maneri palu,

¹⁰ kahe ghuadina iahi ka Naomi, “E deo, ghai palu a leghu taremehau age haroma ka ira noni agho,” dike ghua ghu.

¹¹ Ghe Naomi neke ungene tughuri, “Ghau palu tugu ghasero oke leghu ghemu ka malauro. ?Heve ghe go meha taremehagu nga ara? ?Ara a boka ke age nai tuugumane mo mala ke varihiona ka ghau palu, no ghua?” Ne ghua ghidi.

¹² Oke leghu ghemu ka malauro palu tuugu ghasero; O ghahe ghemu vununa ara mu to puina ghaghasekusu mala ke varihio leghuna. ?Geta kahei ghu ara ta boka epu taremehanana kaike mane ghatu redu, ta nairira ghu keha tugumanera ghe,

¹³ heve, ghau palu o au naboko ma edi age faa vona ghu maneri deona ke age varihiona ka keha manena? Deo, ghau palu tuugu ghasero, heve ta dufuini ara mo ta minga fuludu laoina ta dufui nia ghau palu, vununa ia kamena ta mana Iahova ne talau ara.

¹⁴ Ka iahi dike toraina age tatanigai nakele va fafaa ghu maneri palu. Ofa neke angoho laoi nona vasagha ghe neke kubaei nga, nga Ruti mu neke posi va gima lao ma neke au ghu ka kamenari.

¹⁵ “Fini, ia keha kerau nonohe to leghu ghena ka ira nona noni nia ka ira nona god, e ghua. Agho o leghu taremehana lao haro,” ne ghua Naomi.

¹⁶ Ghe Ruth ne kahe ghua iahi, “Oka va ohiohi au ghu ta mala ghahe kaighona, ba, take leghuna ara. Vununa hae ta laona agho, ara a lao nia hae ta auna agho ta age auna ara, e ghua. Ira noni ka agho edi age nogu noni ara nia ia God ka agho e age nogu God ara.

¹⁷ Hae ta lemena agho ta age lemena ara, nia aianimu ta age gilughinaguna, e ghua. Leme lama ta boka fotauna ara ka agho, nga nato ghahe kaigho la ara ghe ga leme nga, nai vanani Iahova ta toraina va kilasa muko auna ara.”

¹⁸ Vununa Naomi neke fini avohi Ruti ta toraina posi va gimaina ia lao hihingo ka manei mala ghahe taremehanana taghonai Naomi, toke nodo ma ghu manei va tutuufu ghinina ta mala ke leghuna.

¹⁹ Ghahe ma gedi lao ghu, gedi vuhai la dufu ghu Betilehemu dike ghua palu fotati idi. Ka ia la sabaradi Betilehemu, ia kamotona malau leghaha dike ngilingoele ngenengenedira. “?Naomi mamu baini iahi?” Dike ghua ira fotati notohodira.

²⁰ “Oka va kudo ghinagu Naomi ghu, nga Minga o ghua ghinagu, vununa God ia ta Torai Mana neto va mingai ia doli ka ara.

²¹ Ara nake ghahe kamotoaigu, ghe Iahova neto hio leghu meha koroghagu ara. ?Heve ghe no va kudo ghinagu Naomi nga ka ta va kilasau, nia vanagu meha mamarutana ini Iahova ia ta Toraina Mana.”

²² Naomi neke leghu sipana ghu Moabu taremehana Ruti ia nona vasagha ia tanina Moabu. Maneri palu dike la sabara ani Betilehemu ka ia tatanigaina ia haharui subuna bali.