Romu 10 - Ia Foforuna Naiungene

¹ Ghau taremehagu noni kiloau, toraina lao hihingo nia nogu taraina ara ka God maladira ira noni Isiraeli mu ia ta mala boka hio va doliri maneri.

² Vununa ara a boka turi ghidi kave mo maneri tadi puina hagalai leghuina maneri God, ghe hagala iahi ka maneri mu e deo ge va dedeke ghu ka avoavoho ta hohoghona.

³ Vununa maneri dike deo gedi avohi ghu ia ghaghahena ta hohoghona ta mala nakai va lotororira ira noni ka ia nahalina God, dike leghui ghu ia nodi ghaghahena taghodighi ia ta leghui ia vetula ka Mosese. Maneri dike deo gedi kabai ghini ghu ia ghaghahena ka God mala nakai va lotororira.

⁴ Kraes neto ke va noghai ia ghaghahena ta mala nakai va lotoro noni ka ia vetula, mala ka ia va hohoghonai Zisas lama ta boka nai va lotororira ghu ira noni ka ia nahalina God.

⁵ Neke kangavina Mosese mu, ia noni e nai va lotori ka ia nahalina God ka ia leghui ia vetula. Neke ghua ghu iahi, “Hei ia ta leghui ia kamotona vetula mu, ta age doli ghenana,” neke ghua.

⁶ Ghe heve ne kaheina ka ira Kakangava ta Maduana ghinina ia ghaghahena ta mala nai va lotoro noni ka ia nahalina God ka ia va hohoghona mu iahi: “Oka notoho ghua ghu iahi ka hihingou nia, ‘?Hei mu ta vona laona ka malauo God fate?’ (Ianimu ghu mu e mala la hio hinae mehai Kraes).

⁷ Ba, ‘?Hei mu ta hinae laona ka ia malaudi ira ta leme?’” ta ghuana, (ianimu ghu mu, e mala ke la hio vonai Kraes ka leme).

⁸ ?Nga heve ne ghua mu ne kaheina ka ira Kakangava ta Maduana? Ne ghua iahi, “Ia nonomoho ka God to sabara ka agho; manei ne au ka paeteuna nia ka hihingouna,” ne ghua. Ianimu lamu ia nonomohona ia va hohoghona tada tuturi ghini kave ghita:

⁹ Ianimu ghu mu, noto kahe kavei la agho ka paeteunia, “Zisas mu Lod” ta ghuana, nia va hohoghonai tuna ka ia hihingou neke va tetuleghuina God ka ia leme ta ghuana, God e age hio va doligho ghatu.

¹⁰ Vununa ghita da va hohoghona, ne nai va lotoro ghita ghu God ka ia nahalina taghonai, nia vununa ghita da kahe kavei ia noda va hohoghona, ne hio va doli ghita ghu God.

¹¹ Taghe ia ta kahei la ka ia Kakangava Ta Maduana, “Hei ia ta kurui va hohoghona ka manei mu, e deo kalasu kai ge age va haghavi ghu,” ia ta ghua.

¹² Vununa e deo ta hazana mu ka vari hoataidi ira Ziu nia ira taka Ziu ghu—Ia kaike Lod mo mu Lod na ka ghau haroharo ne toraina va beanari ghu manei heiri haroharo ta kudo lao ka manei mala toka ghidira,

¹³ vununa ne kahei ka ira Kakangava ta Maduana, “Heiri haroharo ta kudo lao ka ia babaolona ia Lod mu, e age hio va doliri,” ne ghua.

¹⁴ ?Heve ghu ghe gedi boka kudo lao nga maneri mu ka ia dito ke deo no gedi va hohoghonai ghu? ?Nia heve e ghua ghe, gedi boka va hohoghonai nga maneri mu hei ia dito ke deo no gedi nomoho ghini ghu, e ghua? ?Nia heve e ghua ghe gedi boka nomoho ghini nga manei neto deo la hei ta la tuturi beana vanadina?

¹⁵ ?Nia heve e ghua ghe gedi boka la tuturi beana nga neto deo la hei ta tuhu laorina? Taghe ia ta kahei la ka ira Kakangava Ta Maduana, “!Ka namanamara ira ghahedi ira noni ta hio mehai ia nonomoho ta veha!” Ia ta ghua.

¹⁶ Ghe eka ghua ghu ira noni haroharo ani Isiraeli mu dike hioina ia Nonomoho Ta Veha. Vununa Aesaea ne kahe ghua iahi, “?Lod hei mu neto ke va hohoghonaina nonomoho ini ka ghai?” Ne ghua.

¹⁷ Ia va hohoghona mu e la meha ghu ka ia nomohi ia nonomoho, nia ia nonomoho ge nomohi ghu ka heiri ta tuturi beana ghini Kraes, e ghua.

¹⁸ Ghe ara na notoho: ?Heve, deo gedi ke nomohi ghu maneri ia Nonomoho ta Veha? Uve, maneri dike nomohi mo: vununa ne kahe ghua iahi ka ira Kakangava Ta Maduana: “Ia nonomoho ka maneri, neto ke kave lao ka kamotona malau iahi peka, nia ira ngengene ka maneri dito ke dufu lao ka ia va nonoghana malau iahi peka.”

¹⁹ ?Ara na notoho leghuni: ?Heve, deo gedi ke va fafahaki ghu ira noni Isiraeli? Uve, maneri dike va fafahaki mo, vununa ka ia fafata Mosese na ghe, God neke kahe ghuana iahi, “Ara a age toka ghidi ghatu ira taka torai nogu noni ghu taghogu, o age kakabai ghini ghu ghau ianimu ghatu. Ara a age va haala ghau ghatu ka ia age va vehari ara ira noni ta deo gedi va fafahakau ghu ara.”

²⁰ Aesaea neke deo ge maughena ghu kahe ghuana iahi: “Ara dike finiau ira noni dike deoro gedi haduau ghu ara. Ara nake va podoloau taghogu ka heiri dike deoro gedi notoho ghinagu ghu ara.”

²¹ Nga ghinina Isiraeli mu, God neke kahe ghua iahi, “Leleghu ravata, ara na au afa ghidi mala ke leghu mehadira ira noni ta huhughu nia kaputu.”