Podolo Kave 7 - Ia Foforuna Naiungene

God Neke Nakai Ghidi Zago 144,000 Nonidi Isiraeli

¹ Leghuna iahi ara nake finiri rodana engizeli tetudira ka ira rodana lobosaina malau iahi peka, va nodorira ira rodana dafe ta dafe laona ka ia kava, ba ia tahi, ba ka ira heke.

² Nia ara nake finini keha engizelinani la vona mehanana fateo mo hureina ia zago ka ia God ta doli. Manei neke kudo ghua lao iahi ka rodana engizeli neke vanadi mana iranimu God mala va mukoina ia kava nia ia tahi,

³ “Oka va mukoi ghu kava nia, ba tahi nia, ba heke nira, a vuhai nakai laoi ghu ghai ia zago ka God ka ira raedi ira nona noniriva.”

⁴ Maneri dike va kahe ghinagu ghu taghe nihau dike nai ghidi va ghilaghilara maneri ka ia zago God: Kaike mola, rodana vuro, rodana togha (144,000) noni ka ira tazoi palu butubutudi Isiraeli dike zagorira:

⁵ Ka ia butubutu Zuda mu kaike vuro, palu togha (12,000) dike zagorira, ka ia butubutu Rubeni mu, kaike vuro, palu togha (12,000), ka ia butubutu Gadi mu kaike vuro, palu togha (12,000),

⁶ ka ia butubutu Asa mu kaike vuro, palu togha (12,000), ka ia butubutu Nafutali mu kaike vuro, palu togha (12,000), ka ia butubutu Manase mu kaike vuro, palu togha (12,000),

⁷ ka ia butubutu Simoni mu kaike vuro, palu togha (12,000), ka ia butubutu Livae mu kaike vuro, palu togha (12,000), ka ia butubutu Isaka mu kaike vuro, palu togha (12,000),

⁸ ka ia butubutu zebulani mu kaike vuro, palu togha (12,000), ka ia butubutu Zosepu mu kaike vuro, palu togha (12,000), ka ia butubutu Benizemeni mu kaike vuro, palu togha (12,000) dike zagorira.

Ira Leghahai Varigharana Noni

⁹ Leghuna iahi, ara nake finini kaike leghahai varigharana noni. !E deo hei ta boka tahori haroharora! Maneri dike tanidi ka ira leghu soloso nga, butubutu nga, noni nga, ngengene nga, e ghua. Maneri dike va vona pokosodu ta ghiho ghe dike tetu posi balatadi tubo nga ka kenuna ia nonohe ginitaukela nia ia Rekahana Sipisipi, e ghua.

¹⁰ Maneri dike kudo va fafaa ghua iahi, “Ia hio va doli e meha ka ia noda God ta nohe ka ia nonohe ginitaukela nia e meha ka ia Rekahana Sipisipi, e ghua!”

¹¹ Ira leghu engizeli nga mu dike tetu lilohi ia nonohe ginitaukela, nia dike tetu lilohori ira manefaa, nia ira rodana va vuha dolidi, e ghua. Ianimu tuna ghe dike torongaghituturu rorogho hinae nga ka kenuna ia nonohe ginitaukela dike va totoana ghini ghu God,

¹² kahe ghuadina iahi, “!Amen! Helahela nia varanga avoavoho, kudoveha nia va vonavona nia mana nia gigima e nona toghunaidi ia nomai God. Amen!”

¹³ Ianimu tuna ghe neke notohoau nga kaike ghu ka ira manefaa. “?Heiri mo mu ta va vona pokosodu ta ghiho irahi nia hae mo dike la sipa mehara, e ghua?”

¹⁴ Nake ungene tughui ghu ara, “Agho mo ta avohina manefaa agho,” nake ghua ghini. Va kahe vanagu tuna neke ghua manei, “Irahi mu ira noni dike ghahe fuluduro ka ia fafatana ira leghahai mamarutana. Maneri toke tapala va ghighihori ira nodi pokosodu ka ia busakana ia Rekahana Sipisipi.

¹⁵ Ne ghua mamu ghe, “di tetu nga ka kenuna nonohe ginitaukelana God va totoana ghinina redu ravata ka ia nona Ringifota ta Maduana ka God. Nia manei ia ta nohe ka nonohe ginitaukela ani, ta age kagara ghidira ka ia au taremehadi manei.

¹⁶ ‘E toraina deo ke age nodi lihana, nia e toraina deo ke age parangosodira e ghua, Ia taunu e deo ge age fera va malasari ghu,’ ba heve keha leghutau ta sisito fuludura, e deo ge boka age va vavahagalari ghu.

¹⁷ Vununa, ia Rekahana Sipisipi ta au ani ka hoatana nonohe ginitaukelana, ta age nodi mala kopui sipisipina; ‘manei e age batu ghidi lao ka ketuhu futu ta va meha doli.’ ‘Nia God e age guranga va karangori ira kolodi hibadi.’”