Podolo Kave 13 - Ia Foforuna Naiungene

Ia Va Vuha Ta Mamaghuana Ne Kave Meha Ka Ia Tahi

¹ Ianimu tuna ghe nake finini nga ara kaike va vuha ta mamaghuana, la kave mehana ka ia tahi. E vitu pauna, nia tazo gegehona e ghua, taremehana tazo tarapae ginitaukela ka ira gegehona. Kakangava ta au laora ka ira sopai pauna mu ira babaolo ta damu va mukoi God.

² Va vuha ta mamaghuana iahi mu taghe fifinina lepadi e ghua, nga tabalanara mu taghe tabalana bea e ghua, nia ia mangana tuna taghe mangana laioni e ghua. Ia daragoni neke vanani lao ia va vuha ta mamaghuana ia gigima nia ia nonohe ginitaukela ka taghonai, nia ia mana mala kopu, e ghua.

³ Kaike ghu ka ira pauna ia va vuha ta mamaghuana mu taghe neke zolo va muko neke ghua, geala e fatai leme ghini ghu manei, ghe bakoranani neke age mafo mo. Malau kamoto iahi peka dike age nodi ferei hahaima iahi, dike leghui ghu ia va vuha ta mamaghuana.

⁴ Maneri dike va totoana ghini ia daragoni, vununa manei neke vanani ia va vuha ta mamaghuana kokolona mana ianimu dike va totoana ghini ghu molamo maneri ia va vuha ta mamaghuana. “?Hei mu taghe va vuha ta mamaghuana ianimu ta ghuana? ?Hei mu ta boka taga tetuina manei,?” dike ghua.

⁵ God neke va malumi ia va vuha ta mamaghuana ta mala hadu varangana nia ta ungene va mukoina taghonai God e ghua, nia ta mala va rivaina ia mana ka manei ka giliona rodana-ngavuluai palu hihile, e ghua.

⁶ Va vuha ta mamaghuana ianimu neke ungene va mukoi God, ia babaolona manei nia ia Suga Tapole ta Maduana ka manei, nia ira ta au taremehana manei ka malaunao fate, e ghua.

⁷ God neke va malumi ia nazahi ta magararira ta paufurira ghu ira noni ka taghona God. Nia manei neke va malumi haro manei ta mala tetu ginitau kaputurira ira noni ka ira leghu butubutu nga, noni nga, ngengene nga nia soloso nga, e ghua.

⁸ Ira leghu noni ta nona nga malau iahi peka, edi age va totoana ghini va vuha ta mamaghuana iahi. Maneri mu ira leghu dike deoro nga ge kangavari ghu ira babaolodi ka ia bukana doli, ia buka ka ia rekahana sipisipi dike to atungio maneri ghe neke va vuhaio nga malau iahi peka.

⁹ Noto au talingau la, o nonomoho ghu.

¹⁰ Neto kabai sakomo hio ghahe laoigho la God ka ia keha malau, agho o lao taghe kaike noni pipiliga ka malau ianimu, neto kabai ghinigho la God ta lemena agho ka leboto sisilufu mala magara, agho o leme ka leboto sisilufu mala magara. Vununa ka va fafahaka iahi, edi toraina tetu va gima ghu ira nona noni beana God ka ia nodi va hohoghona ka giliodi ira vavahagala.

Ia Va Vuha Ta Mamaghuana Ta La Podolo Meha Ka Malau Iahi Peka.

¹¹ Ianimu tuna ghe, nake finini nga ia keha va vuha ta mamaghuana la kave vona mehana ka kavana. Manei e palu gegehona taghe kaike rekahana sipisipi e ghua, ghe neke ngengene taghe kaike daragoni, e ghua.

¹² Manei neke va rivari ira leghu mana nga ka ia va kenuna va vuha ta mamaghuana, neke toraina gigima ghidi ghu ira noni haroharo ta au ka malau iahi peka, ta toraina va totoana ghinina ia va kenuna va vuha ta mamaghuana neke mafo leghuo ia bakorana ta lelemeana.

¹³ Manei neke riva ghidi ira leghahai hahaima ta fefereana, va hinae meha totoina ghe ka kolangana fate ka ia kava, ka ira hibadi ira tehi noni ta mato.

¹⁴ Nia ka ira leghu hahaima neke malumuo nga manei riva vananina ia va vuha ta mamaghuana ta kenu, manei neke sebori ira noni haroharo ta nona malau iahi peka. Manei neke kahe ghidi va gigima ira noni ta mala riva ghinina kaike nguzunguzuna ia kusu va vuha ta mamaghuana neke nona leme ghinio ia bakorana, ghe neke doli leghuno mo manei.

¹⁵ God neke va malumi ia nguzunguzuna ia va paluna va vuha ta mamaghuana, mala vanani hio hihingona ia nguzunguzuna ia va kenuna va vuha ta mamaghuana, e mala boka ngengene ghu ia nguzunguzu nia atunguri tuna ira dike deoro gedi ke va totoana ghini ghu ia nguzunguzuna ia va vuha ta mamaghuana, e ghua.

¹⁶ Manei neke va tutuufu ghidi ira leghu noni nga, ira ta varanga ghe ta noni gare ghu, ta taghotagho ghe ta kuma ghu, ira ta mala varituhu ghe ta kalasa ghu, ta hioina ia zago va ghila ka ira kame mautudi, ba ka ira raedi.

¹⁷ E deo ghu hei ta boka tatabarana, ba ta tatabarai leghutauna, neto deo la ge kurui zago va ghila ghu. Ia zago va ghila mu ia babaolona ia va vuha ta mamaghuana, ba ia nabana ia babaolona.

¹⁸ Hei ia ta avoavoho mu e boka avohi mo fafahakanana nabana va vuha ta mamaghuana iahi. Nabana mu onomo ghobi, onomo-ngavuluai onomou (666), e nabana ghu kaike noni.