Podolo Kave 12 - Ia Foforuna Naiungene

Ia Fotati Nia Ia Daragoni

¹ Kaike va ghilaghila leghaha neke podolona ka kolangana: kaike fotati ta poko ghini ia taunu nia ia hihile ka pekana ira tabalana, nia kaike tarapae ginitau ta tazoi palu babaghununa e ghua, ta auna ka paunani.

² Manei mu neke pote neke azili ake'ake ghu ka ia vavahagalana va dolini kaike rekaha.

³ Ianimu tuna ghe neke podoloni nga kaike va ghila ka kolangana: Kaike leghahaina daragoni ta busaka ta vitu pauna nia tazo gegehona nia vitu tarapae ginitaukela ka ira sopai pauna, e ghua.

⁴ Ia sekuna neke bota kai kaveri ka kolangana kaikeu ka leleghu lito babaghunu, neke kai hinaeri ghu ka malau iahi peka. Ia daragoni neke tetu ka kenuna ia fotati mala va tanai ghaninina ia rekaha ka manei ka toraina fafata neke doli mehao manei.

⁵ Ia fotati neke va dolini kaike rekaha mane, ia ta mala ginitau kaputuri leghu soloso nga ka ia mana taka boka paufi ghu. Ia rekaha neke sagu hio laoi ka God nia ka ia nona nonohe ginitaukela, e ghua.

⁶ Nia ia fotati ge pelo lao ghu ka ia malau koroghana ta karango ka kaike malau neke va tanaio God malana ka manei, mala la kopu ghinina ka giliona kaike togha, palu ghobi, onomo-ngavulu (1,260) ravata.

⁷ Ianimu tuna ghe neke age au nga kaike magara ka ia malau God fate. Mikaeli ia engizeli ta kenu nia ira engizeli ka manei e ghua, dike magari ia daragoni nia ia engizeli ka manei e ghua, dike magara leghu ghu ia daragoni nia ira engizeli ka manei e ghua.

⁸ Ghe maneri dike paufi ia daragoni, neke deo ghu malumuna manei nia ira engizeli ka manei e ghua ta auna ka malauo God.

⁹ Leghahai daragoni iahi mu ia adoghona sepao ta va kudo ghini ia Faghinadi ira nazahi ba Satana, neke seborio ira noni ka malau kamoto iahi peka, dike kai hinaeio ghu ka malau iahi peka taremehadi ira nona engizeli.

¹⁰ Ianimu tuna ghe nake nomohi nga kaike leo ta faa ka malauo God fate kahe ghuana iahi: “Ne hio va doli ghita tuna ia noda God ne va podoli ghu ta kuruina mana, mala taghe kaike mane ginitaukela ta ghuana kopu ghidira leghu noni nga, nia ia Mesaea neke faetio God ne va podolo kavei ta kuruina mana taghonai, mala kopu ghidira vahina leghutau nga. Vununa maneri dito kai kavei Satana ka ia malau God fate. Manei mu ia ta tetu ka kenuna God, ta makuturi ghu ira taremehada noni kiloau redu ravata.

¹¹ Maneri dike paufi Satana, ka ia busakana ia Rekahana Sipisipi nia ka ia tuturi ghini kave maneri ia nona nonomoho God. Maneri dike deo gedi ngana hetari ghu ira dolidi, dike va malumuri ghu taghodi ta lemena.

¹² O va ghazaghaza ghu, ghau ta au ka malauna God fate! Nga lelemeana mu ta la mehana ka malau iahi peka nia ka ia tahi. !Vununa ia Faghinadi ira nazahi neto hinae meha ka ghau! Manei mu ne toraina faa vanani haala, vununa manei ne avohi ta ponoena ia fafata ka manei.”

¹³ Ne avohi ghu ia daragoni dike kai hinaeina maneri ka malau iahi peka, manei neke fufu ghini leleghu ia fotati neke va dolinio ia rekaha mane.

¹⁴ Ghe ia fotati dike vanani palu laena taghe laena kaike leghahai sinagi e ghua, mala alava laona manei ka ia malau dike va tana vananio ka ia malau koroghana ta karango. Aianimu ta la fini kopu ghinina nia kagara ghinina maneri ka giliona lito komuhu fotana mala eka atungi la ghu ia daragoni.

¹⁵ Ianimu tuna ghe neke va sisiva lomohi nga fotati ini ia adogho ka ia ologhona ketuhu neke losa ghini kaveo ka ia mangana.

¹⁶ Ghe ia kava neke toka ghini ia fotati neke tobehi ghu ia mangana vaigulina ia ketuhu neke losa ghini kaveo ia daragoni ka ia mangana.

¹⁷ Ia daragoni neke hali ka ia fotati neke ghahe lao ghu mala magararira ira leghu rekaha nga ka manei, ira leghu ta leghuri nga ira ungene va gigima ka God nia ta tetu va gima ka ia hohoghona neke va podolio Zisas, e ghua.

¹⁸ Ianimu tuna ghe, neke tetu nga ia daragoni ka ia garanga ka ia tapuruna tahi.