Podolo Kave 10 - Ia Foforuna Naiungene

Ia Engizeli, Nia Ia Rekahana Buka Vividuhu.

¹ Ianimu tuna ghe nake finini nga ara kaike engizelini ta torai mana, la hinae mehana ka malauo God fate. Manei neke pihai ka kaike toba, taremehana kaike solodara ka fatena ia pauna. Taghe pelarana taunu neke ghua ia hihilina, nia ira ghahena mu taghe palu sutu ta burungu dike ghua.

² Manei neke posini ka kamenani kaike rekahana buka vividuhu ta tobehe. Ia ghahe mautuna neke deke lao ka tahio nia ia ghahe mairina geke deke lao ghu ka kavao, neke ghua.

³ Nia kaini tuna kaike leghahai kudo taghe urunguna laioni, neke ghua. Ka ia fafata neke kudono manei, ira vitu saduru dike ungene tughu ka gululu.

⁴ Ka ia fafata ngengenedi ira vitu saduru, nake bini kangavari mo ara. Ghe nake nomohi kaike leo sipana ka malauo God fate kahe ghuana iahi, “O ka zago kaputi ghu heve dike kaheio ira vitu saduru nia oka kangava hinaei ghu, e ghua,” neke ghua.

⁵ Ianimu tuna ghe neke va tuhu vona laoi nga ka malauo God fate, ia kame mautuna ia engizeli nake fininio ara tetuna ka ia tahi nia ka ia kava.

⁶ Nia manei neke va bebereana lao ka ia babaolona ia ta au toghunai neke va vuhaio ia kolanga nia ira leghutau ka ia giliona, nia ia kava nia ira leghutau ka ia giliona, nia ia tahi nia ira leghutau ka ia giliona, e ghua. Neke kahe ghua ghu iahi, “E deo ke age mamahugenani God.

⁷ Ghe ka giliodi ira ravata ta age ufui ia nona kufili ia va vituna engizeli, ia vatovato ka God neke poikao e age ghuduvu ghatu. E age dufu taghe neke kaheio lama manei ka ira nona noniriva taghona, ira porofeti.”

⁸ Ianimu tuna ghe neke ngengene meha nga ka ara kaike fafatani ia leo nake to nomohio la ara ka malauo God fate, kahe ghuana iahi, “Agho o lao o la hioi ghu buka vividuhu ta tobehe ani ka ia kamena engizeli ta tetu ani ka tahina, nia ka kavana.”

⁹ Nake lao ghu ara ka ia engizeli nake la fangai ghu manei ta vanaguna ia rekahana buka vividuhu. “Hioi o mahaini ghu. Manei e age lomoso taghe mizuana e ghua ka paeteu nia, nga ka kokoilou nia mu e ke age sisito paraha,” neke ghua ghinagu.

¹⁰ Hio tana lao tuna ia rekahana buka vividuhu ka ia kamena ia engizeli ga mahaini ghu, nake ghua. Manei neke lomoso lingilingina taghe mizuana neke ghua ka paetegu ini, ghe ka ia mahainigu ara, kokoilogu ini neke age sisito paraha.

¹¹ Ianimu tuna ghe, neke va kahe ghinagu nga, “Agho o va ongahi ma au ghu heve ta age dufuna ka ira leghu kokolodi noni nga, soloso nga, ngengene nga nia ka ira mane ginitaukela, e ghua.”