Matiu 5 - Ia Foforuna Naiungene

Ia Tuturi Beana Ka Ia Vuhuku

¹ Kaike ravata Zisas neke finiri ira varigharadi noni, neke vona lao ghu manei ka ia tabafena vuhuku la nohe hinaena aianimu. Ira nona mane ta nonofoi dike varighara ghini liloho,

² neke tataniga va kakahe ghidi ghu manei kahe ghuana iahi:

³ “God e va beanari ira noni ta va ghighiu ka manei ka vahina leghutau nga, ia Ravutu ka malauo God fate mu e nodi maneri.

⁴ God e va beanari heiri ira ta muko hihingo, manei e age va kakapotori.

⁵ God e va beanari heiri ira ta nai va hinaeri taghodi, malau kamoto iahi peka edi age hio kadoli maneri.

⁶ God e va beanari heiri ira ta kovoro ghini nia ta parangoso ghini ia ta lotoro, maneri edi age hio kamoti ghatu ta kabai ghini ani.

⁷ God e va beanari heiri ira ta auri dudumana, manei e age dudumana ghidi haro ghatu.

⁸ God e va beanari heiri ira ta nai kamoto laori ira hihingodi ka taghonai God, maneri edi age finini God ghatu.

⁹ God e va beanari heiri ira ta riva ghini ia va bubule, maneri e age va kudo ghidi nona rekaha God.

¹⁰ God e va beanari heiri ira ta ngovangovalari ka ia riva ghini maneri heve ia ta lotoro, ia Ravutu ka malauo God fate e nodi maneri.

¹¹ “God e va beana ghau ka ia fafata kahe va muko ghau, ngovala ghau, nia ka ia fafata va kahe ghini ghau ira leghu kokolodi sesebo ta muko nga maneri, vununa ghau no leghuau ara.

¹² O va manemane nia va ghazaghaza, vununa ia leghahai tabara to au afa ghini ghau ka malauo God fate. Taghe iahi dike ghua ghidi haroma maneri ngovalarira ira mane porofeti dike kusu au meharo ka ghau sepao.

Ia Kuratahi Nia Ia Fegala

¹³ “Ghau mu taghe kuratahi ta malana malau iahi peka, e ghua. ?Ghe neto age kakai la ia lingilingina ta tatahi, heve e ghua ghe geke boka age va kuratahi leghui nga? Manei eto age deo lighorona, e fera ghini kave lao ghu, nia age dekedekei tuna ira noni ta ghaghahe, e ghua.

¹⁴ “Ghau mu ia fegala malana malau kamoto iahi peka. Ia malau leghaha ta au ka ia vuhuku mu e deo ge boka poika ghu.

¹⁵ E deo hei ta va dolinina ia zuta ta va rokomo ghini togilaina ghu. Nga e nakai vonai ka ia mala reketena mo, e vanadi fegala ghu ira noni haroharo ka ia giliona suga.

¹⁶ Taghe iala o ghua ghu molamo ghau, o va pelara kaveri ghu ira nomu fegala ka kenudi ira noni, edi mala age finiri ghu maneri ira nomu riva ta veha, edi helahela ghini ghu nomu Mama ka malaunao fate.

Zisas Ne Va Ghuduvi Ia Vetula Ka Mosese

¹⁷ “Ara na meha hio kaini ia vetula ka Mosese nia ira vari va kakahei ka ira porofeti e ghua, go ghua ghinagu la. Ara mu nake meha mala va ghuduvuri leghutau iranimu.

¹⁸ A toraina va kahe ghini ghau ghu ia hohoghona, ghe ge age nogha nga kolanga ini fate nia malau iahi peka, e deo kaike leta tei ghu nia kaike ghasi tei ghu ka ia vetula ta age kakaina ghatu, e vuhai age ghuduvu ghu vahina leghutau neke kangavariro nga ka ia giliona.

¹⁹ Ianimu la ghe, hei neto huhughi la ungene va gigima taka suri tongovona ghu, nia ke va kakahe ghidi haro tuna ira keha tadi ghua harona ianimu neto ghua la, manei e age va nonoghana ghatu ka ia Ravutu ka malauno God fate. Nga hei ia ta leghuri ta va kakahe ghidi ghu ira keha noni ghidira ungene va gigima irahi mu, manei e age varanga ghatu ka ia Ravutu ka malauo God fate.

²⁰ “A toraina va kahe ghini ghau ghu, ghau o toraina leghu va vehai ia vetula beana ka God fuludurira ira Farisi nia ira mane ta vari va kakahe ghini ia vetula beana e ghua, ghe go toraina boka hagheli nga ia Ravutu ka malauo God fate.

Tatangana Ghinina Ia Haala

²¹ “Ghau to nomohi ka ia vetula Mosese ta kahe ghuana iahi, ‘Oka vari atungu ghu; hei neto riva ghini la ianimu e hio vonai ka varifate’ ia ta ghua.

²² Ghe ara a va kahe ghini ghau ghu, noto hala ghau la ka kaike noni, ghau o age talai ghatu ia vari sukutuai. Noto va kudo ghini babaolo ta muko la ghau ia keha noni, ghau o age tetu ghatu ka kenuna ia Nonohe Faghina kamoto ira Ziu. Nia ‘!Agho ta kingo ta deo lighorou!’ noto ghua ghini la ghau ia keha noni, ghau no nakai ghau taghomu ka ia lelemeana ta mala age hagheli ghau ia totoina gehena.

²³ “Ianimu la ghe, noto tetu la agho ka ia kenuna sopebeana mala va tanai vananina God ia nou veala, ghe ke ngana fati tuna agho kaike noni neke torai muko vanani ka agho noto ghua la,

²⁴ nai hinaeina nga ia nou veala ka gheremena sopebeana ani. Laona tuna ka noni ianimu, go la riva ghidi ghu keha va bubule taremehana manei mala ke varivehai leghuna ghau palu ghu, e ghua. Ianimu tuna ghe, goke leghu lao nga, goke la vanani ghu God ia nou veala.

²⁵ “O magali ke va puhini ghu ka ia bule ia noni neke muko vananio ka agho, ghe ge age hio vonaigho nga manei ka ia mane varifate, ia ta age va kadolo laoigho ghatu ka ia pulisi ta kopu, nia kai hagheligho ka pipiliga ia ta ghua.

²⁶ A va kahe ghinigho ghu ka ia hohoghona, agho e deo go boka age kalasa ghu, o vuhai age kaini ghu ia va nonoghana kunegelena seniti ka ia kaoni agho.

Tatangana Ghini Ia Ta Zave Kunui Keranau

²⁷ “Ghau to nomohi ka ia vetula Mosese ta kahe ghuana iahi, ‘Oka zave kunui ghu kerauau.’

²⁸ Ghe a va kahe ghini ghau ghu ara, hei neto fini laoi la ia fotati neto kabai ghini ghu, manei mu to zavei fotati ianimu ka ia hihingona, to sasake ghu.

²⁹ Neto age va sasakeigho la hiba mautuu nia, o ziloko kaini, o fera ghini kai lao ghu. E puina veha fuludu laoi ia ta kai kamoto laoigho ka ia totoi gehena mu, neto kakai la kaike pelou ka tiniunia.

³⁰ Nia neto va sasakeigho la kame mautuu nia, o kodaka kaini o fera ghini kai lao ghu. E puina veha fuludu laoi ia ta kai kamoto laoigho tiniunia ka ia totoina gehena mu, neto kakai la kaike pelou ka tiniunia.

Tatangana Ghinina Ia Varikai

³¹ “Ghau to nomohi ia vetula ka Mosese ta kahe ghuana iahi, ‘Hei ia ta kaini ia ghaseborona mu, e toraina kangava vanani kaike letana varikai,’ e ghua.

³² Ghe a va kahe ghini ghau ghu ara; ia mane mu e boka kaini ma ia ghaseborona ka ia fafata ta zavei lama ghaseboro ianimu ia keha mane. Neto varikai la manei ka ira keha ghaghahedi va fafahaka, mane iahi ne age va mukoi fotati ianimu ka ia ghaghahena zave, neto varihio leghu la manei ka keha manena, nia mane ta hioi ani tuna manei, ge age zave kunui haroma ghu ia kusu keranau fotati ani, e ghua.

Vari Va Kakaheina Ira Va Bebereana

³³ “Kehanani noke nomohina ghau ka ia vetula Mosese mu e kahe ghua iahi, ‘Oka kodakari ghu ira nomu va bebereana, nga o suteri heve noke va bebereana vananina ia Lod.’

³⁴ Ghe a va kahe ghini ghau ghu, oka va bebereana ghu noto riva ghini la kaike naiungene. Ia malau ka God fate mu, nonohe ginitaukela ka God, oka mala va bebereana la ghu ghau;

³⁵ ba, oka va bebereana lao ghu ka malau iahi peka, vununa iahi mu taghe nonohe mala dedeke ka God; ba, oka va bebereana lao ghu Zerusalemu, vununa manei mu malau leghaha ka ia Mane Ginitaukela ta varanga.

³⁶ Nia oka va bebereana ghu ka paunia taghou, vununa agho e deo ghe go boka va ghihoi ghu, ba, va sisibei ghu kaike hingana kalau tei ghu.

³⁷ Nga, ‘Uve’ ba ‘Deo’ o suna ghua ma ta kaheina ghau. Keha leghutau ta kaherirani ghau mu, e sipa mehadi ka Satana.”

Tatangana Ghinina Ia Raghe Leghu

³⁸ Ianimu tuna ghe neke kahe ghua nga iahi Zisas, “Ghau to nomohi ka ia vetula Mosese ta kahe ghuana iahi, ‘Hei neto va bakorai la ia hibana ia keha noni, noni ianimu e ke va bakorai molamo ia hibana manei. Hei neto keta kaini la ia hingana ia keha noni, noni ianimu e ke keta kaini molamo hinganani manei.’

³⁹ Ghe a va kahe ghini ghau ghu ara, oka ke holara leghui ghu agho ia muko ta varifata ka neke va riva ghinighono ia keha noni. Hei neto tapaligho la ka bako mautuu nia, o ke fihiki vanani laoni keha pelona bakou nia, e tapali haro ghu manei.

⁴⁰ Neto kabai hio vonaigho la ka vari sukutuai keha noni mala hio tauna ia nou sote, o ke vanani lao haroni ia nou koti.

⁴¹ Neto va tutuufu ghinigho la kaike mane magara ta mala gapa vananina ira nona leghutau ka giliona kaike kilomita, o gapa vanani lao ka palu kilomita.

⁴² Neto fangaigho la keha leghutau kaike noni, o vanani lao, nia neto kabai mala riva la kaike noni keha nou leghutau ka birusuna fafata tei, o vanani laona.”

Vari Va Kakaheina Ia Namaha Ta Maladi Ira Ta Kana Ghinigho

⁴³ “Ghau to nomohori ira noni kahe ghuadina iahi, ‘O namaha ghidi ira nomu baere nia o kikipana ghidi ira ta kana ghini ghau,’ ta ghuana maneri.

⁴⁴ Ghe a va kahe ghini ghau ghu ara: o namaha ghidi ira ta kana ghini ghau nia tarai toka ghidi ira ta ngovala ghau, e ghua.

⁴⁵ O ghua ianimu ghe, go age va podoli nga ta torai nona rekahana nomu Mama ka malaunao fate. Vununa manei ne va pelara vanadi lao ia nona taunu ka ira ta muko ghe, ta veha ghu, nia vanadi nanare ira ta lotoro nia ira ta ka lotoro ghu, e ghua.

⁴⁶ ?Noto namaha ghidi lama ghau ira noni ta namaha ghini ghau, heve mu tabara ta age hioina ghau ghatu? Ira ta hio takisina, di ghuana ianimu.

⁴⁷ ?Noto hio suteri lama ghau ira noni ta avohori ma taghomughi, ka heve mo no age hazana ghau ka ira keha noni haroharo? Ira taka avohina God di riva ghinina ianimu.

⁴⁸ Ghe ghau mu o toraina veha, taghe nomu Mama la ka malaunao fate ia ta toraina veha.”