Matiu 22 - Ia Foforuna Naiungene

Ungene Talevarana Ia Mahai Varigharana Varihio

¹ Zisas neke tuturi vanadini ira noni ka ungene talevara mala va kakahe ghidira.

² “Ia Ravutu ka malauo God fate mu, taghe kaike mane ginitaukela neke va tanaio kaike mahai varigharana varihio ka ia tuunamane, e ghua.

³ Manei neke tuhu laori ira nona noniriva ta mala la kahe ghidi mehara ira noni neke fanga laoriro ta mala la holarana ka mahai varihio ani, ghe maneri dike pake ghedi laona.

⁴ “Ke tuhu laorini tuna ira keha nona noniriva ta la va kahe ghidira ngengene irahi neke ghua, ‘Ia sarumahai ka ara mu to va tana vanamu. Ira nogu fafaetedi bulumakau nia ira rekahadi bulumakau ta busi e ghua to paheri to va hetari haro ghu, nia ira vahina leghutau nga nato va tanari haro, e ghua. !O meha ghu ka mahai varihio ini!’

⁵ “Ghe ira noni neke fanga laoriro manei, e deo gedi ke va ghunaghuna ghu, dike riva ghidi ma ghu ira nodi riva taghodighi. Kehara mu dike lao ka ira nodi nunuma, kehara tuna dike lao ka ira nodi sitoa, dike ghua.

⁶ Ira keha tuna gedi sakomori ghu ira nona noniriva ia mane ginitaukela gedi ngovala va mukori ghu, atunguri harora kehara, dike ghua.

⁷ “Ia mane ginitaukela neke age hali fuludu neke tuhu laoi ghu ia nona punugara, la atungurira ira dike vari atunguro nia la saligaina ia malau leghaha ka maneri, e ghua.

⁸ “Va kahe ghidi tuna ira nona noniriva neke ghua manei, ‘Mahai varigharana varihio ini ka ara mu to va tanai, ghe ira noni nake fanga mehariro ara e deo gedi fata ghu ta mehana.

⁹ O kave lao ghu ka ira leghu pelodi nga ka malau leghaha ani, o la hio mehari haroharo ghu heiri ta la fini fatarira ghau.’

¹⁰ Kave lao tuna mamu, gedi la hio mehari haroharo ghu ira noni ta veha ghe ta muko ghu, dike la fini fatariro, dike ghua. Ia ringifota neke toraina age foudu ka ira noni dike laoro ka mahai varigharana varihio ani.

¹¹ “Ghe, ne la haghele meha ghu ia mane ginitaukela mala dufurira ira noni dike meharo, manei neke finini kaike mane neke deo ge va vona ghonona poko malana varihio ghu.

¹² ‘?Mighei, heve no ghua agho ghe, no meha haghele nga aiahi, ta deo ini go va vona poko varihio ghu?’ neke ghua notohina ia mane ginitaukela. Ghe ia mane, deo ma ghe ge ungene tughui ghu.

¹³ “Va kahe ghidi tuna ira nona noniriva neke ghua ia mane ginitaukela, ‘Piligari kamena, ghahena nira mane iamu, o kai kave laoi ghu peghuruo ka ta nagoromo ani, e la nakele ghu ghani va ghiritina aianimu.’

¹⁴ “Tehini mu ta kudorira, ghe keharau ma ta faeterira, e ghua,” neke ghua Zisas.

Ia Kai Lao Takisi Ka Sisa

¹⁵ Ianimu tuna ghe, dike varighara nga ira Farisi dike vato ghini ghu kaike ghaghahena ta boka mala seke ghini maneri Zisas, e mala kaherira ghu manei keha ngengene ta zea ta mala makutina maneri.

¹⁶ Tuhu laori tuna ka manei kehara ka ira noni ta nonofori taghodi nia keha ta au ka ia pukuna Herodi, gedi la kahe ghua ghu iahi dike ghua, “Mane Vari Va Kakahei Agho, ghai na avohi mo ta noni hohoghouna agho, o vari va kakahe ghini ghu ia hohoghona ta kabai ghini God mala leghuina ira noni. Heve ta va riva ghidira agho ira leghu noni nga mu, e vari fata ma, geta au ghu ka papala heve maneri.

¹⁷ O va kahe ghini ghai ko heve mu nganganauna agho ka iahi: ?E veha mo ta kai lao takisina ghai ka Sisa ia mane ginitaukelana Romu, ba deo?”

¹⁸ Ghe Zisas neto avoho laori nganganadi ta muko ari, neke kahe ghua ghu iahi, “!Ghau ta tatangana kobiri! ?Heve no ghua ghe no kabai seke ghinagu nga ara?

¹⁹ Va podolo vanagu meha ko kunegelena rongo ta mala kai takisi nia,” neke ghua ghidi. Vanani lao tuna kunegelena rongo ani

²⁰ ge notohori ghu, neke ghua. “?Totoghalena nia babaolona hei mu, ta au lao irahi?”

²¹ “Sisa,” dike ghua. “Neto ghua la ianimu, vanani lao Sisa nonara manei nia vanani tuna God nonara God, e ghua.”

²² Di nomohi ghu ungene tughu ani ka manei, maneri dike puina age nodi fere fuludu dito ghahe kaini haro ghu.

Notoho Ghinina Ia Tetuleghu Ka Ia Leme

²³ Ka ravata haro ianimu la, kaike pukuna noni ka ira Ziu ta va kudo ghidi Sadiusi, dike lao ka Zisas dike la notohi ghu manei kaike notoho. (Maneri e deo gedi ke va hohoghonai ghu ta boka ke tetu leghuna ira noni ka ia leme.)

²⁴ “Mane Vari Va Kakahei Agho,” dike ghua ghini, “Mosese neke va kahe ghini ghaina mu, ia mane neto deoi rekaha la neto age leme ghu, ia tahina mane manei ta ke age hioina ia fotati ta lemekai edi boka age nai vanani rekaha ghu maneri palu ia kusu keranau neke lemeo, neke ghua.

²⁵ Kaike fafata, vitu tatahina mane dike aura. Ia ta kusu doli neke varihio, ghe e deo tuuna ma neto ke leme ghu, ke hioi tuna fotati nabokona ani ia va paluna tahina mane, neke ghua.

²⁶ Varifata haroma heve neke dufuna ka ia va paluna tahina mane, ka ia va litona nia ka ira keha tahina mane haroharo e ghua; e deo tuudi haroma dito ke age leme ghu.

²⁷ Va nonoghanana tuna, ge age leme ghu ia fotati nabokona, neke ghua.

²⁸ ?O va kahe ghini ghai meha ghu, keranau hei mo mu manei ka ia ke age tetu leghuna manei ka ia leme? !Vununa manei neke ghaseborodi harono maneri vitu tatahina mane!”

²⁹ “!Ka zeara ghau!” neke ghua ghidi Zisas, “Vununa ghau no deo go avohori ghu ira Kakangava Ta Maduana nia ia mana ka God, e ghua.

³⁰ Vununa dito ke tetu leghu la ira ta leme, e deo ke age varihiodira. Maneri mu taghe ira engizeli ka malauo God fate edi ke age ghua ghatu.

³¹ ?Nga ghinina ia tetuleghu ka ia leme mu: e deo ngama goke izumi ghu ka ira Kakangava Ta Maduana neke kahe ghuano iahi God ka ghau,

³² ‘Ara mu ia God ta va totoana ghini ira faamu meha, ia God ka Ebarahamu, Aesake nia Zekopu,’ neke ghuao? Manei mu e God ghu ka ira ta doli, nga eka ghua ghu ka ira ta leme.”

³³ Di nomohi ghu iahi ira varigharadi noni, dike puina age nodi fere fuludu ka ia vari va kakahei manei.

Ia Ungene Va Gigima Ta Toraina Tongovona Fuludu

³⁴ Di nomohi ghu ira Farisi tato age paufurira Zisas ira Sadiusi ka ira nona ungene tughu, maneri dike age varigharani.

³⁵ Kaike ghu ka maneri ta avoho fikifokoi ia vetula beana, neke va sisiva seke ghini Zisas ka notoho iahi:

³⁶ “?Mane Vari Va Kakahei Agho, hae mo mu ungene va gigima ta toraina tongovona fuludu laona ka ia vetula Mosese?” neke ghua ghini.

³⁷ Ungene tughui tuna neke ghua Zisas, “ ‘O toraina namaha ghini ia Lod ia nou God ka ia hihingou kamoto, ka ia tarungau kamoto nia ka ia nganganau kamoto.’

³⁸ Iahi lamu ungene va gigima ta toraina kenuna nia ta toraina tongovonana.

³⁹ Va paluna ungene va gigima ta toraina tongovonana mu taghe iala e ghua molamo: ‘Taghe taghou la o ghua namaha ghinina ia keha noni taremehau,’ e ghua.

⁴⁰ Ia kamotona vetula ka Mosese nia ira vari va kakahei ka ira porofeti e ghua mu, edi va dedeke ka palu ungene va gigima irahi.”

Ia Notoho Ghinina Ia Mesaea

⁴¹ Di au varighara ngama ira Farisi, neto notohori ghu Zisas:

⁴² “?Heve mu nganganamuna ghau ghinina ia Mesaea? ?Tuuna hei mo mu manei?” “Manei mu tuuna Deveti,” dike ghua ghini.

⁴³ “?Heve neke ghua ghu Deveti ghe, neke va kudo ghini Lod nga manei, kaheina ka ia Tarunga Ta Maduana? Vununa Deveti neke kahe ghuao iahi,

⁴⁴ “ ‘Ia Lod neke kahei ka ia nogu Lod, Nohe aiahi ka kame mautugu ini mo a vuhai age nairi ghu ara ira ta nodi kana agho ka pekadi tabalau nira.’

⁴⁵ ?‘Lod’ neto ke ghua la Deveti ta va kudo ghinina manei, heve e ghua ghe, ge ke age Tuuna nga Deveti mu ia Mesaea?”

⁴⁶ E deo ma kaike ghu ka maneri neke boka ungene tughuina Zisas. Leghuna ianimu, e deo kaike noni ghu neke notohinani manei keha notohorani.