Matiu 15 - Ia Foforuna Naiungene

Ira Vetula Ka Ira Mane Babatu Ka Ira Ziu Dike Hio Va Zeari Ira Noni, Dike Huhughi Ghu Ia Nona Vetula God

¹ Keha Farisira nia ira ta vari va kakahei ghini ia vetula beana e ghua, dike la sipa mehadi Zerusalemu mala meha notohina Zisas.

² “?Heve di ghua nou mane ta nonofoigho nira agho, ghe di huhughuri nga ira doli sepa ka ira faada meha? Maneri deo ma gedi kusu titihi kame ghu, edi mahai ghu.”

³ Zisas neke ungene tughuri, “?Nga heve no ghua ghau ghe, no huhughi nga ia ungene va gigima ka God, no leghuri ghu nomu vari va kakahei nira taghomu?” neke ghua ghidi.

⁴ “Taghe iahi la; God neke kaheina mu, ‘O heluhelu ghidi nou mama ghe nou uke,’ nia ‘Hei ia ta ungene va mukori nona mama ghe nona uke mu, e toraina mala va lemei,’ neke ghua.

⁵ Ghe no kaheina ghau mu, ia noni e boka va kahe ghidi mo nona mama ghe nona uke, ‘Ara na kuru au mo keha leghutau ta boka mala toka ghini ghauna, ghe ara nato ke vanani lao God.’

⁶ Ghau no va kakahe ghini noni ianimu taka va vonavonarina ghu nona mama ghe nona uke. Ghau no sokei ghu heve neke kaheio God no leghuri ghu ira nomu vari va kakahei taghomu.

⁷ !Ghau ta tatangana kobiri! Aesaea to kusu kahe kenu ghua iahi ghini ghauna ghau,

⁸ ‘Noni irahi mu di heluhelu ghinagu ara ka ira ngengenedi, nga ira hihingodi mu, toraina varihau ghedi ma ka ara.

⁹ Ia va totoana ka maneri mu, e deo lighorona ma, vununa maneri di holarari ira ungene va gigima ka God ka ira nodi vari va kakahei taghodi noni.’ ”

¹⁰ Ianimu tuna ghe neke kudo varighara ghidi lao nga ka taghonai Zisas ia varigharana noni neke kahe ghua ghu iahi, “O va melongo meha ka ta kaheri irahi ara, o va sisiva va fafahakari ghu.

¹¹ Eka ghua ghu ia ta haghele lao ka ia paetena ia noni mu, ta va sotaina manei; nga ia ta la kave meha ka ia paetena mo mu, ta va sotaina manei.”

¹² Ke la meha tuna ka Zisas gedi la notohi ghu dike ghua ira mane ta nonofoi, “?No avohi mo agho mu, ta zea vanadi ari ira Farisi ka heve noke kaheriro agho?” dike ghua ghini.

¹³ Zisas neke ungene tughuri, “Leghu heke neke deoro ge numa ghidi ghu nogu Mama ia ta au fate, e mala age huba kai vonari ka ira zagharadi,

¹⁴ oka va ghunaghunari la ghu. Maneri mu ira noni babatu ta kivi ta babatu ghidi ira keha ta kivi. Ia mane ta kivi neto batu ghini la ia keha ta kivi, maneri palu haro, edi age riufu lao haro ghatu ka giliona kaike golava.”

¹⁵ Notohi tuna Zisas neke ghua Pita, “O va fafahaka vanamai ko ia ungene talevara,” neke ghua ghini.

¹⁶ “?E deo ngama go va fafahaki ghu ghau?” neke ghua ghidi Zisas.

¹⁷ “?E deo go avohi ghu ghau mu, ia ghano ta haghele lao ka ia manga mu, e lao ka ia kokoilo, ghe ge ke kave leghu nga ka ia tini, ta ghuana?

¹⁸ Nga ira ngengene ta muko ta la meha ka ia manga mu, e la sipa meha ka ia hihingo. Iranimu lamu ta va sotaina ghu mu ia noni.

¹⁹ Vununa ka ia hihingo lamu, ta la mehara mu ira ngangana ta muko, ta age au ghu ia vari atungu, ia vari zave kunu ka ira ta varihio, ira keha ghaghahedi kutu, ia sisiko, ia sesebo, nia ia turi ghidi va muko ira keha noni, e ghua.

²⁰ Irahi mo mu ta va sotaina ia noni. !Nga ia ta deo ge titihi ghu ta mahai ghu mu, e deo ge age va sotai ghu ia noni!”

Ia Va Hohoghona Ka Ia Fotati Taka Ziu Ghu.

²¹ Zisas neke ghahe kaini Galili neke ghahe vai lao ghu pelovona mo ka ia kobosona gheremedi ira palu malau leghaha Taea nia Saedoni, e ghua.

²² Kaike fotatina Kenani taka Ziu ghu ta au aianimu, neke la meha ka Zisas neke toraina meha kudo ghu, “!Dudumana ghinagu Lod, agho ia Tuuna Deveti! Ia tuugu ghase ara ne sukui nazahi ne toraina au vavahagala ghu.”

²³ Ghe Zisas e deo ghe ge kahe laoi ghu kaike ngengene tei ghu ka manei. La meha tuna dike ghua ira nona mane ta nonofoi, dike la papadi ghu, “Va ghahei fotati iamu, vununa manei ne puina meha kudokudo leleghu ghita.”

²⁴ Ungene tughui tuna ia fotati neke ghua Zisas, “Ara mu neke tuhu mehau mala toka ghidi ma ira noni Isiraeli lama. Maneri mu taghe ira sipisipi tato ghahe va zea, dito ghua.”

²⁵ Ghe manei neke la torongaghituturu ka kenuna Zisas neke la papadi ghu, “!Lod, o toka ghinagu ko!” neke ghua ghini.

²⁶ “E deo ge fafahaka ghu ta hiorira ira ghedi ghano ira rekaha, ta kai vanadi laona ghu ira meusu,” neke ghua ungene tughuna Zisas.

²⁷ “E hohoghona mamu ianimu Lod,” neke ghua ungene tughuna ia fotati, “ghe ira meusuna nga, di mahairira ira furongodi ghano ta zoghu hinae ka ia tevo ia manefaadi,” neke ghua ghini.

²⁸ Va kahe ghini lao tuna neke ghua Zisas, “!Agho mu kaike fotati ta auigho leghahai va hohoghona! Heve ta kabai ghini nia agho mu, e age vananigho ghu.” Selu laoi ma ianimu, neto ke age veha ghena ghu ia tuunaghase.

Zisas Ne Va Vehari Tehi Noni

²⁹ Zisas neke kave leghu aianimu neke ghahe leleghui ghu ia tapuruna Lokana Galili. Ianimu tuna ghe neke la pauku vona nga ka kaike voruhu, neke la nohe hinae ghu.

³⁰ Leghahai varigharadi noni dike la mehara ka manei hio meharira ira noni ta paheku, ta kivi, ta peleku, ta melu ngengene, nia keha tehidirani, e ghua. Maneri dike la va epu hinaeri ka kenuna Zisas, neke va vehari haro ghu manei.

³¹ !Ira noni dike puina age nodi fere fuludu ka ia age finiri maneri ira noni ta melu ngengene ke age ngengenedira, ira ta peleku ke age kamoto leghudira, ira ta paheku ke age ghaghahedira, ira ta kivi ke age vovoho fifinidira, e ghua! Maneri dike age helahela ghini ghu ia God ka ira noni Isiraeli.

E Fuludi Rodana Togha Noni Ne Valiharira Zisas

³² Zisas ne kudori ira nona mane ta nonofoi, neke kahe ghua ghu iahi, “Ara na toraina dudumana ghidi ghegu ngama noni irahi. Maneri dito ke meha au tagu lito ravata, to deo ghu heve tadi mahainina. Ara e deo ga kabai ghini ghu ta nodi lihana ma maneri ta tuhu ghaherina ghu, vununa ghatu edi la kudoko ke ghahe vai leghudira ka sugadiro.”

³³ Ungene tughui tuna dike ghua ira nona mane ta nonofoi, “?Hae mo ka malau koroghana ta karango iahi mu, ta boka hio ghano ta fatai mala valiharira ghita varigharana noni iahi?” dike ghua ghini.

³⁴ “?Niha bereti tetepele ne kuru ghauna ghau?” neke ghua ghidi Zisas. “Vitu ghu, nia keha rekahadi namari, e ghua,” dike ghua ghini.

³⁵ Va kahe ghidi tuna ira noni haroharo, ta nohe hinaena ka kava ani, neke ghua Zisas.

³⁶ Ianimu tuna ghe, neke hiori nga Zisas ira vitu bereti, nia ira namari e ghua, neke kudo vehai ghu God; kipekiperi tuna ge vanadi lao ghu ira nona mane ta nonofoi, gedi tufari ghedi ghu ira tehi noni, dike ghua.

³⁷ !Maneri haroharo dike mahai ghedi dike age hoviri ghu. Leghuna ianimu, ira mane ta nonofoi dike sene va fouduri vitu leghahai maka ka ira ghano dike kunuro!

³⁸ Rodana togha mane dike mahaira ka ravata ianimu, deona ge tahori ghu ira fotati nia rekaha, e ghua.

³⁹ Leghuna ianimu, Zisas neke tuhu leghuri ira noni ka sugadiro, ghe neke la haghe nga ka kaike koaka, neke kadolo lao ghu ka ia kobosona Magadani.