Maki 7 - Ia Foforuna Naiungene

Ira Puhi Mala Leghuri Ka Ira Farisi Neke Batu Ghidi Va Zea Ira Noni, Dike Huhughi Ghu Ia Vetula Ka God

¹ Kaike ravata, keha Farisira nia keha mane ta vari va kakahei ghini ia vetula ta maduana ka God, dike sipadi Zerusalemu dike meha au lilohi ghu Zisas mala meha nonomohona.

² Maneri dike finiri kehara ka ira mane ta nonofoi Zisas, dike deo gedi leghuri ghu ira puhi ta mala leghuri ka ira noni Ziu, e kusu titihi kamena ghe ge mahai nga, ia ta ghua.

³ (Ka ira noni Ziu, sughavona ghu ira Farisi mu, edika mahai ghu, edi vuhai tihiri ghu ira kamedi, taghe leghurira ira nodi puhi sepa.

⁴ E ghua haro molamo ira mahai ta la tabarari maneri ka ia makete. Edi toraina kusu tihiri tudu ma ira kamedi ghe, gedi mahairi nga. Nia tehi puhini dike leghuri harona, taghe ira ghaghahedi mala titihi panikeni, raro, disi nia ketolo, e ghua.)

⁵ Notohi tuna Zisas dike ghua ira Farisi nia ira mane ta vari va kakahe ghini ia vetula ta maduana ka God e ghua, “?Heve di ghua nou mane ta nonofoigho nira agho ghe, dika leghuri nga ira puhi sepa ka ira faada, ta deo idi gedi kusu titihi kame ghu ghe, gedi mahai nga?”

⁶ Zisas neke ungene tughuri, “!Ghau ta tatangana kobiri! Heve neke kaheio God ka porofeti Aesaea ghini ghauna ghau sepao mu, ne hohoghona mamu ka neke kaheio iahi manei,

⁷ ‘Noni irahi edi heluhelu ghinagu ara ka ira pepeudi, ghe ira hihingodi mu edi varihau ka ara. Ira va totoana ka maneri e deo fafahakadi ma, vununa di holari ia nogu vetula, ka ira nodi puhi mala leghuri ta va vuhari taghodi,’ ia ta ghua.

⁸ Ghau no nai kairi ira ungene va gigima ka God, no leghuri ma ghu ira nomu puhi sepa taghomu.”

⁹ Ke kahe ghuani tuna iahi ka maneri neke ghua Zisas, “Ghau no puina avohoa ghini ta sokerira ira ungene va gigima ka God, mala go leghuri mo ira nomu puhi sepa taghomu, no ghua.

¹⁰ Taghe iahi la. Mosese neke vanamu vetula iahi ka God ia ta kahe ghua iahi: ‘O heluhelu ghidi nou mama ghe nou uke,’ nia ‘Hei ta ungene va mukoina nona mama ba nona uke mu, e toraina mala va lemei,’ ia ta ghua.

¹¹ Ghe no kaheina ghau mu, ira noni e veha mo ta kahe ghuana iahi ka nodi mamari nodi ukeri no ghua, ‘Dudumana faana, ara e deo boka toka ghini ghauna ghatunaina, vununa heve malamu ghau nake ghua ghidira ara mu, nato ke va bebereana ara ta mala vananina God’ no ghua.

¹² Ghau no va malumuri ira noni, taka va ghunaghunarira ghu ira nodi uke nia ira nodi mama ta malanga.

¹³ Taghe ianimu ghu mu, ghau noto age huhughi ia vetula ta maduana ka God, mala go suteri mo ira nomu puhi sepa taghomu, no ghua. Kaike mo mu iahi ka ira va zezea ghau, nga tehidira mu edi au mo.”

¹⁴ Ianimu tuna ghe neke kudo laoni nga Zisas ka ia varigharana noni, ta mala la nonomohona maneri. “Ghau haroharo o va melongo meha ka ara, o va sisiva va fafahaka ghu,” neke ghua ghidi.

¹⁵ “!Eka ghua ghu ia ta mahaini agho mu ta va sotaighona agho, nga ira ta kaheri nia riva ghidi agho mo!”

¹⁷ Ianimu tuna ghe neke ghahe kaini nga Zisas ia varigharana noni, neke la haghele ghu ka ia suga, dike la notohi ghu ira nona noni ta nonofoi, taghe heve fafahakanana ia ungene talevara, neke kaheino manei.

¹⁸ “?E deo haro ngama go va fafahaki ghu ghau?” neke ghua ghidi. “?E deo go avohi ghu ghau mu, ira heve ta mahairi ghau, eka va sota ghau ghu, ta ghuana?

¹⁹ Ghano mu eka susugoro lao ghu ka hihingomu nira, nga e haghele leghui ma ia sughaha nia ke kave ma, e ghua.” (Zisas neke kahe kavei ta fatana ka mala mahai leghu ghano nga, ghe neke kahe ghua nga iahi.)

²⁰ Neke kahe ghuani iahi Zisas, “Heve ta kave mehana ka hihingou nia mo mu, ta va sotaighona agho.

²¹ Vununa ia ta sipa meha gilio ka ia hihingona noni mu, ta la kave mehara taghe ira ngangana ta muko, ia zave peghuruna varihio, sisiko, vari atungu,

²² ia zave kunui keranau, ngagungagui leghutau, ngongovala, sekesekei, kikirase, kulukulu, va vuvuha turi, hadu varanga, nia kingo, e ghua.

²³ Leghu muko irahi nga mu, edi sipa meha gilio ka ia hihingona ia noni; irahi mo mu ta va sotaighona agho, ta deona ghu God ge boka hioigho ghu.”

Ia Nona Va Hohoghona Ia Fotati Taka Ziu Ghu

²⁴ Ianimu tuna ghe dike ghahe kaini nga Galili, Zisas nia ira nona mane ta nonofoi e ghua, dike ghahe vai lao ghu pelovona mo ka ia hori ta au ia malau leghaha Taea. Manei neke haghele ka kaike suga, ghe e deo ge kabai ghini ghu hei noni ta avohina ne au aianimu manei, ta ghuana, ghe manei neke deo ma ge boka poika ghidi fuludai ghu ira noni.

²⁵ Nga magali ma neto ke la meha ghu kaike fotati neke sukuio ia tuunaghase kaike tarunga ta muko. Manei neke nomohi ia nonomohona Zisas, neke la riufu maimanihi hinae ghu ka ira ghahena.

²⁶ Fotati iahi neke papadi Zisas ta tavusu kainina ia nazahi, ka ia nona rekaha ghase. Vununa fotati iahi mu eka Ziu ghu, nga neke doli aianihi Fonisia ka ia Babarana Siria,

²⁷ neke kahe ghua ghu iahi Zisas ka manei, “Ara geala a kusu toka ghinina nga ira nogu rekaha, ira Ziu. E deo ge veha ghu ta hiorira ira ghedi ghano ira rekaha, ta kai laorira ghu ka ira nodi meusu,” neke ghua ghini.

²⁸ Ia fotati neke ungene tughui “Faghina agho, ira meusu papausuna nga ka ia pekana tevo ghe, di vanadi forokudi mahaikai nga ka ira peleita ira rekaha.”

²⁹ “!Vehana ungene tughu!” neke ghua Zisas. “Vununa ka ia nou va hohoghona taghou, oto ke leghu gheu ma ghu ka sugauo. Ia nazahi neto kave kaini ia tuu ghase,” neke ghua ghini.

³⁰ Ne la dufu ghu ia fotati ka ia nona suga, ia nona rekaha ghase neke epu vanemoho ma neke au ghu ka ia vavagena, nga ia nazahi mu neto ke kave kaini manei.

Zisas Neke Va Vehai Ia Mane Ta Melongo Ta Gimai Ngengene

³¹ Zisas neke ghahe kaini Taea neke lao ghu Saedoni, ghe neke leghu nga ka ia Lokana Galili, ghahe vai laona ka ia hori ta au ira Tazo Malau Leghaha.

³² Keha nonira dike hio mehai ka Zisas kaike mane ta melongo, ta gimai ngengenena, dike papadi ghu ta posinina manei, mala ke va vehai ghenana.

³³ Zisas neke hio hazai ia mane ka ira varigharana noni, ghe neke la va suku laori nga ira palu kilona ka ira talingana. Ianimu tuna ghe neke kamusuri nga ira kilona taghonai Zisas, neke posi laoi ghu ia lalamena ia mane.

³⁴ Mato vona tuna ka kolangana fate, ge hingo kai ghu neke ghua manei, ghe neke kahe ghua nga iahi ka ia mane, “!Efata!”, fafahakanana mu “!O tobehe!” e ghua.

³⁵ Ianimu lama neto ke toraina nonomoho va veha ghu ia mane, nia ia lalamena geto ke sasalaha ghu ke toraina ngengene va vevehana, neke ghua.

³⁶ Zisas neke ungene va gigimari ira noni ta varighara, taka turi ghinina ghu ka hei noni ghinina iahi. Ghe e kahe ghidi ghu manei, ianimu tuna ghe gedi suufu laoni nga tuna, va ongahina ia tuturi.

³⁷ Maneri dike toraina nodi fere fuludu, dike kahei ghu iahi, “Vahina riva ta riva ghidi irahi nga manei mu, toraina namanama fuludu ma. Ta va veharidi ghe manei ira ta melongo, nia ira ta melu ngengene.”