Maki 3 - Ia Foforuna Naiungene

Ira Farisi Dike Vato Ghini Va Lemeina Zisas, Vununa Manei Neke Va Vehai Ia Kamena Kaike Mane Ka Ia Ravata Mala Maghoso Ira Ziu

¹ Zisas neke lao leghuni ka ia suga mala varighara ira Ziu, neke la finini ghu kaike mane ta peleku ia kamena.

² Kehara ka ira Farisi ta kana ghini Zisas, dike mato dodoghohoti manei, geke va vehai la ia kamena ia mane ka ia Ravata Mala Maghoso ira Ziu, dike ghua. Neto riva ghini la ianimu manei, maneri edi age va ghuduvi ia nodi vatovato mala makutina, vununa manei neke riva ka ia Ravata Mala Maghoso.

³ Zisas neke kahe ghua iahi ka ia mane ta peleku ia kamena, “Meha, o tetu ghu aiahi ka kenumaidi ghai haroharo,” neke ghua ghini.

⁴ Zisas neke fihiki leghu ka ira noni dike turi va mukoio taghonai, neke notohori ghu, “?Heve, ne leghui mo ia vetula ta maduana ka God, ta mala riva ghidira ira leghutau ta veha ka ia Ravata Mala Maghoso, ba, ravata iahi mu mala riva ghidi ira puhi ta muko? ?Heve, ravata iahi mu mala hio va dolini ia noni ba, mala va lemei ia noni?” Ghe ira Farisi dike pake ghedi ungene tughuina.

⁵ Zisas neke mato liloho laori ka ia hali ghena, vununa neke va muko hihingoi fuludu ira nganganadi ta puina kaputu. Ianimu tuna ghe neke kahe ghua nga iahi Zisas ka ia mane, “O va tuhu kavei kameu nia,” neke ghua ghini. Va tuhu kavei tuna ia kamena geto ke age veha ghena ghu neke ghua ia mane.

⁶ Ka fafata ianimu lama dito kave ghu ira Farisi, la holara taremehadira ira ta zuka toka ghinina Herodi Anitipasi ia Mane Ginitaukela, mala va puhinina, ta va lemeina ghu Zisas.

Ira Tehi Noni Dike Leghui Zisas

⁷ Zisas nia ira ta nonofoi e ghua, dike ghahe vai kave lao ka ia Lokana Galili, dike leghuri ghu ira tehi noni ka ira sare kobosodi ka ira Babaradi Galili, nia Zudia,

⁸ ia malau leghaha Zerusalemu, ka Babarana Idumia, nia sipa mehadi ka ia hori fateo mo ka ia Ketuhuna Zodani, e dufu hauai lao ghu ka ia hori ta lilohori ira malau leghaha Taea nia Saedoni, e ghua. Ia nonomohodi ira neke riva ghidiro Zisas, to puina ongaha varihau ka boka ghu, dike meha ghu ira tehi noni, dike torai meha fini hibadi ghu taghodi ka Zisas.

⁹ Vununa ira noni dike puina tehi fuludu, neke va kahe ghidi ghu Zisas ira nona mane ta nonofoi, ta va tana vananina kaike koaka, mala la nohena ka taghona gilio, mala ia varigharana noni e deo ghu boka vari tutupi namo laona ka manei.

¹⁰ Tehi nonini neke to kusu va dolirira Zisas ka ravata ianimu. Neke ghua mamu ghe, dike meha nga ira tehi noni ta fogarari, dike meha au lilohi ghu, vari titiulu vai kenu mala la posinina Zisas.

¹¹ Leleghu fafata ira noni ta sukuri tarunga ta muko, edi fini fata laoi ghu Zisas, edi la riufu maimanihi hinae kenuna manei, gedi kudo va gigima nga, gedi kahei ghu, “!Agho mu ia Tuuna God!” ta ghuana.

¹² Ghe Zisas neke kahe ghidi va gigima taka kaheina ghu maneri, hei mo mu taghonai ta ghuana.

Zisas Neke Faeteri Ira Tazoi Palu Mane Nonomoho

¹³ Leghuna ianimu, Zisas neke vona lao ka kaike tabafena vuhuku, ghe neke kudori nga ira ta kabai ghidi taghonai ta mala leghuina, dike la meha ghu maneri ka manei.

¹⁴ Ianimu tuna ghe neke faete kaveri nga tazoi palu mane ka maneri, neke va kudo ghidi mane nonomoho ghu, mala leghui tuduna, e boka tuhu kaveri ghu ta mala la tuturi beana ghinina ia nonomohona God.

¹⁵ Manei neke vanadi haro ghu ia mana ka God, ta mala tavusu kairira ira nazahi.

¹⁶ Irahi ghu mu babaolodira ira tazoi palu mane neke faeteriro manei: Saemoni (Zisas neke holari ia babaolona, neke va kudo ghini Pita ghu),

¹⁷ Zemesi ghe Zone (ira palu tuunamane Zebedi, ghe Zisas neke va baolo ghidi “Ira Tuunamane Ia Saduru”),

¹⁸ Aduru, Filipi, Bafolomiu, Matiu, Tomasi, Zemesi (ia tuunamane Alofiasi), Tadiasi, Saemoni (ia mane Zeloti) nia,

¹⁹ Zudasi Isikarioti (ia neke namaha seboio Zisas).

Ira Mane Babatu Dike Va Zutu Ghini Zisas Ta Mala Rivana Manei Ia Mana Ka Belezibolo

²⁰ Ka ia fafata ke leghu laona Zisas ka ia suga neke auio manei aianihi Kapaniumu, ira tehi noni dike varigharani, to deori ghu ghe fafata ta boka mala mahaina manei nia ira ta nonofoi, e ghua.

²¹ Di nomohi ghu ianimu, nona uke nia ira tahina e ghua, dike kaheina, “Manei neto gogosu,” dike ghua ghini. Ghahe kaini tuna Nazareti gedi ke lao ghu Kapaniumu mala ke la va sisiva hio suraina, dike ghua.

²² Ghe ira mane ta vari va kakahei ghini ia vetula ta maduana ka God, dike sipa meharo Zerusalemu dike kaheina mu, “Zisas mu to sukui Belezibolo, ia faghinadi ira nazahi, ne mala riva ghu manei ia mana ka Belezibolo, mala tavusu kairira ira nazahi ka ira noni,” dike ghua.

²³ Zisas neke kudori ira noni ta namo mehana ka taghonai, neke turi vanadi ungene talevara ghu. Zisas neke kahe ghua ghu iahi, “?Mala heve e ghua Satana ghe, ge tavusu kairi nga ira nazahi ta riva vanani taghonai ka ira keha noni?

²⁴ Dito vari magara la ira noni ta au ka kaike ginitau mo, e deo gedi boka age tetu ghu.

²⁵ Dito vari magara la kaike butubutu mo, e deo molamo ge boka age tetu ghu ia butubutu.

²⁶ Nia e varifata ma, neto magari la taghonai ia malau ka Satana, ka vari hoataidi taghodi ira nazahi. Ianimu ia mana ka Satana, ia paudi ira sare nazahi, e age nogha.

²⁷ A ke va fafahakini ara iahi ka keha va ghaghaonani. E deo hei ta boka haghelina ia sugana ia mane ta gigima, ta mala la sikoina ghu, nga noni ianimu e kusu piligaina nga noni ta gigima ianimu. !Ka fafata ianimu ghe, ge boka nga ta la sisikona manei, ka ia sugana!”

²⁸ “Uve, ianimu lamu ghe, na boka tavusu kairi nga ara ira nazahi ka ira noni. Puina hohoghona fuludu ta va kahe ghini ghau ini ara, God e age kai hazari vahina sasake nga nia vahina lausasaba nga e ghua, ta kaheri ira noni.

²⁹ Nga heiri ira ta ungene va mukoi ia Tarunga Ta Maduana mu, edi auri ia sasake ia taka boka kai hazai ghu God. Sasake iahi mu e au toghunai.”

³⁰ Ghe neke va kahe ghidi nga iahi Zisas mu, vununa ira mane babatu dike kaheina, manei ne sukui tarunga ta muko, dike ghua ghini.

³¹ Ianimu tuna ghe, dike la dufu nga nona uke nia ira tahina mane e ghua Zisas, ka ia suga neke la vari va kakaheio manei. Maneri dike la tetu ma peghuru, dike va ghahe ghini lao ngengene ghu, mala kave mehana manei ta turi taremehadina ghu.

³² Kehara ka ira tehi noni dike nohe lilohio Zisas, dike kahe ghua iahi, “Nou uke, ira tahiu mane, nia ira tahiu ghase e ghua, ta au ari peghuru. Di kabai finigho agho,” dike ghua.

³³ Ghe Zisas neke ungene tughuri, “?Hei mu nogu ukena nia tahigu manera, e ghua ara?”

³⁴ Manei neke matori ira nona noni ta nonofoi ta nohe lilohi taghonai, ghe ne kahe ghua nga iahi, “Irahi mo mu nogu ukena nia tahigu manera ara.

³⁵ Hei ia ta riva ghini ia lao hihingo ka God mu, ta tahigu manena, tahigu ghasena, nia ta nogu ukena ara.”