Maki 15 - Ia Foforuna Naiungene

Paelati Ia Gavana, Neke Notohi Zisas

¹ Ka ia torai fufughona, ira hiama ta kenu dike magali hio haedu taremehadi ira keha mane babatu, nia ira ta vari va kakahe ghini ia vetula ta maduana ka God ta au ka ia Nonohe Faghina kamoto ira Ziu e ghua, dike vatovato ghini ghu heve dike mala riva ghinina. Maneri dike piligai Zisas, ghe dike hio laoi nga ka Paelati ia mane gavanana Romu.

² Paelati neke notohi Zisas, “?Agho lamu ghu mu ia mane ginitaukeladi ira noni Ziu?” neke ghua ghini. “Uve, to kahei nia lamu agho,” neke ghua Zisas.

³ Ianimu tuna ghe, dike makuti nga Zisas ka tehi leghutauni, ira hiama ta kenu.

⁴ Ke notohini tuna neke ghua Paelati, “?E deo go ungene tughu ghu agho? ?Nomohi ko ta makutigho ari maneri ka tehi leghutauni?”

⁵ Ghe Zisas e deo ma neke kaheina, neke puina nona fere ghu Paelati.

⁶ Ka leleghu Mahai Varighara Va Manemanena Ia Ghahe Fuludu, ia gavana e va kavei tudu ma kaike noni ta au ka ia pipiliga, ta fanga kavei ira noni.

⁷ Kaike mane pipiliga ka fafata ianimu, babaolonana Barabasi, dike sakomi haro, vununa neke vari atungu taremehadi kehara, ka ia fafata magarari ira nonidi Romu maneri.

⁸ Ira tehi noni dike to tatanigai rizu haghele lao ka Paelati, dike la fangai ghu ta va kaveina kaike noni pipiliga, taghe neke fani ghua tuduo lama manei.

⁹ “?A vanamu ia mane ginitaukeladi ira Ziu, no ghua?” neke ghua notohorira Paelati.

¹⁰ Paelati neke to age avohi tuna, dike sakomina Zisas ira hiama ta kenu vununa dike kakabai ghini.

¹¹ Ghe ira hiama ta kenu, dike va hugahugai ia varigharana noni ta fangaina Paelati, mala va kave vanadina ghu Barabasi mo, nga eka ghua ghu Zisas.

¹² “?Nato va kavei la ara Barabasi, heve ghu ta va riva ghinina ara ia mane ginitaukeladi ira Ziu, ta ghua ghini iahi ghau?” neke ghua notohorina Paelati.

¹³ “!Tupila ghini ka hekefalahata!” dike ghua ke kudo leghu laodira.

¹⁴ “?Ne heve nga?” neke ghua Paelati. “?Heve mo muko neke riva ghinina manei?” Ghe ia varigharana noni di kudo va fafaa laoni tuna, “!Tupila ghini ka hekefalahata!” dike ghua.

Ira Mane Magara Dike Puruasimini Zisas

¹⁵ Paelati, ka ia kabai hadu veha ka ia varigharana noni, neke va kave vanadi Barabasi mo. Ianimu tuna ghe neke va kahe ghidi nga ira nona mane magara, ta mala puruasiminina Zisas, ka ia mala vari bota ta aeana ira va kukurudi. Vanadi lao tuna Zisas ka ira mane magaradi Romu neke ghua Paelati, mala tupila ghinina ka hekefalahata.

¹⁶ Ira mane magara, dike hio laoi Zisas gilio ka ia tatalana ia sugana gavana ta babara liloho, ta va kudo ghini Piritoriumu, ghe dike kudoi nga ia pukuna mane magara kamoto.

¹⁷ Maneri dike va poko ghini lao ia poko sodu ta omoꞌomo, taghe tau ka ira mane ginitaukela ia ta ghua, ghe dike riva ghini nga ia tarapae ta fifihu ka lolozo, dike nakai laoi ghu ka ia belehuna Zisas.

¹⁸ Ianimu tuna ghe, dike tataniga kudokudo lao nga ka Zisas, “!Ia doli soduai mu nou Agho ia Mane Ginitaukeladi ira Ziu!” dike ghua lao,

¹⁹ ghe dike va ruza ghini heke nga ia belehuna, dike kamusi ghu. Torongaghituturu tuna dike ghua, va totoana ghinina ka ia velavela.

²⁰ Ka ia fafata tato age baelu ghedi vela ghinina, maneri dike hio kai tana ia poko sodu ta omoꞌomo, ghe dike va vona vanani leghu lao nga ira nona poko taghonai. Ianimu tuna ghe, dike hio ghahei nga, mala la tupila ghinina ka kaike hekefalahata.

Ira Mane Magara Dike Tupila Ghini Zisas Ka Ia Hekefalahata

²¹ Ka ia ghahe ta lao ghu ka ia hangana, maneri dike dufui kaike mane babaolonana Saemoni, neke sipa mehana ka ia malau peghuruo, neke haghele meha ghu ka malau leghaha ini. Ira mane magara dike papadi manei, ta hureina ia hekefalahata ka Zisas. Saemoni mu tanina ka ia malau leghaha Saerini, e nodi mama ghu Alekesada ghe Rufusi.

²² Maneri dike hioi Zisas dike lao ghu ka ia malau ta va kudo ghini Gologota, fafahakanana mu “ia Malauna Pau”, e ghua.

²³ Ianimu tuna ghe dike vanani waeni ta heni taremehana mereseni ta va kudo ghini maa nga, mala va maghoso vavahagalana, ghe manei neke pake ghini ghena.

²⁴ Nia maneri dike tupila ghini ka kaike hekefalahata, dike hiori ghu ira nona poko, dike hilava ghidi ghu ka hilava daesi ta feferai, mala fininina poko hae mo, ta mala hioina hei, ta ghuana.

²⁵ Ka nakele leghaha ghu ka ia fufugho dike tupila ghinina Zisas maneri ka ia hekefalahata.

²⁶ Kaike takifi ta kuru kakangavana, ta kahei neke heve ghe dike tupila ghini nga aianimu, ia ta ghua, dike va kapata laoina ka ia hekefalahata fatena ia belehuna Zisas. E ghua ghu iahi heve neke au laona, “Iahi mu ia Mane Ginitaukeladi ira Ziu,” e ghua lao.

²⁷ Ira mane magara dike tupila ghidi molamo palu mane ta muko puhidi ka palu hekefalahata, ka ia mautuna mo nia ka ia mairina mo Zisas.

²⁹ Ira noni dike ghahe fuluduro dike dokadoka, ghe dike kudo lao nga vela ghinina, “!Ahaa, no avohi tuna gheuna! !Agho mu noke mala pae hinae ia Ringifota ta Maduana ka God, nia ke va tetu leghui tuna ka giliona lito ravata e ghua, noke ghuao!

³⁰ !O hio va doligho tuna taghou, o hinae meha ghu ka hekefalahata nia!”

³¹ Ira hiama ta kenu, nia ira ta vari va kakahe ghini ia vetula ta maduana ka God e ghua, dike vela ghini haroma Zisas ka vari hoataidi taghodi, kahe ghuana iahi, “!Manei mu e hio va doliri ma ira keha noni, nga e deo ge boka hio va dolini ghu taghonai!” dike ghua ghini.

³² “!Va leghu ghini, da finini ghu taghonai mu ia Mesaea nia Mane Ginitaukelana Isiraeli neke ghuao, ta hinae mehana ka hekefalahatana, da va hohoghonai ghu!” dike ghua. Ira palu mane dike tupila ghidiro ka ira nodi hekefalahata taremehana Zisas, dike ungene va mukoi haroma manei.

Ia Leme Ka Zisas

³³ Ka ia hoatai ravata e dufu ghu ka nakele lito ghu, ia malau kamoto aianimu neke age nagoromo.

³⁴ Ka nakele lito ghu, Zisas neke kudo va fafaa, “?Eloi, Eloi, lema sabakatani?” fafahakanana mu, “?Nogu God, nogu God, heve no ghua ghe, no ghahe kaiau nga?” e ghua.

³⁵ Di nomohi ghu iahi ira dike tetu vari namoro, maneri e deo gedi ke va fafahaki ghu, dike kahe ghua ghu iahi, “!Nomoho lao ko, manei ne kudoi Ilaiza ia porofeti!” dike ghua.

³⁶ Kaike ghu ka maneri neke purudu lao, neke la va luduri ghu ia pusu ka ia waeni ta minga, ghe neke va tuhu vanani vona lao nga ka kaike heke, mala va ketuhina Zisas. “!Nainina da afa ghu! !Da fifinina ge la meha la Ilaiza ghatu, mala hio hinaeina manei ka hekefalahatana!” neke ghua.

³⁷ Ianimu tuna ghe, neke nakele va fafaa nga Zisas, neke hingo kaini ghu ia va nonoghana dafe.

³⁸ Ia poko riringi leghaha ta tuta, ka ia Ringifota ta Maduana God neke reku fota palu tataniga fate zalupu ghu peka.

³⁹ Kaike mane ta babatu ka ira mane magaradi Romu, neke tetu tala lao ka manei. Ne finini ghu ia ghaghahena leme ka manei, neke kahe ghua iahi, “!Torai hohoghona mamu ngaini, mane iahi mu neke torai Tuuna mamu God!”

⁴⁰ Keha fotatira dike au meha varihauni aianimu dike mato meha ghu. Dike au taremehadira mu, Mere tanina Magidala, Salome, nia Mere ia nodi uke Zemesi ia rekaha foforu nia Zosepu, e ghua.

⁴¹ Fotati irahi mu dike ghahe leleghui ma Zisas ka ia fafata auna manei aianihi Galili, mala toka ghinina ka ira leghutau neke deoio manei. Tehini ira keha fotati dike leghu mehaio Zisas aianihi Zerusalemu, dike aura molamo aianimu.

Ia Giugiluna Zisas

⁴² Leghu irahi nga dike riva ghidi ka ia Faraide, ia ravata mala va tana, ghe ge dufu nga ia Ravata Mala Maghoso ka ira Ziu. Ka ia zukuru mehana ia saighona,

⁴³ Zosepu ia tanina Arimatia, kaike ghu ka ira mane ta heluhelu ghini ka ia Nonohe Faghina Ira Ziu, neke au afa ghinio ia mehana ia Ravutu Ka God, neke va gigima ma neke lao ghu ka Paelati, la fangaina ia tinina Zisas.

⁴⁴ Paelati neke nona fere nomohina Zisas neke to lemena. Manei neke kudo hagheli ghu kaike manefaadi ira mane magaradi Romu, neke notohi ghu neke to leme hohoghona la mamu Zisas.

⁴⁵ Leghuna nomohi Paelati ka ia manefaadi ira mane magara neke to lemena Zisas, manei neke va kahe ghini Zosepu ta boka hioina mo ia tinina Zisas.

⁴⁶ Zosepu neke tabari kaike poko ghiho lineni ta sodu, ghe neke la hio hinaei nga tuna ia tinina Zisas ka ia hekefalahata. Ianimu tuna ghe dike va piha ghini lao nga, dike la naini ghu ka giliona kaike lianga beku dike tohaio ka ghahipa mafara. Va pidu kaputu ghini lao tuna kaike ghahipa leghaha ia makatanana lianga, neke ghua manei.

⁴⁷ Mere ia tanina Magidala nia Mere ia nona uke Zosepu e ghua, dike finini mo hae neke la nakainina manei ia tinina Zisas.