Maki 11 - Ia Foforuna Naiungene

Ia Haghele Va Manemane Ka Zisas Aianihi Zerusalemu

¹ Di namo meha ghu Zerusalemu Zisas nia ira nona mane ta nonofoi e ghua, maneri dike meha ka ira malau fafaadi Betifeizi nia Betani e ghua, ka ia Vuhukuna Olivi. Zisas neke kusu tuhu kenu laori keha palu mane ka taghodi.

² “O lao ka rekahana malau ianihi kenu mo,” neke ghua ghidi. “Noto haghele lao ghu ghau palu, to la finini ma kaike rekahana dongiki ta sugori maneri, ta deo nga hei neke hagheina. Fudahi o hio mehai ghu.

³ ‘?Heve no riva ghinina?’ dito ghua la notoho ghauna kehara, o kahe ghua ma iahi, ‘Ia Lod ne kabai ghinina, ghe e ke va leghui mo ghatu,’ o la ghua ma.”

⁴ Ira palu mane ta nonofoi, dike lao dike la finini ghu ia rekahana dongiki, tetu ta auna ghu ka ia hangana, sighoto namona ka makatanana kaike suga.

⁵ Di la fudahi ghu maneri palu ghu, dito notohori ghu kehara ka dike tetu namoro aianimu, “?Mala heve no ghua ghe no fudahi nga rekahana dongiki nia?” dike ghua ghidi.

⁶ Dike va kahe ghidi lao ghu heve neke va kahe vanadio Zisas, ghe dike va malumi nga ta hioina.

⁷ Ianimu tuna ghe dike hio mehai nga ka Zisas ia rekahana dongiki, dike nakai laori ghu ira nodi koti ka ia taghuruna, neke nohe lao ghu Zisas.

⁸ Tehini ka ira noni ta varighara, dike kifari ia hangana ka ira nodi poko sodu ka ia ta mala ghahe ta lao ghu Zisas, nia kehara tuna gedi tarahari ghu ira balatadi taghe balatadi tubo ira ta ghua ka ira heke ta au lilohori, dike kifari ghu ia hangana, dike ghua.

⁹ Ira noni dike auro ka kenuna Zisas, nia ira dike ghahe leleghuio leghuna mo e ghua, dike kudokudo, “!Helahela ghini God! !God, va beani manei ia ta meha ka ia babaolona ia Lod!

¹⁰ !God, va beani ia ravutu ta meha ka Deveti ia faada! !Helahela ghini God ka malaunao fate!” dike ghua.

¹¹ Meha dufu tuna Zerusalemu, ge lao ghu ka giliona ia Sugana God, neke ghua Zisas. Manei neke mato lilohori ira vahina leghutau nga aianimu, ghe neke ghahe nga, vununa neto ke age namo saighona. Ke kave lao tuna Betani, taremehadi ira tazoi palu mane ta nonofoi, neke ghua.

Zisas Neke Tibirini Ia Vununa Heke Figi

¹² Ka ia fafata ghahe kaini maneri Betani ia keha fufugho, Zisas neke age nona liha.

¹³ Ne mato fata laoi ghu manei ia vununa heke figi ta bunuta ira kalana, manei neke lao neke la finini ghu ge au fuana la ta ghuana, ghe neke kalana kato ma, vununa e deo nga ge dufu ghu ia fafata mala ke fua ka manei.

¹⁴ Ianimu tuna ghe, neke kahe ghua nga iahi Zisas ka ia heke. “!E deo kalasu kai ta ke meha mahai fuana figina kaike noni ghu ka agho!” Ka ia kahe ghuana iahi manei, ira mane ta nonofoi dike nomohi haroma.

Zisas Neke Va Kalasi Ia Sugana God

¹⁵ Ka ia ke dufu leghudi maneri aianihi Zerusalemu, Zisas neke la haghele ka ia galahena ia Sugana God, neke la bozo kaveri ghu aianimu ira dike hio meha leghutau mala tatabararo nia ira dike la tatabararo, e ghua. Manei neke la tiulu va kokopori ira tevo ka ira noni Ziu ta rivai hoholara ka ira sopai kokolodi rongo ka ira keha soloso, nia ira nonohe ka ira ta meha tatabarai babahulu mala veala e ghua,

¹⁶ nia deo tuna geke va malumi ghu manei hei noni ta hure haghele laoina kaike leghutau ghu ka ira galahedi ka giliona ia Sugana God, neke ghua.

¹⁷ Ianimu tuna ghe neke va kakahe ghidi nga manei kahe ghuana iahi, “Ira Kakangava Ta Maduana ne kaheina, ‘Ia Sugagu ara mu, e mala va kudo ghini malau mala tarai ka ira sare soloso haroharo,’ ghe ghau noto fihikini ka malau mala poika ira noni ta sisiko.”

¹⁸ Di nomohi ghu ira hiama ta kenu, nia ira mane ta vari va kakahe ghini ia vetula ta maduana ka God, heve neke riva ghinio Zisas, maneri dito tatanigai va puhini ma, heve e ghua ghe gedi va lemei nga manei, ta ghuana. Ghe maneri dike maughini ghedi, vununa ia kamotona varigharana noni dike nodi fere fuludu ka ia vari va kakahei manei.

¹⁹ Ka saighona ianimu, Zisas nia ira mane ta nonofoi e ghua, dike ghahe kaini ia malau leghaha.

Zisas Neke Vari Va Kakahe Ghini Ia Tarai, Nia Ia Va Hohoghona

²⁰ Ka ia keha fufugho, di ghahe fuludi ghu ia vununa heke figi neke tibirinio Zisas, ira mane ta nonofoi dike finini neke to age leleme to hinae ghu ka ira zagharana.

²¹ Pita neke ngana fata laoi heve neke va kahe ghinio heke ini Zisas ka ia keha ravata taghe norao, neke kahe ghua ghu iahi, “!Mane Vari Va Kakahei Agho, finini ko! !Ia vununa heke figi noke tibirinio agho to age leleme ini!” neke ghua ghini.

²² Ianimu tuna ghe neke kahe ghidi nga Zisas ira mane ta nonofoi, “O au ghau va hohoghona ka God.

²³ A torai va kahe ghini ghau ghu ara. Noto kahe ghini la ghau vuhuku iahi, ‘Kabai ghini God ta koroho vonaighona, ta fera kai laoighona ghu ka tahio,’ noto ghua la ka ira hihingomu deona go ngana palupalu ghu, va hohoghonaina heve noke kaheio ta age dufuna ghatu, God e age va ghuduvu vanamu tudu ma.

²⁴ A va kahe ghini ghau ghu ara fafahakana iahi: Noto tarai fangari la ghau keha leghutau, o va hohoghonai tato hioina ghau, o age hioi mo ghu ghatu heve leghutau noke fangaino.

²⁵ Nia ka ia tetu tarai ghau, o kusu kai hazarina nga ira nganganamu ta sota ghini ia keha noni, ka ira muko neke va riva ghini ghauro manei, mala e kai hazari ghu molamo nomu Mama fate ira sasake ka ghau.”

Ira Mane Babatu Ka Ira Ziu Dike Notohi Ia Mana Ka Zisas

²⁷ Ka fafata iahi, maneri dike la sabara leghuni aianihi Zerusalemu. Ne ghaghahe ghu Zisas ka ira galahedi ka giliona ia Sugana God, ira hiama ta kenu, ira ta vari va kakahe ghini ia vetula ta maduana ka God, nia ira keha noni babatu e ghua, dike meha ka manei dike fangai ghu,

²⁸ “?Ka mana hei mo mu, noke va ghaherira agho ira noni dike hio meha leghutau mala tatabararo ka ia Sugana God? ?Hei neke vanighona kokolona mana ianimu?”

²⁹ “Ara a va kahe ghini ghau mo hei neke vanagu mana mala riva ghidira ara leghutau irahi, noto ungene tughui la ghau, kaike notoho,” neke ghua ghidi Zisas.

³⁰ “?Heve, ia seselebeana ka Zone mu neke meha ka malauo God fate, ba, ka noni? !O ungene tughuau meha!”

³¹ Nonogele ghua ghini tuna iahi ka vari hoataidi taghodi dike ghua, “Dato kahei la ghita neke sipa meha ka malauo God fate ta ghuana, Zisas eke notoho ghitani ghatu heve da ghua ghe, dake deo nga gada va hohoghonai ghu Zone, eke ghua manei.

³² ?Ba, neke sipa meha ka noni, da ghua ta kaheina?” Maneri dike maughedi ta age hio va magararira ira noni, vununa nganganadira ira noni haroharo mu, Zone mu kaike mane porofeti, dike ghua.

³³ “Ghai deo ga avohi ghu,” dike ghua ghu ma ungene tughuidina. “Neto ghua la ianimu, ara a deo molamo ga boka va kahe ghini ghau ghu, hei neke vanagu mana mala riva ghidira ara leghu irahi nga,” neke ghua ghidi ghu Zisas.