Luku 21 - Ia Foforuna Naiungene

Ia Kakai Ka Ia Fotati Ta Lemekai

¹ Ka ia fafata au Zisas ka kaike galahena ka giliona ia Sugana God, manei neke matori ira noni ta taghotagho ta nai laorira ira nodi kakai ka ia bokese mala kakai.

² Manei neke fini haro molamo kaike fotati ta lemekai ta kuma, nai haghele laorira palu rekahadi kunegele teri ta kapa.

³ Zisas neke kahe ghua ghu iahi, “Ara a toraina va kahe ghini ghau ghu, fotati ta lemekai ta kuma iahi mo mu, ne kakai va tehi laona ka maneri haroharo.

⁴ Vununa maneri haroharo dike nai lao birusuna tei ma, ka heve neke kunuro ka ira nodi taghotagho. Nga fotati iahi mu, ne kuma mo manei ghe, ne nai laori haro ka kakai, ira nona va nonoghadi rongo teri, ta boka mala tatabara leghutau manei ta doli ghu.”

Zisas Ne Kusu Kahe Kenui Ia Huara Ka Ia Sugana God

⁵ Kehara ka ira nona mane ta nonofoi, dike tataniga turi ghidi ira ghahipa ta namanama ka ia Sugana God, nia ira namaha dike vananio God ira noni, e ghua. Ghe neke kaheina Zisas mu,

⁶ “Heve ta finiri irahi ghau mu, ia fafata e la meha mo ghatu, ta age deo kaike ghahipa tei ghu, ta ke papatai laona ka ia mala auna. Leghu ghahipa nga edi age huara kai hinaeri haro.”

⁷ “Mane Vari Va Kakahei Agho,” dike ghua notohodira, “?Niha ghe gedi dufu meha nga mu leghu irahi nga? ?Nia heve mu kusu va ghilaghila ta auna ghatu, to namo dufu leghutau irahi ta ghuana?”

Ira Va Ghilaghilana Ia Meha Ka Zisas

⁸ Zisas neke ungene tughuri, “O banabana, mala edika batu ghini ghau va zea la ghu hei noni. Vununa tehi nonini ta la mehara ghatu ka babaologu ini ara, ta meha kahe ghuana ghu iahi, ‘!Ara mu ia Mesaea’, nia ‘Ia fafata to dufu!’ edi meha ghua. Ghe oka va hohoghonari ghu.

⁹ Nia noto nomohori la ira soloso ta vari magara, nia ira ta vari magara taghodi ka giliodi ira soloso e ghua, oka maughemu ghu. Leghutau irahi mu edi kusu meha mamu, ghe ia va nonoghana e deo ge selu mehai ghu.”

¹⁰ Ianimu tuna ghe neke kahe ghuani nga iahi manei, “Ira soloso edi age magarari ira keha soloso nia ira ravutu edi age magarari ira keha ravutu, e ghua.

¹¹ Ghatu mu, ira leghahai kuzo, ira songe, nia ira avena ta lelemeana e ghua, ta age dufura ka tehi malauni. Nia ghatu tehi leghutau ta mamaghuana, nia leghahai va ghilaghila e ghua, ta aura ka kolangana fate.

¹² “Ghe gedi la dufu meha nga leghu irahi nga, maneri edi age sakomo ghau, nia ngovala ghau, e ghua. Ghatu maneri edi age koroho kakanaka ghini ghau lao ka ira suga mala varighara ira Ziu, nia ka ira suga pipiliga, e ghua. Nia ghatu maneri edi hio ghau lao ka kenudi ira mane ginitaukela, nia ira gavana e ghua, vununa ghau no leghuau ara.

¹³ Iahi mu e age vehana fafata ka ghau, mala va kahe ghidira maneri ghinaguna ara.

¹⁴ Oka anga ghini la ghu, heve e ghua ungene tughurira ira puhi ta va zutu ghini ghau,

¹⁵ vununa ara ta vanamuna ghatu ira ngengene nia ira avoavoho e ghua, ta deo gedi boka ungene tughuri ghu ira kana, ba tadi kaheina no zea ghau, ta ghua ghini ghauna.

¹⁶ Geta ghua ghu nomu ukeri nomu mamari, ira tahimu mane, ira taremehamu, nia ira nomu baere e ghua ghe, ghatu maneri edi age namaha sebo ghau. Nia kehara ka ghau gedi age atungu ghau ghu, e ghua.

¹⁷ Leghu noni nga edi age kikipana ghini ghau ghatu, vununa ghinagu ara.

¹⁸ !Ghe e deo kaike kala ghu ka paumu nira ta age kakaina ghatu!

¹⁹ Noto tetu va gima la va hohoghonana ka ara, ghatu ghau o age hioi ia doli soduai.

Ia Huarana Zerusalemu

²⁰ “Noto finini la ghau Zerusalemu tato au lilohina ira punugara, ghe go avohi nga ia fafata ta mala huari manei neto dufu mamu, ta ghuana.

²¹ Heiri ira ta au Zudia mu, edi torai pelo lao ka ira voruhu, nia heiri ira ta au Zerusalemu tuna, gedi torai kave kaini ghu, e ghua. Nga heiri ira ta au ka ia malau peghuruo mu, edika puina la haghele ghu ka malau leghaha ani.

²² Vununa iranimu lamu ira ravata mala age hioi ia vavahagala, age ghuduvudira tuna heve neke kaheriro ka ira Kakangava Ta Maduana.

²³ E puina age mamaghuana mamu ka ira fotati ta pote, nia ka ira uke ta borori ira nodi rekaha gogoso, e ghua. Vununa ghatu e age au ia leghahai vavahagala ka ia kava Isiraeli, nia ia haala ka God ta lao ka noni irahi, e ghua.

²⁴ Kehara ka maneri ghatu, edi age atunguri ka kaike leboto sisilufu mala magara, nia kehara tuna gedi hio ghahe laori ghu ka ira leghu soloso nga varihau la pipiligana, e ghua. Zerusalemu, edi age deke dadalapi ghatu va muko kaini ghedina, edi age hio kadoli ghu ira noni taka Ziu ghu, e vuhai age ghuduvu ghu ia fafata ka maneri.

Ia Va Paluna Meha

²⁵ “Ka kolangana fate, keha kokolodi va ghilara ta age dufura ghatu ka ia taunu, ia hihile, nia ka ira babaghunu, e ghua. Ka malau iahi peka ka ira nonidi ka leghu soloso nga tuna, gedi age varadoli ghu maughedira, nia naologhabilidira e ghua ka ira kurumudi tahi, nia ka ira bakuru nia oraha ta haza, e ghua.

²⁶ Ghatu ira noni edi age maughedi edi kudoko ghu kehara, vununa ghidi ira leghutau ta mamaghuana ta fini laori maneri, ta la meha ghatu ka malau iahi peka. Ira tehi mana ka kolangana fate, edi age kuzo va rirahari.

²⁷ Ianimu tuna ghe, gedi age finini nga maneri ia Tuuna Noni ta la mehana ka ia toba, taremehana mana nia pelarana varanga, e ghua.

²⁸ !Dito tatanigai dufu la leghutau irahi, tetu vona va lotoro, go mato vona nga, vununa God to namo hio va doli ghau!”

Ia Hio Avoavoho Ka Ia Heke Figi

²⁹ Ianimu tuna ghe, neke va kahe ghidi nga Zisas ungene talevara iahi: “Ke ngana laoina nga ia heke figi, ba ira keha leghu heke nga.

³⁰ Dito sekere la ira kaladi, ghau to avohi ma ia komuhu ba to namo ta ghuana, geta deo ghu hei noni ta va kahe ghini ghauna.

³¹ Taghe iala molamo, noto finiri la ghau leghutau nake turi ghidiro ara age dufudira, to avohi ma ghau ia Ravutu ka God ba neto namo, ta ghuana.

³² A toraina va kahe ghini ghau ghu ara, ubalana noni iahi e deo boka age leme harodira, edi vuhai age dufu haro ghu leghu irahi nga.

³³ Ia kolanga fate, nia malau iahi peka mu, edi age nogha ghatu, nga ira ngengenegu ara mu, e toraina deo ge age nogha ghu.

Ia Kudo Mala Va Tana Ghini Ia Meha Ka Zisas

³⁴ “!O balau! Oka va malumuri ghu ira nganganamu ta ngana tahuina ia ketuhu gogosu, ba riva ghidira ira leghutau ta muko ta riva ghidi ira noni ka ia fafata ketuhu gogosudi, nia oka varadoli ghini ghu ia doli ka malau iahi peka, e ghua. Oka va malumi ghu ravata ianimu ta hio va kakazara ghau

³⁵ taghe kaike lalahe ta ghuana. Vununa ravata ianimu e la meha ghatu, ka heiri haroharo ta au ka malau iahi peka.

³⁶ O va tana ghu mato tuduna, nia o tarai nomu tudu e ghua, mala boka peholo ghidira leghu ta mamaghuana irahi nga, mala o boka tetu ghu ka kenuna ia Tuuna Noni.”

³⁷ Leleghu ravata, Zisas neke lao ka giliona ia Sugana God, mala vari va kakaheina, nia leleghu saighona tuna, geke leghu la epu ghu ka ia Vuhukuna Olivi, neke ghua.

³⁸ Leleghu pagasana fugho, ira noni haroharo dike la nonomoho ka Zisas ka giliona ia Sugana God.