Luku 17 - Ia Foforuna Naiungene

Ia Vari Va Kakahei Ghinina Kai Haza Sasake Nia Ia Va Hohoghona

¹ Kaike ravata Zisas neke kahe ghua iahi ka ira nona mane ta nonofoi, “Ira auau ta age va sasakeri ira noni mu, edi age au tudu ma, ghe ka mamaghuanara ghatu, ka ia noni ta riva ghini ia vari auau.

² E veha fuludu laoi ia ta age talai manei ghatu ia vavahagalana hio va sasakeri heiri ira ta va hohoghona ka ara, gedi va piliga ghini lao lama kaike leghahai ghahipa mala bibiraka witi ka tanianao, gedi la va luduri ghu ka tahio.

³ !Ara a va kahe ghini ghau ghu ta banabanana! Neto age sasake la ia keha noni ta va hohoghona, o buruai, nia neto taghuru kairi la manei ira sasakena, o kai hazari ira sasakena.

⁴ Geta va mukoigho ghu manei vitu fafata ka kaike ravata ghe, neto ke fangaigho la manei ta kai hazarira ira sasakena, oka raghe leghuri ghu ira sasake ka manei.”

⁵ Kaike ravata ira mane nonomoho dike kahe ghua iahi ka ia Lod, “Na kabai ghini ta va gigima laoinani nomai va hohoghona ini,” dike ghua.

⁶ Ia Lod neke ungene tughuri, “Geta rekahana taghe subuna heke masitadi iahi geta ghua ghu ia va hohoghona ka ghau ghe, ghau o boka kahei mo ka heke malaberi iahi, ‘God e age huba vonaigho e kai laoigho ghu ka tahio,’ o ghua ma, e age nomoho ghau ghu manei!

⁷ “Neto la haghele meha la ia noniriva, ka ia sugana ia faghina manei leghuna ia koroho pake ka ira bulumakau lalage ka ia galahena nunuma, ba ka ia leghuna kopunai sipisipi, manei eka age nohe hinae ma ghu geto mahai ghu.

⁸ Manei e kusu va tana vanani mahai mala va sasaighonana ia nona faghina ghe, ge mahai ghena nga taghonai.

⁹ Ia faghina e deo boka kudo vehaina ia nona noniriva, vununa manei mu geala e suna riva ghidi ma heve ira ta mala riva ghidi lama manei.

¹⁰ E ghua molamo ghau noto leghuau la ara, geala o kahe ghua ghu iahi, ‘Ghai mu e deo ga fata ghu ta mala helahela ghini ghaina. Ghai mu suna noniriva mala riva va hokotori ma ira nomai riva,’ geala o ghua ma.”

Zisas Ne Va Vehari Tazo Mane Ta Dufuri Lepa

¹¹ Ka ia ghahe ta lao ghu Zisas aianihi Zerusalemu, manei neke ghahe leghui neke lao ghu ia fofotaina ia Babarana Samaria nia Galili, e ghua.

¹² Ne haghele lao ghu manei ka kaike rekahana malau aianimu, tazo mane ta dufuri lepa dike la tetu mehara varihauni,

¹³ dike kudo ghua ghu iahi, “!Zisas, agho ia Faghina, dudumana ghini ghai!” dike ghua ghini lao.

¹⁴ Zisas neke mato laori ghe neke kahe ghua nga iahi, “Lao, o la va podolo ghau ghu taghomu ka ira hiama ka ia Sugana God aianihi Zerusalemu.” Ka ia ghaghahe ta lao ghu lama maneri, dike to mamalahu ghu ira tinidi ka ia fogara lepa.

¹⁵ Ghe kaike ghu ka maneri, ne finini ghu tato mamalahu ghenana taghonai, neke leghu lao ka Zisas kudo ghuana iahi, “!Helahela ghini God, ara nato ke veha ghegu!” neke ghua.

¹⁶ Manei neke la torongaghituturu hinae ka kavao ka kenuna Zisas kudo vehaina. Mane iahi mu neke tanina Samaria.

¹⁷ Zisas neke notoho, “Tazo mane ngama nake va vehariro ara. ?Hae mu ira keha leghaha ghu?

¹⁸ ?Heve ghe, ne kaikena ngama noni haza ghena iahi, ta ke la leghu meha mala kudo vehaina God?”

¹⁹ Ianimu tuna ghe neke kahe ghua nga iahi Zisas ka ia mane, “Tetu vona, o ghahe gheu ghu. Ia nou va hohoghona ne va vehaighona.”

Ia Meha Ka Ia Ravutu God

²⁰ Kaike ravata ira Farisi dike notohi Zisas, “?Niha ghe ge la meha nga mu ia Ravutu ka God?” Zisas neke ungene tughuri, “Ia Ravutu ka God mu eka leghutau ta boka finini ghu ghau.

²¹ E deo go boka kahei ghu ghau, ‘!Iahi ngaia!’ ta ghuana, ba, ‘!Ianihi ngaia!’ ta ghuana. Vununa ia Ravutu ka God mu, to au ma ka ghau aiahi.”

²² Leghunana, Zisas neke tuturi ghini iahi ka ira nona mane ta nonofoi. “Ia fafata to la meha, ta age hagalai finini ghau kaike ghu ka ira ravata ia Tuuna Noni, ghe e deo go boka age finini ghu.

²³ Keha nonomohora e age dufu ghau mo ghatu ghinina ia leghu meha ka ia Tuuna Noni, edi age kahe ghua ghu ghatu iahi ira noni, ‘!Ianihi nga manei!’ ba ‘!Iahi nga manei!’ edi age ghua. Ghe oka va hohoghonari ghu kokolodi turi iranimu, nia oka kave lao ghu go la hadui ghu, e ghua.

²⁴ Vununa ka ia la leghu mehana ia Tuuna Noni, e deo go boka age va zeai ghu avohina ghau. Taghe ta ghua nia ia lepuna kapi ka kolangana ta sipa ka keha pelonao mo, ta lao ghu ka ia keha pelona, e age ghua ma ghatu, ka ia nona ravata.

²⁵ Ghe ia Tuuna Noni, e toraina kusu age va vavahagala ghidi va mukona tehi leghutauni, nia edi mala sokei ubalana noni iahi ghatunaina, e ghua.

²⁶ “Taghe neke ghuao la ka ira ravata Noa, e age ghua molamo ghatu, ka ia la leghu mehana ia Tuuna Noni.

²⁷ Ghe neke dufu meha nga ia ologho ka ravata iranimu, ira noni dike mahai ketuhu va manemane, nia varihio dike ghua ma, neke dufu ghu ia fafata haghelena Noa ka ia nona vaka. Ianimu tuna ghe neke meha nga ia ologho neke va lemeri haro ghu ira noni.

²⁸ “Nia malau iahi peka, taghe neke ghuao la ka ira ravata ka ia fafata Loti, e age ghua haroma ghatu. Ira noni dike riva ghidi ma ira leghu nodi riva nga; mahai ketuhu ma, tatabara nia makete ma, nunuma nia rivai suga dike ghua ma dike au ghu;

²⁹ neke dufu ghu ka ia fufugho neke kave kainio Sodomu, Loti. Ianimu tuna ghe, neke nanare hinae nga ia totoi nia ira ghahipa ta burungu, sipa mehadira ka kolangana fate, va lemeri haroharora ira noni.

³⁰ E age ghua haroma ghatu ka ia ravata ta ke la leghu mehao ia Tuuna Noni.

³¹ “Ka ravata ianimu, ia noni ta au ka ia fatena suga, eka puina ke hinae la hio leghutau ghu ka ia giliona suga. Ia noni ta au ka ia galahena kava mala nunuma mu, eka puina ke leghu lao ghu ka suganao.

³² !Ke ngana laoina heve neke dufuio ia ghaseborona Loti!

³³ Hei ia ta va sisiva taga ghini ia dolina taghonai mu, e age siana ghini ghatu, nia hei ia ta siana ghini ia dolina taghonai tuna, ge age hioi ghu ia doli soduai, e ghua.

³⁴ Ka redu ianimu, palu noni edi epu varighara ghatu ka kaike vavage mo; kaike ghu e age hio ghahei, nia ia keha ge age au hinae ghu, e ghua.

³⁵ Palu fotati edi age va bibiraka witi varighara; kehana e age hio ghahei, nia kaikeu ge age au hinae ghu, e ghua.

³⁷ “Lod, hae mo ta age dufuna mu iahi ghatu?” dike ghua notohodira ira mane ta nonofoi. Zisas neke ungene tughuri, “Hae ta auna ia tini ta leme, aianimu ta varigharara ira memeha ta ghani boe.”