Kolosi 1 - Ia Foforuna Naiungene

Va Kenuna Pagahaina: Kraes E Mana Kaputuri Vahina Leghutau Nga 1:1–2:23 Ungene Veha Ka Polo Vanadi Ira Ta Va Hohoghona aianihi Kolosi

¹ Leta iahi mu sipa mehana ka ara Polo, neke faete kaveauo God ta mala meha nona mane nonomohona Kraes Zisas. Ara taremehana Timoti ia tahida mane ka Kraes, na ungene veha ghau.

² Leta iahi mu e lao ka ira nona noni beana God ka ia malau leghaha aianihi Kolosi, ka ira tahida ta torai hohoghona ta leghui Kraes. Ara na tarai fangai God ia noda Mama nia ia Lod Zisas Kraes e vanamu ghu ia varisute ta va meha kakatoi nia bule.

Ira Tarai Nia Kudo Veha Ka Polo Ghini Ia Kiloau

³ Ka ira nomai tarai toka malamu ghau, ghai na kudo vehai tudu ma God ia nona Mama ia noda Lod Zisas Kraes,

⁴ vununa ghai nato ke nomohi ta va hohoghonana ghau ka Kraes Zisas nia ta namaha ghidira ira leghu noni nga ka God, e ghua.

⁵ No riva ghini nga ghau iahi mu, vununa ghau no mato kenu laoi ia tabara ta age vanamuo God ghatu, ka nona malauo fate. Ghau noke kusu nomoho ghini iahi, ka ia fafata va hohoghonai ghau ia nonomoho ta hohoghona, ianimu lamu ghu mu ia Nonomoho Ta Veha.

⁶ Nonomoho Ta Veha haro neke meha iahi ka ghau mu, neto kave laona ka ira leghu pelodi nga ka malau iahi peka. Manei neto holarari ira doli hae ghe hae ghu taghe neke holarariro la ira dolimu ghau ka ia toraina ravata tatanigaina noke nomohio noke va fafahakaio ghu ghau ia hohoghona ghinina ia nona varisute ta varanga God ta vanadi kakato ira noni ta muko.

⁷ Epafarasi ia taremehamai maneriva ta namaha ghini ghai lamu neke va kakahe ghini ghauna ghau mu nonomoho iahi. Manei mu e riva varighara taremehamai ghai, e nona maneriva hohoghona ghu Kraes vanamaina ghai.

⁸ Manei haro lamu, neke va kahe ghini ghaina, ia Tarungana God lamu mu, neto ke vanamuna ghau ia gigima mala namaha ghidira ira keha noni, ta ghuana.

⁹ Vununa ghai nato ke nomohi tuturimu ta veha iahi ghau, nato ke tarai toka ghini ghau tudu ma ghu ghai, tatanigaina ka ia ravata nake kusu nomoho ghini ghauno. Ghai na tarai fangai tudu ma God mala va podolo vanamuna ira vahina leghutau ta kabai ghidi nga manei riva ghidira ghau, ta age va avoavoho ghauna ghu nia boka age va fafahaki tuna ia nona lao nanafa, e ghua.

¹⁰ E ghua ianimu ghe, go boka age au leghui nga tuna taghe ia ta kabai ghini ia Lod, age riva ghidi tudura ira ta veha vanani manei. Ira doli ka ghau edi age fua ghidi ira leghu kokolodi riva ta veha nga, nia ianimu tuna ghe ge toka ghini ghau nga God mala avoho va veha laoinani taghonai.

¹¹ Ia nona mana ta varanga, e age va gigima ghau ka ira leghu gigima nga, o boka age au vavahagala soduai ghidi ghu vahina leghutau nga au afa soduaina. Nia ka ia va ghazaghaza ghau o age

¹² kudo vehai ia Mama neto ke fihiki ghauno tato age fata nia ghu ghau hio kadolo tufana ka ira vahina neto ke va tana vanadiro nga manei ira nona noni taghonai ka ia nona Ravutuna fegala.

¹³ Vununa manei neto ke hio va doli ghita ka hei ia ta kopu ka ia ravutuna ia nagoromo, neke hio haghele ghita ghu ka ia ravutu ia Tuuna ta toraina namaha ghini manei.

¹⁴ Ia Tuuna neke tabara kave ghitana ka ira muko ghita, kai hazarira.

Kraes Mu E Au Fatedi Ira Vahina Leghutau Nga

¹⁵ Kraes mu ia totoghalena ta podolo ia God taka podolo ghu. Manei mu e au ka ia papala ta vona fuludu lao, e mana kaputuri ghu ira leghu neto ke va vuhariro nga God.

¹⁶ Vununa manei lamu neke riva taremehanana God va vuharira vahina leghutau nga ka kolangana fate nia ka malau iahi peka e ghua; ira leghutau ta finiri nia ira taka finiri ghu, taremehadi ira leghu kokolodi mana nga ka ira engizeli, ira nazahi, ira ta kopu, nia ira ta auri mana e ghua. Vahina leghutau nga mu neke va vuhari ia Tuuna God, nia neke riva ghidi malana manei, e ghua.

¹⁷ Manei neke kusu au meha mo, ghe dike tatanigai nga ira keha vahina leghutau nga, nia ka manei tuna gedi poposi varighara ghu vahina leghutau nga, e ghua.

¹⁸ Kraes mu paunana ia tinina taghonai, ia kiloau. Manei lamu ta vanani dolina ia tini. Manei lamu ta kusu tetu leghuna ka ia leme taremehana ia doli soduai, mala manei e toraina age kenu va avoho ghu ka ira vahina leghutau nga.

¹⁹ Vununa God neke vato ghini molamo Kraes ta toraina meha varifatana ka taghonai God, ka ira leghu ghaghahedi nga, ghe neke meha doli noni nga manei.

²⁰ Manei neke va bubule taremehadi ira vahina leghutau nga ka kolangana fate nia ka malau iahi peka e ghua, ka ia veala ghini ia busakana Kraes ka ia hekefalahata, mala ira leghu va vuha nga ka malauo God fate, nia ka kolangana, nia ka malau iahi peka e ghua, e mala ke hio leghuri ghu ka God.

²¹ Kaike fafata ghau noke varihau ka God. Ghau noke huhai God, vununa ka ira nganganamu ta muko, nia ka ira riva ta muko noke riva ghidiro, e ghua.

²² Noke ghua mo ianimu ghau sepao ghe, ghatunaina God neto ke hio ghau ta mala auna ka ia bule taremehana taghonai ka ia va meha nonini ia Tuuna, ta leme ghu ka ia hekefalahata. God neke riva ghini iahi, mala neto hio ghau la manei mala auna ka ta au ani taghonai, o age kalasa ghu, deo ghauna muko nia age deo ghau tuna va tapata, e ghua.

²³ Ghe ghau o toraina va hohoghona ma o au ghu, tetu va gimana ka ia nomu va hohoghona. Ghau o toraina ka rizu kaini ghu ia rangerange noke hioio ghau ka ia nomohi ia Nonomoho Ta Veha. Nonomoho Ta Veha iahi mu dito ke tuturi ghini beana hae ghe hae ghu ka malau iahi peka. Ara Polo mu, neke faete kaveau ghu God ta mala va ongahina nonomoho iahi.

²⁴ Ara na va manemane ka ia vavahagala vanamu ka tinigu ini, vununa ara na ohoꞌoho ta mala vavahagalana ka ira vahina ta kabai ghinagu nga Kraes ta mala va vavahagala vananina ara, e mala toka ghini ghu ia tinina, ianimu lamu ghu mu ia kiloau.

²⁵ Ara nake meha nona maneriva ia kiloau, vununa God neke vanaguna riva iahi, mala tuhu kaveauna ta va ongahina ghu ia kamotona nona nonomoho ka ghau.

²⁶ Nonomoho iahi mu neke poikai manei ka ira tehi komuhu nia pagusu tato fuludu lao idi leghu, ghe ghatunaina mu neto ke va podoli manei ka ira nona noni beana taghonai.

²⁷ God neke veha vanani ta mala avohina ira nona noni ghinina popoika ta fefereana nia namanama ta kurui iahi God maladira leghu noni nga hae ghe hae ghu. Iahi ghu mu popoikana, Kraes mu e au molamo ka giliomu ghau, o age hio tufa haro ghu ghau ka ia nona pelarana varanga.

²⁸ Hae ghe hae ghu ta laona ghu ghai mu, a va kahe ghidi leghu noni nga ghinina Kraes. Ka ira leghu avoavoho ta veha nga neto ke vanamaio God, ghai na kahe ghidi va gigima nia va kakahe ghidi e ghua maneri, vununa na kabai hio mehari ka kenuna God taghe noni zeolodi ta ghua ghidira, ka ia doli maneri taremehana Kraes.

²⁹ Mala va hokotina iahi mu, ara na riva va gigima va ghighiuna ka ia mana leghaha Kraes ta riva ka giliogu ini ara.