Ira Riva 7 - Ia Foforuna Naiungene

Ia Tuturi Ka Sitivini

¹ Ianimu tuna ghe neke notohi nga Sitivini ia hiama pauna, “?Di hohoghodi mo mu leghutau ta va kahe ghinigho irahi maneri?” neke ghua ghini.

² Neke ghua iahi ungene tughuna ka Sitivini, “Ghau taremehagu nia ira ta babatu ka ira noni Ziu, o nomoho mehana ka ara! Ia noda God ta varanga sughavona neke podolo ghini ia faada Ebarahamu ka ia soloso Mesopotamia ghe neke rizu la au nga manei ka ia malau leghaha aianihi Harani.

³ God neke va kahe ghini manei, ‘Ghahe kaini soloso iamu ka agho nia taremehau nira e ghua, o lao ghu ka ia soloso ta va podolo vananigho ara ghatu’ neke ghua.

⁴ “Ghahe kaini tuna ia soloso ka ira noni Kaladia neke ghua Ebarahamu, neke la au ghu Harani. Leghuna ia lemena nona mama, ghe neke tuhu mehai nga God aiahi, ka soloso ta au ini ghau ghatunaina.

⁵ Ghe God deo kaike kobosona kava hio kadolo neke vanani ghu Ebarahamu aiahi. Geta kaike kipena tei ta palu pidoko sodunana ghe, deo haroma. Ghe God neke naiungene ghini mo ta vananina soloso iahi manei nia ia pagusu ka manei e ghua, geta deoi mo rekaha manei ka fafata ianimu.

⁶ Nia God neke va kahe ghini haro molamo, ta age auna ia pagusu ka manei ghatu ka kaike soloso taka nodi ghu taghodi, mala age nodi noni mala vari tuhuna maneri, ta age ngovangovalarira ghu ka giliodi rodana ghobi komuhu.

⁷ Kahe ghua haro tuna iahi neke ghua God, ‘Ghe ara, a age va kilasari ghatu ira noni ta varituhu ghidi maneri, nia leghunana gedi age kave meha ghu maneri ka malau iahi, mala va totoana ghinaguna ara, e ghua.’

⁸ Vanani tuna Ebarahamu ia varivehaina papahe va ghilaghila neke ghua God, ge ungene va gigimai ghu ka varivehaina papahe va ghilaghila ianimu geala ta mala hioina ia papahe va ghilaghila manei, ira leghu mane nga ka ia butubutu taghonai nia ira mane haroharo ta age pagusu meha ka manei ghatu, e ghua. Iahi mu e age va podoli ta taghorira God maneri haroharo, edi age leghui ghu heve neke kaheino God ka Ebarahamu ta mala riva ghinina manei. Ebarahamu neke age papahe va ghilaghilai ghu Aesake ia tuunamane ka ia fafata age kaike kolabanana manei. Aesake geke age papahe va ghilaghilai haroma ghu Zekopu ia tuunamane, nia Zekopu tuna geke ghua ghidi haroma ghu ira tuunamane ira tazoi palu faadi ira noni Ziu ka ghita, neke ghua.

⁹ “Tuunamane irahi Zekopu dike puina age kakabai ghini Zosepu ia tahidi mane, dike tatabara ghini ghu ka ira nonidi ka ia soloso leghaha Izipi mala la nodi noni mala varituhuna. Ghe God neke au taremehana manei,

¹⁰ neke hio kavei ghu ka ira leghu lelemeana neke dufuro nga ka manei. Fero ia mane ginitaukelana Izipi neke veha vanani ka Zosepu neke va vonavonai ghu, vununa ka ia avoavoho ta veha neke vananio God. Ia mane ginitaukela neke va mane gavanai manei ka ia soloso Izipi, neke age faghina kaputuri ghu manei ira leghu nona noni riva nga nia ira vahina leghutau ta taghori nga manei, e ghua.

¹¹ “Ghe kaike lalara neke dufu ka ira soloso leghaha Izipi nia Kenani e ghua, neke age au ghu kaike songe. Leghahaina vavahagala neke age auna ghu, dike age toraina ponoeri ghu ghano ira faada.

¹² Ka ia auna Zekopu ka ia noda soloso leghaha Kenani, neke nomohio ghu ta au witina aianihi Izipi, manei neke tuhu laori ira tuunamane, ira faada ghita, mala la tabara witina, ka ia va kenuna sigho ka maneri aianimu.

¹³ Ka ia va paluna fafata la sigho ka maneri, Zosepu neke va podoli ka ira tahina mane hei mu taghonaina, neke to age avohi haro ghu molamo Fero mu ia fototatamana ka neke doli mehao Zosepu.

¹⁴ Ianimu tuna ghe neke va ghahe lao nonomoho nga Zosepu ka Zekopu ia nona mama nia ira taremehana e ghua, mala laona Izipi maneri. Maneri haroharo mu, vitu ngavuluai gaha noni varigharadira.

¹⁵ Ianimu tuna ghe, neke lao nga Zekopu aianihi Izipi, ka neke la lemeo manei nia ira leghu tuunamane nga e ghua, ira faada haro molamo ghita.

¹⁶ Maneri haroharo dike hio leghu laori ka ia malau leghaha Sekemu dike la gilu ghidi ghu ka ia lianga beku neke tabario Ebarahamu ka ira tuunamane Hamori.

¹⁷ “Ne namo meha ghu ia fafata ta mala va ghuduvi God ia nona naiungene ka Ebarahamu, ira noni ka ghita ka giliona Izipi dike to age tehi fuludu laoni.

¹⁸ Ianimu tuna ghe neke age au kopuni nga aianihi Izipi kaike mane ginitaukela foforuna, neke deono ge avohi ghu Zosepu.

¹⁹ Mane ginitaukela iahi mu neke seke ghidi ira noni ka ghai, nia neke toraina ngovala va mukori ira faamai ghai, e ghua. Manei neke toraina kahe ghidi va gigima ira faada ta nakai kaverira ira rekaha gogoso ka ira peghurudi suga, edi mala age leme ghu maneri.

²⁰ “Ka fafata ianimu lamu neke dolina Mosese, neke toraina rekaha vevehana ghu ka ira nahalina God. Nona uke ghe nona mama dike boro ghini ghu manei ka ia sugadi giliona lito hihile.

²¹ Ka ia fafata nai kavei maneri peghuru leghuina ia varituhu ka Fero, ia tuunaghase Fero neke la fininina neke hio sutei ghu, taghe kaike toraina tuunamane taghonai neke ghua ghini ghu.

²² Mosese dike va kakahe ghini ira leghu avoavoho vehadi nga ka ira noni Izipi, neke toraina meha maneheta ghu ka ngengene nia ka riva, e ghua.

²³ “Ka ia fafata age rodana ngavulu komuhuna Mosese, manei neke kabai la sigho ghidi ira taremehana noni Isiraeli.

²⁴ Ne finini ghu manei kaike mane Izipi ta ngovalina kaike ghu ka mane Isiraeli irahi, manei neke la toka ghini, neke atungi ghu mane Izipi ani.

²⁵ Ka ia nganganana Mosese mu, ira taremehana taghonai edi age fini avohi mo bana nga ta tuhu laoi ini God taghonai mala la toka ghidira, neke ghua, ghe maneri deo ma gedi ke va fafahaki ghu.

²⁶ Ia keha ravata manei neke la finirini keha palu mane Isiraeli magaradira, neke la va sisiva buleri ghu, kahe ghuana iahi. ‘?Palu mane, ghau palu mu tanimu haroma Isiraeli, ne heve ghe no magara nga?’ neke la ghua ghidi.

²⁷ “Ghe ia mane neke tataniga ghinio ia magara neke tiulu kaini Mosese neke kahe ghua ghu iahi, ‘?Hei mu neke nakaighona agho ta mala mane kopuna nia ta mala manefatena ka ghai?’ neke ghua ghini.

²⁸ ‘?Heve, agho no kabai atunguau ara, taghe noke ghua ghinio la ia mane Izipi norao?’

²⁹ Ne nomohi ghu Mosese ianimu, manei neke pelo kaini Izipi, neke la au ghu ka ia Soloso Midiani, taghe kaike noni mehana ta la ghuana aianimu. Aianimu tuna ghe, dike la doli nga tuna mu palu tuunamane, neke ghua.

³⁰ “Leghuna rodana ngavulu komuhu ka ia malau koroghana ta karango, gheremena ia Vuhuku Saenae, kaike engizeli neke podolo ghini Mosese ka ia helupuna rekahana heke ta saliga.

³¹ Mosese neke nona fere fuludu ka heve neke finini ani. Ne ghahe namo lao ghu manei mala la fini va vehaina, manei neke nomohi ia leona ia Lod kahe ghuana iahi,

³² ‘Ara mu ia God ta va totoana ghini ira faau agho, ia God ka Ebarahamu, Aesake nia Zekopu, e ghua.’ Mosese neke to age tatanigai nanazara ka mamaghu, neke maughena ghu ke mato laonani aianimu.

³³ “Ianimu tuna ghe, neke kahe ghua lao nga iahi ka manei ia Lod, ‘Hio kairi sadolo nira ka agho, vununa agho no tetu ka kava ta maduana.

³⁴ Ara na toraina fini hibagu, ta ngovala va vavahagalarira maneri ira nogu noni aianihi Izipi. Ara nato nomohori ira nakele ka maneri, nato la meha ghu mala hio kaverira. O meha ghu agho ghatunaina, ake tuhu leghu laoigho ghu ara Izipi.’

³⁵ “Iahi mu ia Mosese dike sokeio lama ira noni Isiraeli dike kahe ghua ghinio iahi, ‘?Hei neke nakaighona agho ta mala mane kopuna nia ta mala manefatena?’ dike ghua ghinio. Taghonai God lamu neke tuhu laoina Mosese mala la kopuna nia ta mala la hio kaverira e ghua ira noni, taremehana ia toka ka ia engizeli neke podolo ghinio manei ka ia rekahana heke ta saliga.

³⁶ Mosese neke batu ghidi kavera ira noni Isiraeli aianihi Izipi. Manei neke riva ghidi ira hahaima nia va ghila ta fefereana aiani Izipi, ka ia Tahi Ta Busaka nia ka ira rodana ngavulu komuhu dike auro maneri ka ia malau koroghana ta karango, e ghua.

³⁷ “Mosese lamu neke va kahe ghidiro ira nonidi Isiraeli iahi, ‘God e age vanamu meha ghatu kaike mane porofeti taghe ara la, ka ira torai nomu noni taghomu’ neke ghuao manei.

³⁸ Iahi lamu ia Mosese neke au taremehadiro ira noni Isiraeli dike varighararo ka ia malau koroghana ta karango. Mosese neke au taremehana ia engizeli neke ngengene laono ka manei ka ia Vuhuku Saenae nia neke au taremehadiro ira faada ghita, e ghua. God neke vanani Mosese ira ngengene ta va kahe ghini ghita, ghinina ia ghaghahena doli ta mala au ghita ta veha vanani God, neke va kadolo vanada mehao Mosese.

³⁹ “Ghe ira faada ghita dike huhughi Mosese. Maneri dike sokei manei dike kabai ke leghu lao ghu Izipi.

⁴⁰ Kahe ghua tuna iahi ka Eroni ia tahina ta faa Mosese, dike ghua ira noni, ‘O riva vanada keha god ta boka babatu ghini ghita. Ghita dato deo gada avohi gheda ghu heve mo neto dufuna ka mane Mosese iahi, neke hio kave ghitano aianihi Izipi,’ dike ghua.

⁴¹ Riva ghini tuna kaike nguzunguzu taghe tokelena kaike rekahana bulumakau ia ta ghua, gedi rivai veala vanani ghu nia posini tuna kaike sarumahai varighara mala va manemane ghinina leghutau dike riva ghini iahi ka ira kamedi, dike ghua.

⁴² Taghuru kairi tuna neke ghua God, neke va leleghu ghidi ghu ta va totoana ghidira maneri ia taunu, ia hihile nia ira babaghunu e ghua, taghe nodi godra maneri. Iahi mu ne leghui ghu heve neke kangavio ka ia buka ira porofeti ia ta kahe ghua iahi, “‘!Ghau nonidi Isiraeli! Eka ghua ghu ka ara noke atungu tagukava mala rivai veala mehana ghau ka ira rodana ngavulu komuhu noke aurio ghau ka ia malau koroghana ta karango.

⁴³ Ghau noke hure taremehamu ia suga tapole ka god Moleke, nia ia nguzunguzuna Refani ia babaghunu god ka ghau, e ghua; ghau noke riva ghidi nguzunguzu irahi mala va totoana ghidira. Ara a va ghahe ghau ghu ghatu, seka ghini ghau laona varihauni, fuludu laoina ia soloso leghaha Babiloni.’

⁴⁴ “Ia Suga Tapole ta Maduana ka neke ngengene taremehadio God ira faada, neke au taremehadi maneri ka ia malau koroghana ta karango. God neke va kahe ghini Mosese rivanana Suga Tapole iahi, leghuina taghe ia aꞌauna neke va podolo vananio God manei.

⁴⁵ Leghuna ianimu, ira faada dike hioina Suga Tapole ta Maduana ianimu dike hio taremehadi ghu ka ia fafata ghahe leghui maneri Zosua. Maneri dike hure taremehadi Suga Tapole iahi ka ia fafata hio kadoli maneri ia kava ka ira noni neke bozo kaveriro God vanadira maneri. Suga Tapole iahi neke au ma aianimu ka ia nodi malau taghodi neke vuhai meha tetu mane ginitaukela ghu Deveti.

⁴⁶ God neke toraina veha vanani ka Deveti, fangai tuna God neke ghua Deveti ta mala riva ghinina taghonai kaike Sugana God, ta boka la va totoana ghini God ira noni Isiraeli ka ghita.

⁴⁷ Ghe Solomone, ia tuuna Deveti mo mu, neke torai va tetuina ia suga malana ka God.

⁴⁸ “Ghe God ia ta Varanga Sughavona mu, eka au ghu ka ira suga ta riva ghidi ira noni. Taghe ta kahei iahi la porofeti, Aesaea,

⁴⁹ “‘Ia kolanga mu e nogu nonohe ginitaukela, nia malau iahi peka mu ia nogu nonohe mala dedeke. ?Kokolona suga hae mo mu ta age va tetu vanaguna ghau?’ ne ghua notohona ia Lod. ‘?Ka malau hae mo ta age maghosona ara?

⁵⁰ Ara nato riva ghidi vahina leghutau nga.’

⁵¹ “Sitivini neke kahe ghua laoni iahi, ‘!Ghau noni ta kaputu! Ghau noto deo go vanani ghu God ira hihingomu nia deo haroma go age nomohi ghu ghatu, e ghua. Ghau no taga tetui tudu ma heve ia ta va sisiva kahe ghini ghau ia Tarunga Ta Maduana, taghe dike ghuao la ira faamu.

⁵² !Ira faamu ghau dike va vavahagalari ira leghu porofeti dike auro nga sepao! Maneri dike atunguri ghe, ira dike kusu kahe kenuio ia meha ka ia Ta Lotoro, ia Mesaea noke namaha seboi noke atungio ghu ghau.

⁵³ Ghau noke hioi ia vetula ka Mosese neke vanamuo God ka ira nona engizeli, ghe ghau noto deo ma go leghui ghu.’”

Sitivini Di Atungi

⁵⁴ Di nomohi ghu tuturi iahi ka Sitivini ira ta au ka ia Nonohe Faghina ira Ziu, maneri dike age ngaziri dike ghani va ghiriti ghu halarina.

⁵⁵ Ghe Sitivini ka ia foudi ia Tarunga Ta Maduana, neke mato vona ka malauo God fate neke finini ghu ia pelara ta la meha ka God, nia Zisas ta tetuna ka ia kame mautuna God, ka ia malau ta toraina heheluana nia mana.

⁵⁶ “!Fini!” neke ghua Sitivini, “!Ara na finini ia malauna God fate ne tobehe na finini ghu ia Tuuna Noni, tetuna ka ia kame mautuna God!”

⁵⁷ Ira ta au ka ia Nonohe Faghina ira Ziu dike posi kaputuri ira talingadi ka ira kamedi, ghe dike kudo kaini nga vari rurutu ghini lao haroharona.

⁵⁸ Ianimu tuna ghe dike koroho kai kavei nga ka ia malau leghaha dike la tatanigai va roborobo ghini ghahipa ghu. Ira noni dike makutio Sitivini, dike hio kairi ira nodi poko sodu, e mala nanamori ghu feferai lao ghahipana, dike ghua. Hiori tuna ira nodi poko sodu gedi la nakai taremehana ghu kaike mane foforu, babaolonana Solo, mala kopunai vanadina, dike ghua.

⁵⁹ Ka ia fafata va fera ghini ghahipa ma ta au ghu maneri, Sitivini neke tarai ghua iahi, “Lod Zisas, o hioi tarungagu ini,” ne ghua.

⁶⁰ Manei neke torongaghituturu hinae ghe, neke nakele va fafaa vona nga, “!Lod, oka raghe leghui ghu muko iahi ka maneri!” neke ghua ghe, neke leme ghena nga.