Ira Riva 6 - Ia Foforuna Naiungene

Vitu Mane Mala Toka Di Faeteri

¹ Ka ravata iranimu, tehi laoni ka ira noni Ziu dike meha va hohoghonara ka Zisas. Ira Ziu ta ngengene Giriki dike gumigumi ghidi ira keha Ziu ta ngengene Erameiki, vununa ira fotati ta lemekai ta au ka ia keha pelona mo taghodi dike deo gedi ngalangadori ghu maneri ka ia tufana mahai leleghu ravata.

² Kudo varighara ghidi haroharo tuna ira noni ta va hohoghona, dike ghua ira tazoi palu mane nonomoho, dike kahe ghua ghu iahi, “Ghai ira mane nonomoho mu geala a tuturi beana nia vari va kakahe ghini ia saorona God, nga aka mala tufa ghano ghu,” dike ghua.

³ “Ghau tahiguro, o mato liloho ka vari hoataimu taghomu, o faeteri ghu vitu mane ta toraina va vonavonari ta foudu ka ia Tarunga Ta Maduana nia ta avoavoho, e ghua. Maneri lamu ta age nairira ghai ghatu mala posinina riva iahi ghatu.

⁴ Ia kamotona fafata ka ghai tuna ga mala riva ghini ghu ia tarai, tuturi beana nia vari va kakahe ghini ia saorona God, e ghua.”

⁵ Ngangana iahi neke age veha vanadi ia pukuna kamoto dike age faeteri ghu mane irahi: Sitivini (ia mane neke foudio va hohoghona nia ia Tarunga Ta Maduana), Filipi, Porokorasi, Naekanori, Timoni, Paramenasi nia Nikolasi na Anitioko e ghua, (kaike noni taka Ziu ghu neke to holarao ka ia va hohoghona ira Ziu).

⁶ Vitu mane irahi dike hio laori ka ira mane nonomoho, la tarai toka ghidira nia va fara laorira ira kamedi ka ira paudi, taofirira.

⁷ Ia nonomoho ka God ghinina Zisas mu, neke ongaha ma neke au ghu. Ira noni ta va hohoghona ka Zisas aianihi Zerusalemu dike to age tehi laoni, nia ira hiama ka ira Ziu dike leghuio ia va hohoghona tuna gedi to age tehi fuludu laoni ghu, dike ghua.

Sitivini Di Sakomo Hioi

⁸ Sitivini mu kaike mane neke toraina va beani God neke foudi ghu mana, riva ghidira ira leghahai hahaima ta fefereana ka hoataidi ira noni.

⁹ Ghe kaike ravata, keha mane ta holara ka kaike pukuna ta va kudo ghini Suga Mala Varighara ka ira Ziu ka Ira Mane ta Kalasa, dike age tatanigai vari tuufuai taremehana Sitivini. Maneri mu ira noni Ziu tanidi ka ira malau leghaha Saerini nia Alekesanidiria, nia ka ira babaradi Silisia nia Esia, e ghua.

¹⁰ E deo hei ka maneri neke boka age tetu paufina Sitivini ka ia avoavoho nia Tarunga neke ngengeneo manei.

¹¹ Va hugahugari tuna keha manera mala va sura ghini sebona Sitivini dike ghua, dike kahe ghua ghu iahi, “Ghai nake nomohi manei kahe va mukoina Mosese nia God, e ghua,” dike ghua.

¹² Iahi neke toraina age va kinakinari ira noni, ira manefaa nia ira ta vari va kakahe ghini ia vetula beana ka Mosese, e ghua. Sakomo hioi tuna Sitivini gedi hio laoi ghu ka ia Nonohe Faghina ira Ziu, dike ghua.

¹³ Ianimu tuna ghe dike hio hagheleri nga keha manera mala va sura ghini sebona Sitivini, dike kahe ghua iahi, “Mane iahi e kahe va mukoi tudu ma Sugana iahi God nia ia vetula ka Mosese, e ghua.

¹⁴ Nake nomohina ghai ka manei mu, Zisas tanina iahi Nazareti, e age huari ghatu ia Sugana God nia e age holarari ira puhida nia dolida meha neke vanadao Mosese e ghua,” dike ghua.

¹⁵ Ka fafata iahi, ira noni haroharo nia ira ta au ka ia Nonohe Faghina ira Ziu e ghua, dike mato dodoghohoto laoi Sitivini dike finini ghu ia hihilina manei, taghe hihilina engizeli ta ghuana.