Ira Riva 4 - Ia Foforuna Naiungene

Pita Ghe Zone Ka Kenuna Ia Nonohe Faghina Ira Ziu

¹ Di ngengene ngama di au ghu Pita ghe Zone ka ira noni, dito la meha ghu ka maneri palu ira hiama ta kenu, ia manefaadi ira mane magara ka ia Sugana God, nia keha Sadiusira e ghua.

² Maneri dike puina halari fuludu ka Pita ghe Zone, vununa palu mane nonomoho irahi dike vari va kakahe ghini ka ira noni ghinina ira noni ta leme edi ke age tetu leghu ka ia leme ia ta ghua, taghe Zisas la neke tetu leghuo ka ia leme.

³ Sakomori tuna dike ghua, ghe vununa neto ke age saighona, dike nai hagheleri ghu ka pipiliga neke dufu ghu ka ia keha fufughona.

⁴ Ghe tehini ka ira noni dike nomohio nonomoho iahi ka maneri palu ghu dike age va hohoghonai. Ia pukuna noni ta va hohoghona dike age tehi laoni dufuna haeba ka gaha togha mane varigharadira, deona ge tahori ghu ira fotati nia rekaha, e ghua.

⁵ Ka ia keha ravata, ira noni babatu ka ira Ziu, ira keha manefaa, nia ira mane ta vari va kakahe ghini ia vetula beana ka Mosese e ghua, dike varighara aianihi Zerusalemu dike posini ghu kaike haedu.

⁶ Anasi ia hiama pauna, Kaefasi, Zone, Alekesada nia keha taremehanara ia hiama pauna e ghua, dike au harora aianimu.

⁷ Maneri dike hio hagheleri Pita ghe Zone gilio dike va teturi ghu ka kenudi taghodi, ghe dike notohori nga, “?Ka ia mana hei mo, ba ka ia babaolona hei mo mu, noke riva ghinina ghau palu ghu riva iahi?” dike ghua ghidi.

⁸ Ghe Pita ka ia foudi ia Tarunga Ta Maduana, neke va kahe ghidi lao, “Ghau ira ta babatu nia ira manefaadi ira noni:

⁹ Ravata iahi ghau no notoho ghini ia riva ta veha nake vananio ghai mane ta paheku iahi, nia heve neke ghua ghe neke age veha nga manei e ghua, ta ghuana.

¹⁰ Ghau haroharo nia ira leghu noni nga Isiraeli e ghua, geala o avohi iahi. Mane ta tetu iahi ka kenumu ghau, neke age veha ghena kamoto ka ia babaolona nia ka ia mana Zisas Kraes ia tanina Nazareti, ia mane noke tupila ghinio ghau ka ia hekefalahata, ghe neke va tetu leghuio God ka ia leme.

¹¹ Zisas lama mu ta turi ghini iahi ka ira Kakangava Ta Maduanana kahe ghuana iahi, “Ia ghahipa noke sokeio ghau ira ta rivai suga, neto ke toraina meha ghahipa tongovonana.

¹² Kaikena ma Zisas ta boka hio va dolirira ira noni. Ia babaolona manei lama mu ta manana ka malau iahi peka neto ke vanada mehana God mala hio va dolirira ira noni. Ka manei lamu ta toraina mala age hio va doli ghitana ghita.”

¹³ Ira ta babatu ka ira Ziu di finiri ghu Pita ghe Zone dike torai naduna ka ngengene nia dike deona gedi ke sikolu va veha ghu e ghua, maneri dike age puina nodi fere fuludu. Maneri dike age fini avohori haroma maneri palu ghu, dike au taremehana Zisas, ta ghuana.

¹⁴ Ghe e deo heve ta boka ke kaheinani maneri, vununa maneri dike to finini ia mane dike va vehaio, tetu taremehadina Pita ghe Zone.

¹⁵ Leghuna kahe ghidi va gigima Pita ghe Zone ta kave kainina ia Nonohe Faghina ka ira Ziu, maneri dike nonogele ka vari hoataidi taghodi ghidi maneri palu.

¹⁶ “?Heve geala ta age va riva ghidira ghita mane irahi?” dike ghua vari nonotohodira. “Maneri haroharo ta au aiahi Zerusalemu dito avohi hahaima ta fefereana iahi mu dike riva ghini maneri palu ta ghuana, e deo ghu ghita gada boka tuufu ghini ghu neke deo ge ghua ghu ianimu ta ghuana.

¹⁷ Nga mala va nodoina leghutau iahi ta deona ge ongaha varihau lao ghu ka ira noni mu, ghita da toraina kahe ghidi va gigima mane irahi, ta nodona maneri va kahe ghidira ira noni, ghinina noni ta va kudo ghini Zisas iahi.”

¹⁸ Ianimu tuna ghe dike la kudo hagheleri nga ira palu mane nonomoho, dike ungene va gigimari ghu, taka puina ke tuturi, ba vari va kakaheina ghu ka ia babaolona Zisas.

¹⁹ Ghe Pita ghe Zone dike ungene tughuri, “?Ka ira nganganamu ghau mu, God ne kabai ghini ghai ta nomoho ghauna ghau, ba ta nomohina taghonai mo?” dike ghua ghidi.

²⁰ “Ghai palu mu, e deo ga boka nodo ghu tuturi ghidira ira leghutau ta namanama nake finiriro nia nomohoriro.”

²¹ Ia Nonohe Faghina ka ira Ziu dike ngengene va mamaghurini Pita ghe Zone, ghe dike va kaveri nga tuna. Maneri dike finini tato deona hae ta boka va dedekena mala va kilasarira, vununa ira noni haroharo dike helahela ghini God ka heve neke dufuno ka ia mane ta paheku.

²² Ia mane dike va riva ghinio hahaima iahi neke age veha ghenao ghu mu, to fuludi rodana ngavulu komuhuna.

Ira Noni Ta Va Hohoghona Di Tarai Fangai Ia Gigima

²³ Selu laoi ma ia age va kaveri, dike la haduri ghu ira keha noni ta va hohoghona Pita ghe Zone, la turi vanadina heve dike va kahe ghidiro ira hiama ta kenu nia ira noni babatu, e ghua.

²⁴ Di nomohi ghu turi ianimu ira leghu noni ta va hohoghona nga, maneri dike tarai varighara kahe ghuana iahi: “Agho Lod, agho noke va vuhaio ia kolanga, ia kava, ia tahi nia ira vahina leghutau ta au nga ka ira giliodi.

²⁵ Agho noke ngengene ka ia Tarunga Ta Maduana, ka ia nou noniriva Deveti ia faamai, kahe ghuana iahi, “?Dike heve ghe di halari nga ira noni taka Ziu ghu? ?Dike heve ghe dike rivai vatovato ta deo lighorodi nga ira noni Ziu mala taga tetuina ia Lod God?

²⁶ Ira mane ginitaukela ka malau iahi peka dike va tanai magara; dike vato varighara ghu ira ta babatu mala taga tetuina ia Lod God nia ia nona Mesaea.

²⁷ “!Toraina hohoghona mamu, Herodi ghe Ponitiusi Paelati ia gavana, dike haedu varighara taremehadi mamu ira noni taka Ziu ghu nia ira noni Isiraeli e ghua ka malau leghaha iahi Zerusalemu mala taga tetuina Zisas ia nou Mesaea noke faetio.

²⁸ Noni irahi dike riva mala va ghuduvuri ira heve e mala age dufu ghatu noke to kusu ghua ghidi meharo agho ka ia nou mana nia lao nanafa.

²⁹ Lod God, ghatunaina o mato laori ko ira ngengene vari va mamaghu ka maneri, o va malumu ghai ghu ghai ira nou noniriva ta torai naduna ka ia tuturi ghini beana ia nou nonomoho.

³⁰ Va tuhu kavei kameu nia, mala va veha fogarana nia mala riva ghidira ira hahaima va ghilaghila ta fefereana ka ia babaolona Zisas ia nou noniriva ta maduana, mala va podolina ia nou mana.”

³¹ Leghuna tarai maneri, ia suga ka dike haedu varigharao maneri, neke age kuzo. Maneri haroharo dike age fouduri ia Tarunga Ta Maduana, dike toraina nadu va veha ghu ka ia tuturi ghini beana ia nonomoho ka God.

Ira Noni Ta Va Hohoghona Di Vari Tufa Ghidi Ira Nodi Leghutau

³² Ira noni haroharo ta va hohoghona dike age kaike ka ira hihingodi nia nganganadi. E deo hei ka maneri taghe nona ma taghonai neke ghua ghidira ira nona leghutau, nga dike vari tufa ghidi haroma nodira.

³³ Ka ia mana ta torai gigima, ira mane nonomoho dike tuturi ghini kave ia tetuleghuna ia Lod Zisas, neke toraina va beanari haroharo ghu God.

³⁴ E deo hei ka vari hoataidi maneri neke kumana, vununa ira noni dike tagho kava ba sugaro, dike tatabara ghidi,

³⁵ dike hio laori ghu ira rongodi ka ira mane nonomoho, mala tufari ghedira ira keha noni ta malanga.

³⁶ Taghe iahi la, kaike mane ka ia pagusu ka giliona ia kokolo Livae, babaolonana Zosepu, neke auna Zerusalemu. Manei mu neke doli ka ia ghizuna Saeparasi, dike va kudo ghini Banabasi ghu ira mane nonomoho, (fafahakanana mu, “Ia Ta Va Gigimari Ira Keha Noni” e ghua).

³⁷ Manei neke tatabara ghini ia galahena kava ka taghonai, neke hio laori ghu ira rongona ka ira mane nonomoho, mala tufarira ira keha noni ta va hohoghona.