Ira Riva 27 - Ia Foforuna Naiungene

Polo Ne Tepetepe Lao Romu

¹ Maneri dike va puhini ta mala tepetepe laona ghai ka ia malau leghaha Romu ka giliona ia babarana Itali, ka ia ta au Sisa ia Mane Ginitaukela. Ka fafata ianimu maneri dike naini Zuliasi mala kopu ghinina Polo nia ira keha mane pipiliga, e ghua. Manei mu neke manefaana kaike ghobi mane magara ka giliona kaike pukuna punugarana Romu ta va kudo ghini ia Pukuna ta Kenu ka ia Mane Ginitaukela.

² Ghai nake haghe ka kaike vakana Adaramitiamu neke va tanai laono ka ira sopai malau mala sabara ka ia babarana Esia. Arisitakasi, ia manena ka ia malau leghaha Tesalonaeka ka ia babarana Masedonia, neke leghu ghai haroma.

³ Ka ia keha ravata, ghai nake la nodo kaina ka ia malau leghaha Saedoni. Mane Zuliasi iahi neke puina sutei Polo, neke va malumi ghu ta kalae la ghaherira manei ira nona baere, gedi boka la mo maneri ta tufai ghenana ka ira heve ta malanga ghidi manei, neke ghua.

⁴ Ke kave leghumaina aianimu, ia dafe neke toraina gigima meha kenumai mo, nake tepetepe namo lao ghu ghai ka ia ghizuna Saeparasi ka ia keha pelona ta paere ta tala hinae ka ia tutupekana mo.

⁵ Ghai nake tepetepe kadoli ia hebalana ghe nake la aghara leghui nga tuna ia tutupekana ka ira babaradi Silisia nia Pamufilia e ghua, nake la sabara ghu ka ia malau leghaha Maera ka ia babarana Lisia.

⁶ Aiani Izipi neke la dufuina kaike vakana Alekesanidiria ia manefaana ia pukuna mane magara. Vaka iahi mu neke mala ghahe vai lao ka ia babarana Itali, neke kahe ghini ghai va gigima ghu manei ta haghe laona ghai ka vaka ianimu.

⁷ Tehi ravatani nake tepetepe tokeni nake ghahena ghu ghai ka ia mukoi nare, toraina mamarutana vanamaina dufuna ka gheremena ia malau leghaha Naedasi. Ia dafe neke la meha kenumai mo, nake deo ghu boka laomaina ka nake fera vai laono, nia ke tepetepe vai hinae tuna ka ia keha pelona ta paere mo ka ia ghizuna Kiriti, ghahe fuludina ia visokona Salamone nake ghua.

⁸ Neke toraina mamarutana vanamai aghara leghuina ghai ia tutupekana, ghe nake dufu nga tuna ka ia malau ta va kudo ghini Lovete Vehana gheremena ia malau leghaha Lasia.

⁹ Ghai nake au soduai aianimu neke vuhai age mamaghuana ghu ta ghahena ghai ka vaka, vununa neke hihiledi rabongi mu ka fafata irahi. Nia ia Leghahai Ravatana Kai Haza Sasake to age fuludu haro molamo, e ghua. Kahe ghidi va gigima tuna ira maneriva ka vakana neke ghua Polo kahe ghuana iahi ka maneri,

¹⁰ “Ghatomane, ara na avohi dato ghahe la ghita ka vaka ini ghatunaina, ghaghahe iahi ka ghita aiahi ta vai age ghu kenu mo, e puina age lelemeana ghatu, e age va mukori ghu ghatu vaka, kako idi, nia tehini ka ghita ta age leme harona e ghua.”

¹¹ Ghe ia manefaana ia pukuna punugara, e deo ma ge nomohi ghu ia tatangana ka Polo, nga ira turi mo ka ia mane posi gili nia ia mane kutamana ia vaka e ghua mo, neke leghurira manei.

¹² Lovete ianimu, e deo geke veha ghu ka mala poika ka ira hihiledi rabongi. Tehidira ka ira mane, dike kabai ghini ghu tato ghahena maneri ta la dufuna ghu ani ka ia malau leghaha Finikisi rangerange mala va fuludina ia fafatana rabongi aianimu. Finikisi mu e au ka kaike lovetena Kiriti ta tala lao visi pelopekana pakaomo nia pelovonana pakao mo, e ghua.

Ia Vaka Ne Hakei Ia Tapaoho

¹³ Ne la tataniga ufu meha ghu ia dafe uruꞌuru visi pelopeka mo, edi bokai mo dike ghua ka ira nganganadi, dike koroho vonai ghu ia sighoto, nia tepetepe vari namo leghui tuna ia agharana Kiriti, dike ghua.

¹⁴ Deo ma ge sepa ghu, neto raza ghu kaike leghahai dafe, neke mehao ka vari hoataina fateo mo nia pelovona mo, ia ta toraina gigima ta va kudo ghini, “Fateona Pelovona,” la fera mehana ka ghizuna ini mo.

¹⁵ Ia dafe leghaha neke toraina age hoto va mukoi vaka ini, nake deo ghu boka tepe toghara vonaimaina, nia to va leghu ghini ma tuna hae mo ta hio lao ghaina dafe ini, nake ghua.

¹⁶ Ghai nake ghahe leghui ia rekahana ghizuna ta va kudo ghini Kauda visi ka ia keha pelona mo ta paere ka ia dafe. Neke puina age marutana mo ghe, nake boka mo koroho va haghei ta piliga va gimaina ghu ia tigina vaka.

¹⁷ Leghuna koroho vonaidina ia tigi ka vakao ira mane, maneri dike va liloho ghini taili ia vaka toraina piliga va ghiritinina ta mala posi va gima varighara ghinina ghu. Maneri dike maughedi ta la nohena vaka ini ka keha boboka garanga ka ia lovetena Seritisi, peghuruna ia agharana Libia, Afirika, dike kai hinaei ghu ia sighoto ka ia rokasa mala va mamahugeina ia rizuna vaka, dike va leghu ghini ghu ia vaka ta felo leleghuina ia dafe.

¹⁸ Ka ia keha ravata, ia dafe neke toraina age hoto va muko ghai, dike age tataniga kai kaveri ghu ira kako ka vakao ira maneriva.

¹⁹ Ka ia keha ravata leghuna ianimu tuna, gedi ke sakomo kai kaveri ghu, tehidira ka ira leghutau mala riva ka ia vaka, dike ghua.

²⁰ Tehi ravatani, ghai nake deo ga boka finini ghu ia taunu, ba ira babaghunu, nia ia dafe leghaha ge toraina raza va muko ghai ma ge lao ghu, neke ghua. Va nonoghanana, ghai to age deo ghai ira leghu rangerange nga ghinina a boka age doli mo ghatu, ta ghuana.

²¹ Ka leghuna neke to age soduai fuluduo deona gedi ke mahai ghu maneri, ghe neke va kahe ghidi nga tuna Polo. “Ghatomane, goke nomohoau la ara ghau, gada ke deo ghu ghahe kainidana Kiriti, geala ghita da boka peholo ghidi mo vahina leghutau ta va mukori irahi nga nia ta siana ghidi irahi nga, e ghua.

²² !Ghe ghatunaina ara a papada ghau ghu ta hioina hetamuna! E deo hei ka ghau ta age lemena ghatu, nga vaka ini lama mu ta age kakaina.

²³ Vununa reduo, kaike engizeli ka ia God ta taghoau ara nia ta va totoana ghini ara, neke meha tetu ka gheremegu ini,

²⁴ meha kahe ghuana iahi, ‘!Oka maugheu ghu Polo! Agho o toraina age tetu ghatu ka kenuna Sisa ka giliona vari sukutuai. Nia God ka ia nona veha ka agho, manei e age hio va doliri haroharo maneri ta ghahe taremehau nira agho, e ghua.’

²⁵ !O hioi ghu hetamuna, ghatomane! Vununa ara na va hohoghonai God ta age riva ghinina ghatu manei heve e mala age riva ghini neke ghua ghinaguo ara.

²⁶ Ghe ghita mu, da kusu age tugha vonana ghatu ka keha ghizuna.”

²⁷ Ka ia va tazoi rodanana redu, dafe ini neke dafe kai ghai ngama, nake felo kadoli ghu ghai ia Tahi Adiria. Haeba e nona au bana nga ka ia hoatai redu, dike age nodi va ghilaghilai ghu ira maneriva ka vaka ini, nake to namona ghai ka keha malau.

²⁸ Di fatai ghu maneri ia kolo, neke age 20 kangafa hinaenana. Birusuna fafata leghuna lao ianimu, maneri dike age rivai fafatani, dike finini ghu neke to age 15 kangafana ma hinaenana ia kolo.

²⁹ Aiahi ghu, maneri dike to age maughedi ta paravaghi kalaena ka keha ghahipa, dike va hinaeri ghu keha rodana sighoto ka leghunao mo ia vaka. Ianimu tuna ghe dike tarai fangai nga ta mala mehana ia fegalana ravata.

³⁰ Ira maneriva ka vaka iahi dike va sisiva ta pelo kainina vaka ini; maneri dike va hinaei ghu ia tigi, taghe ta mala la kai hinaeri keha sighoto ka kenuna vaka ani mo dike ghua rivai sesebodira.

³¹ Ghe Polo neke kahe ghua iahi ka ia manefaana ia pukuna mane magara nia ka ira mane magara e ghua, “Mane irahi dito deo la gedi au hinae ghu ka vaka ini, ghau haroharo e deo go age doli ghu ghatu.”

³² La kodaka kairi tuna ira naroho neke posinio ia tigi, gedi va riufu laoi ghu ka tahio, dike ghua ira mane magara.

³³ Ka ia namo nganai fughona, Polo neke papadari maneri haroharo ta mahairira keha ghano. “Ghau noto ke puina anga ghemu noto ke deo ghu mahainimuna kaike ghano ghu giliodi tazoi rodana ravata,” ne ghua ghidi.

³⁴ “Ara na papada ghau ghu, ta mahairira keha ghano. Ghau o toraina hioi iahi mala va doli ghau ta auna ghu. Vununa e deo kaike ghu ka ghita ta age lemena ghatu.”

³⁵ Leghuna kahei iahi Polo, manei neke posi vonari keha bereti, ghe neke kudo vehai nga God ka kenudi maneri haroharo, ghe neke kipe kavei nga kaike kipena, neke mahaini ghu.

³⁶ Ianimu tuna ghe dike age hio gigima leghu nga maneri haroharo, dike age tataniga mahai ghedi haro ghu.

³⁷ Varigharamaina ghai nake hagheo ka vaka ini mu, 276 noni.

³⁸ Ka leghuna dike to mahai ghediro maneri haroharo dike age hoviriro ghu, maneri dike sakomo kai laori ka tahio ira kakodi witi ka vakana, mala va sasanoanaina ia vaka.

³⁹ Ne la fegala meha ghu ia fufugho, ira maneriva ka ia vaka, e deo gedi ke fini avohi ghu ia malau, nga dike finini kaike lovete ta garanga. Maneri dike va puhini ta mala va zuere vonaina aianimu vaka ani to boka la.

⁴⁰ Kodaka va luduru kai laori tuna ka tahio ira sighoto dike ghua. Ka fafata haro ianimu lama dike to sipa kairi ghu ira naroho dike mala posi va gimadiro ira palu leghahai gelu mala gilina ia vaka, mala edi boka poposi ghu mala gilinina ia vaka dike ghua. Ianimu tuna ghe dike va tetu vonai nga ia tepe ta ite ta au ka kenuna vaka ani mo, mala va bekoto toka ghini laona vaka ini ka garanga ani kalae.

⁴¹ Ghe vaka ini neke la tugha vona ka kaike boboka garanga ta luduru, neke la nohe va gima ghu ia kenuna manei. Ia leghuna vaka tuna geke age huara paparomoto ghu tabona ka ira leghahai boghuzu, neke ghua.

⁴² Ianimu tuna ghe dike va puhipuhi nga ira mane magara mala atungurira ira mane pipiliga, vununa ghatu edi zaha kalae edi pelo ghahe ghu maneri, dike ghua.

⁴³ Ghe ia manefaana ia pukuna mane magara, neke kabai hio va dolini Polo, neke va nodori ghu ira mane magara ta riva ghinina vatovato ianimu. Nga ne va kahe ghidi ira noni ta vovoho zaha ta kusu paraku hinaena ka tahio, ta zaha kalaena ghu ka kavao.

⁴⁴ Ianimu tuna ghe neke va kahe ghidi nga manei ira keha mane, ta zaha kalaena maneri ka ira takifina vaka, ba ka keha piata kaina manei. Iahi lamu nake riva ghinina ghu ghai, ghe nake boka sabara va veha haroharo nga ka kavao kalae.