Ira Riva 26 - Ia Foforuna Naiungene

Polo Ne Ngengene Ka Kenuna Agiripa

¹ Va kahe ghini lao tuna Polo neke ghua Agiripa, “Agho o boka ngengene mo tuna mala taga ghinighona taghou,” neke ghua ghini. Ianimu tuna ghe neke va tuhu vonai nga Polo ia kamena mala va melongo laona maneri, neke tatanigai kahe ghua ghu iahi taga ghinina taghonai:

² “Agho Mane Ginitaukela Agiripa, torai boka faana ka ara na meha tetu ghu ka kenuu ini agho ravata ini, mala taga ghinaguna taghogu ka leghu ta va tapata ghinagu idi nga ira noni Ziu,

³ vununa ara na avohigho mo agho, ta toraina avoho fikifokorira ira puhidi nia ira heve ta vari zea ghidi irahi ghai ira noni Ziu. Ara a fangaigho ghu ta au afana ma, ta nonomoho mehana ghu ka ara.

⁴ “Ira noni Ziu haroharo edi avoho va vehai fuludu ia kamotona doli ka ara, heve neke ghua auna ka ara ka ia tatanigaina meha ka ia soloso leghaha taghogu nia leghunana aianihi Zerusalemu, e ghua.

⁵ Maneri dito ke avoho mehau ara sepaoni, edi boka va kahe ghini ghau mo ghu nake holarana ara ka kaike pukuna noni Ziu ta va kudo ghidi Farisi, ira ta puina banabana leghu va vehaina ia vetula ka God.

⁶ Ghatunaina mu ara na meha tetu ghu aiahi ka giliona ia vari sukutuai, vununa ghini ia va hohoghona nia rangerange ka ara ghinina ia naiungene ka God neke vanadio ira faamai meha sepaoni.

⁷ Iahi lamu ghu mu ia naiungene di rangerange mala hioina ira tazoi palu butubutu ka ghai Isiraeli, edi va totoana ghini ghu God redu, ravata. Mane Ginitaukela agho, di makutuau nga ara noni Ziu irahi mu, vununa ara na rangerangei molamo naiungene ianimu.

⁸ ?Heve no ghua ghau noni ta au aiahi ghe, no nganai nga ta deona God boka ke va doli leghurira ira ta leme?

⁹ “Ara taghogu nake nganai molamo geala ta boka riva ghidira vahina leghutau nga ta boka mala tetu kaputina Zisas ia tanina Nazareti.

¹⁰ Ianimu lamu nake riva ghinina ghu ara aianihi Zerusalemu. Ka ia mana dike vanaguo ira hiama ta kenu, ara nake nai hagheleri ka pipiliga ira tehi nona noni God. Nia ka ia fafata tetu ira mane babatu ta atunguri ghu noni iranimu, ara nake va uvei geala ta mala lemena maneri.

¹¹ Tehi fafatani, ara nake va kilasari maneri ka giliodi ira suga mala varighara ira Ziu, mala va sisiva fihiki ghaherira maneri ka ia nodi va hohoghona ka Kraes. Ara nake toraina halau fuludu ka maneri, nake lao haro ghu ghe ka ira keha malau leghaha peghuruo mala ngovangovalarira.

¹² “Kaike ravata, ara nake lao ka ia malau leghaha Damasikasi ka ia mana nia ia varituhu ira hiama ta kenu, ta mala la riva ghini harona kokolona riva ianimu la.

¹³ Mane Ginitaukela agho, ka ia hoatai ravata, ara nake finini kaike fegala ta pelara fuludu laoi ia taunu la mehana ka kolangana fate, meha pelara lilohoauna ara nia ira mane dike ghahe leghuauro, e ghua.

¹⁴ Ghai haroharo nake riufu hinae ka kavao, nake nomohi ghu ara kaike leo ngengene mehauna ka ngengene Erameiki, ‘?Solo, Solo, heve no ghua ghe no ngovangovalau nga ara? Agho mu no va mukoigho ma taghou magarauna ara,’ neke ghua.

¹⁵ “ ‘?Hei mu agho Lod?’ nake ghua notohoguna ara. “ ‘Ara mu Zisas ta ngovangovalau nia agho,’ neke ghua ungene tughuna ia Lod.

¹⁶ ‘!Lao, tetu vona ka ghaheu nira! Ara na podolo ghinigho agho mala faetighona, ta mala nogu nonirivana ghu. Agho o va kahe ghidi ira keha noni heve no fininina agho ghatunaina ka ara, nia heve ta age va podolo vananighona ara ghatu, e ghua.

¹⁷ Ara ta age kagara ghinighona ghatu ka ira nou noni taghou ira Ziu nia ka ira noni taka Ziu ghu e ghua, ka ira ta va ghahe laoigho ara ghatu.

¹⁸ Agho o tobeheri ira hibadi, edi fihiki kaini ghu maneri ia nagoromo talaina ia fegala, nia edi taghuru kaini ghu ia mana ka Satana fihiki laona ka God, e ghua. Ianimu tuna ghe ge age kai hazari nga ira sasakedi, gedi age au taremehadi ghu ira nona noni ta beana God ka ia va hohoghonau ara.’

¹⁹ “E ghua ghu ianimu, Mane Ginitaukela agho Agiripa, ara e deo ghu gake huhughi ghu ia hahaima neke sipa mehao ka God.

²⁰ Ara nake tatanigai va kahe ghidi ira noni, geala maneri edi taghuru kairi ira sasakedi, edi fihiki lao ghu ka God, nia edi riva ghidi ghu ira leghutau ta veha mala va podolina dito holara hihingo mamu, ta ghuana, e ghua. Ara nake kusu va kahe vanadi ghu iahi ira nonidi Damasikasi, ghe nake lao nga Zerusalemu nia ka ia kamotona babarana Zudia e ghua, nia ke lao haro tuna ka ira noni taka Ziu ghu nake ghua.

²¹ Neke ghua mamu ghe, dike sakomoau nga ira noni Ziu, ka ira galahedi ka giliona ia Sugana God va sisiva atunguauna, vununa ara nake lao ka ira noni taka Ziu ghu.

²² Ghe God neke kagara ghinaguna ara, ghe na tetu nga ara aiahi ghatunaina va kahe ghidira leghu noni nga, ta ite ghe ta varanga ghu, heve nato ke fininina. Ara na kaheri ghu ma, heve e age dufu ghatu dike ghua ghidiro ira porofeti nia Mosese, e ghua,

²³ ia ta age vavahagala ia Mesaea nia e age va kenuna tuna ta mala tetu leghuna ka ia leme, mala va boka mehaina ia fegalana ia hio va doli maladira ira noni Ziu nia heiri ira taka Ziu ghu, e ghua, neke ghuao.”

²⁴ Turi ghua ngama iahi Polo taga ghinina taghonai, to kudo lao ghu Fesitasi buruaina manei, “!Polo, agho noto gogosu! !Neto fuludu ia hadu avoavoho ka agho neto age va kingoigho ghu!” neke ghua ghini.

²⁵ Ghe Polo neke ungene tughui, “Ara e deo ga gogosu ghu, Faghina leghaha agho Fesitasi. Ara na turi ghini ma ia ta hohoghona nia ia ta fafahaka, e ghua.

²⁶ Ia mane ginitaukela Agiripa, e avohori mo leghutau irahi. Ara a boka ngengene va nadu mo ghu turi taremehanana manei. Ara na avohi mo, leghu dike dufu irahi nga mu, neto ke nomohori mo manei, vununa eka riva ghidi poika mo ka kaike lobosaina.

²⁷ ?Mane Ginitaukela agho Agiripa, no va hohoghonari mo agho ira porofeti? Ara na avohi mo ta va hohoghonana agho,” neke ghua Polo.

²⁸ Kahe ghua tuna iahi ka Polo neke ghua Agiripa, “?Ka birusuna fafata tei iahi, o boka fihiki va noni kiloau mo ara, no ghua?” neke ghu ghini.

²⁹ Polo neke ungene tughui, “Geta ponoe ba sodu ia fafata ghe, ara na tarai fangai God, mala agho niala heiri haroharo ta nonomoho meha ka ara ghatunaina, go boka meha varifata la mo ka ara, na ghua. Nga ara mu e deo ga kabai ghini ghau ghu ta meha pipiligana ka seni, taghe ara ta ghuana.”

³⁰ Ianimu tuna ghe neke tetu vona nga, Agiripa ia Mane Ginitaukela, Fesitasi ia mane gavana, Benisi nia ira keha noni haroharo e ghua,

³¹ dike ghahe kaini ghu ia ringifota. Ka ia vari turi taghodi, maneri dike kahe ghua iahi, “E deo ma heve leghutau neke riva ghinina mane iahi ta boka fatai mala va lemeina, ba pipiliga ghinina manei,” dike ghua.

³² Ianimu tuna ghe neke kahe ghua nga iahi Agiripa ka Fesitasi, “Mane iahi mu geala eto ke boka va kavei mo, geke deo la manei ge fanga mala nomohi ghu Sisa puhi iahi ka manei.”