Ira Riva 25 - Ia Foforuna Naiungene

Polo Ne Fanga Ta Mala Hio Vonaina Ia Vari Sukutuai Ka Kenuna Sisa

¹ Ka ia va litona ravata, leghuna ia sabara ka Fesitasi ka babarana ianimu, manei neke sipa ka ia malau leghaha Sesaria neke vona lao ghu Zerusalemu.

² Aianimu ira hiama ta kenu nia ira keha mane babatu ka ira Ziu e ghua, dike la hio vonarira ira nodi vari va tapata ghini Polo ka kenuna manei. Maneri dike papadi Fesitasi

³ ta toka ghidina, e mala rizu laoi ghu Polo aianihi Zerusalemu dike ghua. Vununa maneri dike to va puhini ta mala atungina Polo ka hangana ani.

⁴ Ghe Fesitasi neke kahe ghua iahi, “Polo mu ne au ka pipiliga aianihi Sesaria nia ara tuna ake leghu lao haroma aianimu ghatu, e ghua.

⁵ Kehara ka ghau ira ta babatu, geala o leghuau age ghu ara aianimu. Neto au la mamu keha leghutau neke riva ghidi va zeara Polo, ghau o boka la hio vonari mo ira nomu vari va tapata ghini manei aianimu.”

⁶ Fesitasi neke au taremehadi aianimu keha hanau, ba tazo ravata, ghe neke leghu lao nga Sesaria. Ka ia keha ravata tuna, ge nohe ghu manei ka ia nonohe mala varifate ge kahe ghidi va gigima ghu ira mane magara ta hio laoina Polo ka kenuna taghonai, neke ghua.

⁷ Ne sabara meha ghu Polo, ira noni Ziu dike la hinae meharo Zerusalemu, dike la tetu lilohi manei, va tapata ghinina leghu kokolodi turi ta muko nga, ghe deo ma hae mo dike boka va dedekerira ira nodi turi.

⁸ Ianimu tuna ghe, neke ngengene vona nga Polo tetu kaputina taghona, “Ara e deo heve nake riva ghini va mukona ka ia vetula ira Ziu, ba ka ia Sugana God, ba ka ia mane ginitaukelana Romu,” neke ghua ghidi.

⁹ Fesitasi neke kabai hadu veha ka ira Ziu, neke notohi ghu Polo, “?Agho no lao hihingou mo ta laona Zerusalemu, ta age hioina ghu ara vari sukutuai iahi aianimu ghidira vari va tapata irahi?” neke ghua ghini.

¹⁰ Ghe Polo neke ungene tughui, “!Deo! Koti iahi lamu ta kuruina ia mana ka ia mane ginitaukelana Romu, geala aiahi lamu ta mala meha hioauna ghu ara ka vari sukutuai. Agho no avoho va vehai mo, ta deona heve nake riva ghini va mukona ara ka ira noni Ziu.

¹¹ Neto hotoau la riva ghidira ara ira leghutau ta fata mala age atunguauna maneri, ara e deo ga pake ghegu ghu lemena. Nga neto deo la gedi hohoghodi ghu leghu ta va tapata ghinagu irahi nga maneri mu, e deo hei ta kuruina mana mala nai laoauna ara ka maneri, vununa ara mu a holara ka ia Ravutuna Romu. Ara a fangai ghu taghonai Sisa ia mane ginitaukelana Romu ta mala nomohina vari sukutuai iahi.”

¹² Leghuna nonogele ghinina iahi Fesitasi ka ira nona mane mala va puhipuhi, manei neke kahe ghua iahi, “!Agho no fangai ta mala laona ka Sisa, o lao ghu agho ghatu ka Sisa!”

¹³ Leghudi keha ravatara, Agiripa ia mane ginitaukela ta kopu ghini Galili nia Benisi ia kerana fotati e ghua, dike la sabara aianihi Sesaria, mala la sigho ghinina Fesitasi ka ia nodi va vonavona.

¹⁴ Ka ira tehi ravata dike auro maneri aianimu, Fesitasi neke nonogele ghini puhi iahi ka Polo, ka ia mane ginitaukela kahe ghuana iahi, “Kaike mane pipiliga neke nakai kainio Filikisi, ta au iahi.

¹⁵ Ka ia augu ara Zerusalemu, ira hiama ta kenu nia ira mane babatu ka ira Ziu e ghua, dike makuti manei ka keha puhi ta muko, dike fangau ghu ara ta toraina mala kahe kaveina ne hotoi mamu manei geala e mala va lemei ghu, ta ghuana.

¹⁶ Nake va kahe ghidina ghu ara mu, ira puhi ka ira noni Romu, eka va malumi ghu ia noni ta mala va kilasina, neto deo la ge hio vonai ghu ka varisukutuai. Maneri edi kusu vananina kaike fafata, ta mala talarira manei ira noni dike makutio, e mala boka tetu kaputi ghu taghonai ka ia puhi ta va tapata ghini ani.

¹⁷ “Di la meha taremehagu ghu maneri aiahi, ara e deo gake va mamahugei ghu vari sukutuai iahi, nga ka ia toraina keha ravata lama, nake to nohei ghu ara ia vari sukutuai. Va kahe ghidi tuna ta hio haghele mehaina Polo, nake ghua.

¹⁸ Ghe ka ia tetu vonadi ta turi ghu ira ta vari hio vona, maneri e deo ma ghe gedi ke turi ghidi lao ghu ira puhi ta muko nake afa ghidiro ara.

¹⁹ Nga maneri mu, dike vari tuufuai taremehana ma manei, ghidira keha leghutau ka ia va hohoghona taghodi ira Ziu mo nia ghini ma kaike mane babaolonana Zisas ia ta ghua ghini neke lemeo, e ghua; ghe neke kaheina Polo tuna mu manei ne doli nga, ge ghua ghu neke ghua.

²⁰ Vununa ara nake to deo ga boka hadu kavei ghu heve mo mu ta hohoghonana ka puhi iahi, nake notohi ghu ara Polo, ge lao hihingona la manei mala la talaina puhi iahi aianihi Zerusalemu, nake ghua.

²¹ Ghe Polo ne fangai ta mala auna ma taghona ka pipiliga ta vuhai age nomohina ghu taghonai Sisa ia mane ginitaukela, puhi iahi ka taghona. Nake va kahe ghidi va gigima ghu ara ta nakai leghuina manei ka ia pipiliga, a vuhai boka va ghahe laoi ghu ara ka Sisa.”

²² Ianimu tuna ghe neke kahe ghua nga iahi Agiripa ka Fesitasi, “Ara na kabai nomohi haro molamo mane iahi taugu,” neke ghua. “Fugho ghe go age nomohi nga agho manei,” neke ghua ghu Fesitasi.

Polo Ne Tetu Ka Kenuna Agiripa

²³ Ka ia keha ravata, Agiripa ghe Benisi dike meha taremehana kaike leghahai nokolona noni va vonavona dike la haghele ghu ka ia ringifota mala haedu, taremehadira ira mane paudi ka ia punugara, nia ira keha mane ta kenu ka ia malau leghaha, e ghua. Ianimu tuna ghe neke ungene va gigima laori nga tuna Fesitasi ta hio haghele laoina Polo.

²⁴ Kahe ghua tuna iahi neke ghua Fesitasi, “Agho Ia Mane Ginitaukela Agiripa nia heiri haroharo ta au taremehada aiahi, e ghua: Iahi mu ia mane dike ngenengene ghinio ka ara ira noni Ziu aiahi Sesaria nia aianihi Zerusalemu e ghua, dike kudokudo ghinio ghu manei geala eka mala va dolini ghu, dike ghuaro.

²⁵ Ghe ara, e deo heve muko na fini tanana manei ta boka mala va lemeina. Ghe vununa manei neke fangai ia mane ginitaukela ta mala noheina varifate iahi, nake to va puhini ghu ara ta mala va ghahe laoina Romu.

²⁶ Ghe e deo heve toraina leghutau ta boka mala kakangava ghini laona ara ka ia mane ginitaukela ghinina mane iahi. Ianimu la ghe na hio mehai nga ara ka kenumu ghau haroharo, sughavona ghu ka agho Agiripa ia mane ginitaukela, mala leghuna hadu kaveri keha leghutau ghinina manei, a boka kuruau ghu keha leghutau ta mala kangava hinaeri ara.

²⁷ Vununa e deo ge fafahaka ghu mu, ta va ghahe laoina ia mane pipiliga ka Sisa ia Mane Ginitaukela, to deo la kahe va lotoro vanani laona ghidi heve muko neke toraina riva ghidira manei.”