Ira Riva 16 - Ia Foforuna Naiungene

Timoti Ne Riva Taremehadi Polo Ghe Saelasi

¹ Polo ghe Saelasi dike kusu laona nga ka ia malau leghaha Deribi, ghe dike lao nga tuna ka ia malau leghaha Lisitara. Aianimu dike la dufuina maneri palu kaike mane foforu ta va hohoghona babaolonana Timoti. Nona ukena manei mu kaike noni Ziu ta va hohoghona, nga nona mama mu noni Giriki.

² Ira noni ta va hohoghona ka ira malau leghaha Lisitara nia Aekoniamu e ghua mu, dike toraina ungene va vehai Timoti.

³ Polo neke kabai hio ghahe taremehana Timoti. Timoti mu fotana Ziu nia Giriki e ghua, vununa nona uke mu noni Ziu nia nona mama mu noni Giriki, e ghua. Ira noni dike va ngana ghini noni Ziu ghu manei, ghe vununa nona mama neke noni Giriki, dike avohi ghu maneri ta deona geke papahe va ghilaghila ghu manei. Mala va nodoina ia gumigumi ka ira noni Ziu ka malau ianimu, Polo neke papahe va ghilaghilai ghu Timoti.

⁴ Ka ia ghahe vari kadoloai ta lao ghu maneri ka ira malau fafaadi, maneri dike va kahe ghidi ira ta va hohoghona, ira nai puhi ta gigima ka ira mane nonomoho nia ira nonifaa e ghua, mala leghurira ira noni.

⁵ Ira kiloau dike age gigima ghu ka ia va hohoghona, nia age kodolo vai tehi laoni tuna ira noni leleghu ravata, dike ghua.

God Ne Kudoi Polo Ta Laona Aianihi Masedonia

⁶ Polo nia ira ta leghui manei e ghua, dike ghahe fuludu gilio ka ira babaradi Firizia nia Galesia e ghua, vununa ia Tarunga Ta Maduana, neke deo ge va malumuri ghu ta la tuturi beana ghinina ia Nonomoho Ta Veha ka ia babarana Esia ka fafata ianimu.

⁷ Di la dufu ghu maneri ka ia fofotaina ka ia babarana Misia, maneri dike va sisiva fihiki haghele lao ka ia babarana Bitinia, ghe ia Tarunga Ta Maduana neke tuhu laoio Zisas, deo geke va malumuri ghu ta laona maneri aianimu.

⁸ Ghahe fuludu tuna giliona mo Misia, gedi lao ghu ka ia malau leghaha Toroasi dike ghua.

⁹ Ka redu ianimu, Polo neke finini kaike hahaima. Manei neke finini kaike manena ka ia babarana Masedonia tetu ta papadina ghu taghonai Polo, kahe ghuana iahi, “O meha aiahi Masedonia, o meha toka ghini ghai ghu,” neke ghua.

¹⁰ Leghuna finini lama Polo hahaima ianimu, nake to va tana ghu ma ghai mala laona Masedonia, vununa ghai nato ke va hohoghonai, ta kudo ghaina God mala la tuturi beanana ghinina ia Nonomoho Ta Veha ka ira noni aianimu.

Lidia Ne Va Hohoghona Ka Zisas

¹¹ Ghai nake haghe ka kaike vaka tepe aianihi Toroasi, nake tepetepe kadolo lotoro lao ghu ka ia ghizunana Samoteresi. Ia keha ravata tuna gake tepetepe kave ghu la sabarana ka ia malau leghaha Niapolisi, nake ghua.

¹² Sipamaina aianimu, ghai nake ghaghahe ka kavao nake la dufu ghu ka ia malau leghaha Filipae, ka ia malau ta holara leghu noni nga ka ia Ravutuna Romu, nia e leghahai malau ta kenu ka ia babarana Masedonia e ghua, nake la au ghu aianimu keha ravatara.

¹³ Ka ia Ravata Mala Maghoso ira Ziu, ghai nake ghahe kave lao ka ia peghuruna malau leghaha ka kaike galahena peghuru ka ia gheremena ketuhu leghaha, ka nake nganaio ghai e au aianimu kaike malau mala tarai varighara ka ira noni Ziu, nake ghuao. La nohe hinae tuna aianimu, ga la turi taremehadi ghu ira vuro fotati dike varighararo aianimu, nake ghua.

¹⁴ Kaike ghu ka maneri mu, Lidia ia tanina ka ia malau leghaha Taeataera, ia ta tatabarai kodakadi poko leghaha ta omoꞌomo ta puina vona tabaradi. Manei mu kaike fotati taka Ziu ghu neke va totoana ghinio God, neke tobehio ghu God ia hihingona, nia va hohoghonari tuna manei heve neke kaheriro Polo, neke ghua.

¹⁵ Leghuna hioi ia seselebeana manei nia ira keha noni haroharo ka ia sugana e ghua, manei neke fanga ghai ta la au taremehadira ka sugadi ani, kahe ghuana iahi, “Noto nganai la ghau nato va hohoghona mamu ara ka ia Lod, ta ghuana, o meha o au ghu ka sugagu ini,” neke ghua ghidi. Manei neke toraina fanga va gigima ghai ghu ta la au taremehanana, nake lao ghu ghai.

Polo Ghe Saelasi Di Au Ka Pipiliga

¹⁶ Kaike ravata, ka ia fafata ghaghahe ta lao ghu ghai ka ia malau mala tarai ka ia gheremena ketuhu, ghai nake dufui kaike ghase foforu mala varituhu ta sukui tarunga ta muko. Manei e boka kusu kahe kenuri mo keha leghutau ta la au meha kenu mo, neke toraina hio va tehi vanadi rongo ghu manei ira manefaana ka ia riva ghini manei riva iahi.

¹⁷ Ghase foforu iahi neke kudo neke la meha ghu leghumai mo ghai Polori, kahe ghuana iahi, “Mane irahi mu nona noniriva ia God ta Varanga Sughavona, edi meha va kahe ghini ghau ghu ia ghaghahena mala hio va doli ghau,” neke ghua.

¹⁸ Tehi ravatani neke riva ghini ma neke laona ghu manei iahi, neke age puina zea vanani ghu Polo, neke ngengene ghua lao ghu iahi ka nazahi ta sukui ani manei, “Ka ia babaolona Zisas Kraes, ara a toraina ungene va gigimaigho ta kave kainina ghase iamu,” neke ghua ghini. Selu laoi ma ianimu to kave kaini ghu ghase ani ia nazahi.

¹⁹ Ira manefaana ghase mala varituhu ini, dike age finini ghu ia ghaghahena mala hio rongo ka maneri tato age noghana, dike age sakomori Polo ghe Saelasi dike koroho laori ghu ka ira vuro faghina ka ia malau mala makete, mala hiorina ka vari sukutuai.

²⁰ Maneri dike hio laori Polo ghe Saelasi ka ira manefate, dike la kahe ghua ghu iahi, “Mane irahi mu noni Ziu dike meha mala ngongovala ghu ka malau leghaha iahi ghai.

²¹ Maneri di vari va kakahe ghidi ira leghutau ta deo ge lotoro ghu riva ghidira ghita ira nonida Romu.”

²² Ia varigharana noni dike holara molamo mala magararira Polo ghe Saelasi. Ira manefate dike va kahe ghidi ira mane magara ta reku kai tadira ira pokodi Polo ghe Saelasi nia ta va bota ghidi hekena, e ghua.

²³ Leghuna ia bota va mukori, maneri dike kai hagheleri ka ia pipiliga. Ungene va gigimai tuna ia mane ta kopunai suga pipiliga ta toraina loke va gimarira, dike ghua.

²⁴ Ka ia kahe ghini va gigima maneri iahi, manei neke kai hagheleri maneri palu ka ia ringifota pipiliga ta au va gilio lao, toraina la piliga va gimarira ira ghahedi ka vari hoataidi ira kodakadi takifi ta tuta nia tahu, e ghua.

²⁵ E nona au ka hoatai redu, Polo ghe Saelasi dike tarai nia koze himu dike ghua, helahela ghinina God, dike nonomoho lao ghu ira keha noni pipiliga.

²⁶ Heve ba ne ghua ma, neto ke au ghu kaike leghahai kuzo, toraina kuzo kamotina ia suga pipiliga. Ira leghu makatana nga ka ia suga pipiliga dito ke tobehe nia ira seni ta lokeri ira leghu noni ta pipiliga nga tuna gedito age sopele kave ghu, dike ghua.

²⁷ Ne baghunu vona ghu ia mane ta kopunai pipiliga, neto finiri ghu tobehedira ira makatana. Dito pelo bana ira noni pipiliga neke ghua, neke koroho kavei ghu ia nona leboto sisilufu mala magara, va tanai atungina taghonai.

²⁸ Ghe Polo neke kudo lao ka manei, “!Oka atungigho ghu taghou! !Ghai haroharo na au mo aiahi!” neke ghua ghini lao.

²⁹ Ka ia nanazara maughena, ia mane ta kopunai pipiliga neke kudo fanga lao zuta, ghe neke purudu haghele lao nga tuna, neke la torongaghituturu hinae ghu ka kenudi Polo ghe Saelasi.

³⁰ La hio kaveri tuna ge la notohori ghu neke ghua, “?Ghau palu manefaa, heve ta toraina riva ghinina ara, ghe ge age hio va doliau nga?” neke ghua ghidi.

³¹ “O va hohoghona ka ia Lod Zisas Kraes, ghe ge age hio va doligho nga—agho nia ira noni haroharo ka sugauo agho, e ghua,” dike ghua ghini.

³² Ianimu tuna ghe, dike tuturi beana ghini nga ia saorona ia Lod, vananina manei nia ira ta au haroharo ka ia sugana, e ghua.

³³ Ka torai fafatana redu haro ianimula, ia mane ta kopunai pipiliga neke hiori maneri palu, neke la tihi va vehari ghu ira bakoradi. Manei nia ira noni haroharo ka ia sugana taghonai e ghua, magali ma dike age seselebeana ghu tuna, dike ghua.

³⁴ Ianimu tuna ghe neke hio laori nga manei Polo ghe Saelasi ka ia sugana taghonai, neke la va tana vanadi ghu keha ghano mala mahaina ka maneri palu. Taghonai nia ia suga kamoto ka manei e ghua, dike age toraina va ghazaghaza ghu, vununa maneri haroharo dike to va hohoghona ka God.

³⁵ Ia keha fufugho, ira manefate ka malau leghaha ini, dike tuhu laori ira keha mane magara ta la kahe ghinina mane ta kopunai pipiliga ini, mala va kaverira Polo ghe Saelasi.

³⁶ Ia mane neke kopunai pipiligao neke la va kahe ghini ghu Polo, “Ira manefate dike va meha ngengene ta mala va kave ghauna ara. Ghau palu to boka ghahe ghemu mo ghu ka ia bule,” neke ghua ghini.

³⁷ Ghe Polo neke kahe ghua iahi ka ira mane magara, “Heve ta va riva ghini ghai iahi ira manefate, e deo ge leghuri ghu ira vetula ka ia Ravutuna Romu. Geta holara ghu ghai ka ia Ravutuna Romu ghe, maneri e deo ma gedi ke hio vona ghai ghu ka vari sukutuai, dito ke bota ghai ghu ka kenudi ira noni, kai haghele ghaina ka pipiliga. ?Heve, di kabai vanemoho ghini ma edi va ghahe ghai ghu, di ghua? Toraina deo ge boka ghua ghu ianimu. Taghodi ira manefate ta toraina mehana aiahi, ta meha hio kave ghaina ghu.”

³⁸ Ka ia la turi vanadi ira mane fate ira mane magara, ta holarana Polo ghe Saelasi ka ia Ravutuna Romu, ira manefate dike age maughedi.

³⁹ Lao tuna ka ia suga pipiliga, gedi la kahei ghu, taghe dudumana ka ia va zezea taghodi ta ghuana, dike ghua. Ianimu tuna ghe dike la hio kaveri nga, dike fangari ghu ta kave kainina malau leghaha ani.

⁴⁰ Ianimu tuna ghe, dike leghu nga Polo ghe Saelasi ka ia sugana Lidia, ka dike la finiriro ira ta va hohoghona, dike la va gigimari ghu kaike fafatani, ghe dike ghahe kairi nga.