Ira Riva 11 - Ia Foforuna Naiungene

Pita Ne Va Fafahakari Neke Riva Ghidiro Manei.

¹ Ira mane nonomoho nia ira keha noni ta va hohoghona ka Zisas ka ira leghu pelodi nga ka ia babarana Zudia, dike nomohi tato va hohoghona harona ka God ira noni taka Ziu ghu.

² Ghe ka ia vona laona Pita ta la sabara ghu aianihi Zerusalemu, kehara ka ira noni Ziu ta va hohoghona dike kahei, Pita neke huhughi ia vetula dike ghua. Maneri dike kabai ghini tudu ma ira noni ta va hohoghona taka Ziu ghu ta hioina ia papahe va ghilaghila.

³ “!Agho noke haghele ka ira sugadi ira noni taka Ziu ghu nia noke la mahai taremehadi e ghua!” dike ghua ghini.

⁴ Ianimu tuna ghe neke tetu nga Pita neke va kahe ghidi ghu heve neke toraina dufuna.

⁵ “Kaike ravata, ara nake au ka ia malau leghaha Zopa nake tarai ghu. Na tarai ghu ara, heve ba ne ghua ma, nato ke finini ghu kaike hahaima. Leghutau taghe kaike leghahai kodakana poko ta fedara ta sugori ka ira rodana va kukuruna neke la va hinae mehaina ka kolangana fate, toraina hinae lotoro mehana ka ara.

⁶ Na fini va veveha lao ghu ara ka giliona kodakana poko ta fedara ani, nake finiri ira papausu nia ira va vuha taka namaha ghu, e ghua; ira totoli adogho nia memeha, e ghua.

⁷ Nomohi tuna kaike leo kahe ghuana iahi nake ghua, ‘Tetu vona Pita; atunguri, o mahairi ghu,’ neke ghua ghinagu.

⁸ “Ghe ara nake kahe ghua iahi, ‘Toraina deo Lod,’ nake ghua ghini, ‘ara e deo kalasu kai nga gake mahairi ghu ira leghutau ta toraina beana ka ia vetula ghai ira Ziu.’

⁹ “Ghe ia leo ka kolangana fate neke la mehani, ‘Leghutau e veha mo mahairina neto ghua la God, di sota e beana ghu mahairira oka ke ghua ghidi ghu agho.’

¹⁰ “Lito fafata neke podolona leghutau iahi, ghe neke koroho vona leghu kamoti nga tuna ka kolangana fate.

¹¹ Ka toraina fafata ianimu lama, to dufu meha ghu ka ia suga nake auo ara, lito mane dike tuhu mehariro ka ara maneri, sipadira ka ia malau leghaha Sesaria.

¹² Ia Tarunga Ta Maduana neke va kahe ghinagu taka ngana palupalu ghinina ghu la leghurira. Onomo mane taremehagu ta va hohoghona haro irahi dike leghuauna, nake la haghele ghu ghai ka ia suga Konileasi.

¹³ Manei neke turi vanamai ira ngengene ka ia engizeli neke la podolo ghinio ka ia sugana, neke kahe ghuao iahi, ‘O tuhu laori kehara aianihi Zopa, edi la kahe ghini meha ghu Saemoni Pita.

¹⁴ Ka ira ngengene ta age va kahe ghinigho manei ghatu, ta mala age hio va dolighona agho nia heiri haroharo ta au ka sugau nia, e ghua,’ neke ghuao.

¹⁵ “Na tataniga turi vanadi ghu ara ia nonomoho ka God, ia Tarunga Ta Maduana neke hinae meha ka maneri, taghe neke ghuao la ka ia mehana ka ghita ka ia tatanigaina.

¹⁶ Ianimu tuna ghe, nake ngana leghuri nga ara ira ngengene ka ia Lod neke kahe ghuao iahi, ‘Zone mu neke rivai seselebeana ka kolo, nga ghau mu o age seselebeana ka ia Tarunga Ta Maduana,’ neke ghuao.

¹⁷ ?Neto ke God la neke vanadina ira noni taka Ziu ghu ia Tarunga Ta Maduana taghe neke vanada harono la ghita ka ia va hohoghonai ia Lod Zisas, hei ghu mu ara ta boka va nodoina God?”

¹⁸ Di nomohi ghu iahi maneri, dito nodo ma vari tuufuaina, dito ke helahela ghini ghu God kahe ghuana iahi, “God neto va malumuri haro ghe ira noni taka Ziu ghu, ta fihiki laona ka taghonai, ta hioina ghu ia doli soduai,” dike ghua.

Ia Kiloau Aianihi Anitioko

¹⁹ Ka fafata iahi, ira ta va hohoghona ka ia Lod dike va pirarariro ka giliona ia vari ngovangovala leghuna ia atungi maneri Sitivini, dike ghahe hauai lao ka ia babarana Fonisia, ka ia ghizuna Saeparasi nia ka ia malau leghaha Anitioko e ghua, tuturi ghinina ia nonomohona Zisas ka ira noni Ziu lama.

²⁰ Ghe kehara ka noni ta va hohoghona irahi mu, dike tanidi Saeparasi nia ka ia malau leghaha Saerini e ghua. Ka ia laodi Anitioko, maneri dike ngengene taremehadi haroma ira noni taka Ziu ghu, tuturi vanadina ia Nonomoho Ta Veha ghinina ia Lod Zisas.

²¹ Ia mana ka ia Lod neke au ka maneri, dike va hohoghona ghu tehi nonini taka Ziu ghu, fihiki laona ka ia Lod.

²² Ia nonomohona iahi neke dufu ka ia kiloau aianihi Zerusalemu dike tuhu laoi ghu maneri Banabasi aianihi Anitioko.

²³ Ka ia la sabarana aianimu ta la finini ghu manei ta va beanarina God, manei neke puina va manemane. Manei neke va gigimari ghu maneri haroharo ta au tuduna ka ia hohoghona vananina ia Lod, ka ira hihingodi kamoto.

²⁴ Banabasi mu neke kaike mane ta veha, neke foudi ghu ia Tarunga Ta Maduana nia va hohoghona e ghua, dike age tehi fuludu laoni ghu noni dike age leghuina ia Lod.

²⁵ Ianimu tuna ghe neke lao nga Banabasi ka ia malau leghaha Tarasasi la haduina Solo.

²⁶ Ne la dufui ghu, manei neke hio leghu laoi aianihi Anitioko. Kaike komuhu kamotona maneri palu dike vari dudufu taremehadi ira noni ta va hohoghona nia va kakahe ghidi tehi nonini, dike ghua. Aianihi Anitioko lamu dike kusu va kudo ghidi noni kiloaura mu, ira ta va hohoghona.

²⁷ Ka fafata ianimu, keha mane porofetira dike sipadi Zerusalemu dike hinae lao ghu Anitioko.

²⁸ Kaike ghu ka maneri babaolonana Agabasi, neke tetu vona neke kusu kahe kenui ghu ka ia mana ia Tarunga, ta age auna ghatu kaike leghahai songe hae ghe hae ghu ka malau iahi peka. (Iahi mu neke age dufu ka ia tetu kopuna Kolodiasi.)

²⁹ Ira noni ta va hohoghona aianihi Anitioko, dike nonogele ghini ta mala varighara ghidira ira sopai nodi toka ta leghuri ira boka ka maneri, ta mala vanadi laora ghu ira taremehadi noni ta leghui Zisas aianihi Zudia.

³⁰ Varighara ghidi tuna ira rongo gedi vanadi lao ghu Banabasi ghe Solo dike ghua, mala hio vanadi laora ira ta babatu ka ia kiloau Zerusalemu.