Ira Riva 10 - Ia Foforuna Naiungene

Konileasi Ne Kudoi Pita

¹ Kaike mane taka noni Ziu ghu babaolonana Konileasi, neke auna ka ia malau leghaha Sesaria. Manei mu neke manefaana kaike ghobi mane magara ka giliona kaike pukuna punugarana Romu ta va kudo ghini ia pukuna Itali.

² Konileasi mu kaike mane neke va sisiva tudu riva ghidira ira heve ta veha vanani ia God na Isiraeli. Manei nia ira keha noni haro dike auro ka suganao e ghua, dike va totoana ghini ia God ta hohoghona. Manei neke toraina suteri fuludu ira noni Ziu ta kuma toka ghidira nia neke tarai lao tudu ma ka God, e ghua.

³ Kaike ravata ka fatana nakele lito ghu leghuna ia hoatai ravata, manei neke finini ka kaike hahaima la mehanana kaike engizeli ka God ta la kahe ghuana iahi ka manei. “!Konileasi!” neke la ghua.

⁴ Konileasi neke mato dodoghohoto ghini lao ia engizeli taremehana maughena. “?Heve no kabai ghinina Lod?” neke ghua lao ka ia engizeli. “!God to nomohori ira nou tarai nia to avohori haro ira nou tufa ta vanadi agho ira ta kuma, e ghua!” neke ghua ia engizeli.

⁵ “Ghe ghatunaina agho o tuhu hinae laori keha manera aianihi Zopa, edi la hadu mehai ghu kaike mane babaolonana Saemoni Pita.

⁶ Manei e au taremehana Saemoni ia mane ta rivai leghutau ka kafuna bulumakau. Sugana ka manei mu e au ka ia gheremena tahi.”

⁷ Ka ia neke to ghaheno ia engizeli, Konileasi neke kudori keha palu ghu ka ira nona maneriva nia kaike ghu ka ira nona mane magara, neke riva vananio manei, e ghua. Manei mu neke va hohoghona ka ia God ira Ziu.

⁸ Manei ne turi vanadi heve neke dufuno, ghe ne tuhu laori nga tuna aianihi Zopa.

Pita Ne Sigho Ghini Konileasi

⁹ Ka ia keha ravata, haeba namo ka ia hoatai ravata, di la namo dufu ghu ira lito mane ka Konileasi ka ia malau leghaha Zopa, Pita neke vona lao ka ia fatena suga ta sare neke la tarai ghu.

¹⁰ Manei neke age nona liha neke kabai mahai ghena ghu. Dike va tanai ngama maneri ia mahai, neke to fini ghu manei kaike hahaima.

¹¹ Manei neke finini ia kolanga tobehena, ghe neke finini nga la hinae mehanana ia leghutau taghe kaike leghahai kodakana poko ta fedara ia ta ghua, la va rekete hinae mehaina ka ira rodana va kukuruna.

¹² Ka gilionani, ira leghu va vuha ta beanadi ira Ziu taghe pusiri meusuri, vaduri, totoliri adoghori, nia memehari e ghua, dike aura.

¹³ Ianimu tuna ghe, neke kahe ghua lao nga iahi ka manei kaike leo, “!Tetu vona Pita; atunguri, o mahairi ghu!” neke ghua ghini.

¹⁴ “!Toraina deo Lod!” neke ghua Pita. “!Toraina deo kalasu kai nga ga mahairi ghu ara ira leghutau ta beana mahairira!”

¹⁵ Ianimu tuna ghe neke kahe ghuani nga iahi ka manei ia leo, “Ira leghutau di kalasa nia veha mo mahairira to ghua ghidi la God, di sota nia beana, oka ke ghua ghidi ghu agho.”

¹⁶ Iahi neke dufuna lito fafata, ghe neke magali koroho vona leghui nga tuna ka kolangana fate ia kodakana poko ta fedara.

¹⁷ Pita neke hadu ghini ngangana ngama neke au ghu heve mo fafahakanana hahaima iahi, dike to la hadu dufui ghu ia suga ka Saemoni ira mane neke tuhu laoriro Konileasi, la tetu tuna peghuru ka ia makatanana ia tatalana ta babara, dike ghua.

¹⁸ Notoho laoi tuna ge au la Saemoni Pita aianimu ta ghuana, dike ghua.

¹⁹ Kabai hadu va fafahaki ngama Pita fafahakanana hahaima ini, neke to la kahe ghua ghu iahi ka manei ia Tarunga Ta Maduana, “Lito mane ta meha haduigho ari agho.

²⁰ Hinae lao, o la leghuri ghu. Oka ngana palupalu ghini ghu la leghurina, vununa ara nake tuhu meharira,” neke ghua ghini.

²¹ Hinae lao tuna ge la kahe ghua ghu iahi neke ghua Pita, “Ara lamu mane ta hadui nia ghau. ?Heve mo no kabai ghinina ghe, noke la meha nga?” neke ghua ghidi.

²² “Konileasi ia manefaana kaike ghobi mane magara ka giliona kaike pukuna punugarana Romu neke tuhu ghai mehana,” dike ghua. “Mane iahi mu kaike mane ta veha ta va totoana ghini ia God ka ira Ziu, nia ta toraina va vonavonai leghu noni Ziu nga, e ghua. Kaike engizeli ka God neke va kahe ghini manei ta mala kahe ghinighona agho, ta laona ghu ka suga ani manei, e boka nomohori ghu manei heve ta toraina mala va kahe ghidira agho, neke ghua.”

²³ Fangari tuna lito mane idi ta haghelena ka suganani mala au taremehanana redu ianimu, neke ghua. Ia keha ravata, Pita nia ira keha nonidi Zopa ta va hohoghona haro ka ia Lod, dike leghurira lito mane dike sipa mehadi irahi ka Konileasi.

Pita Ne Tuturi Beana Ka Ira Noni Taka Ziu Ghu

²⁴ Ka ia keha ravata, maneri dike to la dufu Sesaria. Konileasi neke afa ghidi neke au ghu maneri, neke kudo varighara ghidi haro ghu ira taremehana nia ira nona baere ta namo, e ghua.

²⁵ Ne ghahe haghele ngama Pita ka ia suga, neto la torongaghituturu hinae ghu Konileasi ka ira ghahena Pita, va totoana ghinina.

²⁶ Ghe Pita neke koroho vonai neke va kahe ghini ghu, “!Tetu vona! !Ara mu kaike noni taghe agho lama!” neke ghua ghini.

²⁷ Pita neke turi taremehana ma Konileasi neke haghele ghu manei ka ia suga ka neke la finiriro manei ira tehi noni dike varighararo.

²⁸ Va kahe ghidi tuna, neke ghua Pita, “!Ghau to avohi ta beanana ka ia vetula ghai ira Ziu ta meha haghelena ara ka kaike suga ira noni taka Ziu ghu. Ghe God neto va podolo vanagu ara taka va ngana ghidira ghu ira keha noni taghe di sota, ba di deo gedi beana ghu maneri ka ira nahalina God, ta ghua ghidira.

²⁹ Ianimu la ghe, no meha ghahe leghuau ghu ghau, na magali meha nga ara. ?O va kahe vanagu meha ghu, heve noke ghua ghe, noke meha ghahe leghuau nga ghau?”

³⁰ Ungene tughui tuna neke ghua Konileasi, “Lito ravata ta lao idi, ara nake tarai ka giliona ia sugagu ka nakele lito ghu leghuna ia hoatai ravata, taghe namo ka fafata haro iahi la ghatunaina. Heve ba, ne ghua ma, neto la tetu meha ghu kenugu mo kaike mane ta pilimu palamu ira pokona,

³¹ kahe ghuana iahi, ‘!Konileasi, God neto nomohori ira nou tarai nia to finiri ira namaha tufa ka agho ta vanadi ira noni ta kuma, e ghua!’ neke ghua ghinagu.

³² ‘Tuhu laori keha manera aianihi Zopa, edi la hio mehai ghu Saemoni Pita ia ta au taremehana Saemoni, ia mane ta rivai leghutau ka kafuna bulumakau, ta kurui kaike suga ka gheremena tahi ani.’

³³ Magali ma tuna, gato ka va ghahe ghinigho age ngengene ghu nake ghua, neke puina veha fuludu ghu la mehana agho. Ghai haroharo nato au ghu aiahi ka kenuna God mala nomohorira ira vahina leghutau nga neke ungene va gigimaighono ia Lod ta mala va kahe ghini ghaina ghai.”

Pita Ne Tuturi Ka Ira Taka Ziu Ghu

³⁴ Ianimu tuna ghe neke tatanigai tuturi nga Pita, “Ghatunaina ghe ga torai fini avohi nga tuna ara mu, leghu noni nga edi varifata ma ka God ta ghuana.

³⁵ Ka ira leghu soloso nga, God e hioi haroma hei noni ta ghuana ta va totoana ghinina manei nia ta riva ghidira ira heve ta lotoro, e ghua.

³⁶ Ghau to avohi ia nonomoho neke va ghahe laoio God ka ira nonidi Isiraeli, tuturi ghinina ia Nonomoho Ta Veha ghinina ia bule ka Zisas Kraes ia Lod ka ghita haroharo.

³⁷ Ghau to avohi heve neke dufuna ka giliona ia babarana kamoto Zudia, neke tatanigao ka ia babarana Galili leghuna ia tuturi beana ka Zone ka ira noni ghinina ia Seselebeana.

³⁸ Ghau to avohi haroma Zisas ia tanina Nazareti neke va foudio God ka ia Tarunga Ta Maduana nia mana. Ghau no avohi mo heve neke ghua Zisas ghaherira leghu pelodi nga, riva ghidira ira leghutau ta veha nia va veharira ira leghu noni dike auro nga ka pekana ia mana ia Faghinadi ira nazahi e ghua, vununa God neke au taremehana manei.

³⁹ “Ghai nake fini hibamai vahina leghutau nga neke riva ghidiro Zisas aianihi Zudia nia Zerusalemu, e ghua. Ianimu tuna ghe dike atungi nga tuna manei ira noni babatudi Zerusalemu, tupila ghinina ka ia hekefalahata.

⁴⁰ Ghe God neke va tetu leghui manei ka ia leme leghuna lito ravata. Ianimu tuna ghe, neke va podolini nga,

⁴¹ ghe eka ghua ghu ka ira noni Ziu haroharo, nga ka ghai neke kusu faete ghaino God lama—ghai nake mahai ketuhu taremehanao Zisas leghuna ia tetuleghu ka manei ka ia leme.

⁴² Manei neke toraina ungene va gigima ghai ghu, ta tuturi beana vanadira ira noni, ta va kahe ghidira ghu Zisas lamu ghu mu ia faetaina ka God mala faterira ira ta doli nia ira ta leme e ghua.

⁴³ Ira leghu porofeti nga dike turi ghini ta age kai hazari ghatu manei ira sasakedi ira noni haroharo ta va hohoghona ka ia babaolona manei.”

Ira Noni Taka Ziu Ghu Di Hioi Ia Tarunga Ta Maduana

⁴⁴ Tuturi ngama neke au ghu Pita, neto ke hinae meha ghu ia Tarunga Ta Maduana ka ira leghu noni dike nonomohoro nga ka ia nonomoho.

⁴⁵ Ira noni Ziu ta va hohoghona dike leghu mehaio Pita, dike age nodi fere fuludu fininina ia kaikadolona ia Tarunga Ta Maduana ghasolo hinae harona ka ira noni taka Ziu ghu.

⁴⁶ Noni Ziu ta va hohoghona irahi dike avohi mo neke hohoghona iahi, vununa dike nomohori ira noni ngengenedira ka ira sopai ngengene, helahela ghinina God. Neke notoho ghu Pita,

⁴⁷ “?E boka mo hei noni ta va nodorira noni irahi hioina ia seselebeana ka kolo? Maneri molamo tato hioi ini ia Tarunga Ta Maduana taghe dake ghuao la ghita.”

⁴⁸ Kahe va gigimai tuna neke ghua Pita ta seselebeanana maneri ka ia babaolona Zisas Kraes. Ianimu tuna ghe dike fangai nga Pita maneri take au taremehadi laonani keha ravata terira.