Hiburu 8 - Ia Foforuna Naiungene

Kraes Mu Ia Noda Hiama Pauna

¹ Iahi ghu mu torai ghanonana ta turi ghini iahi ghai: Ghita mu e kuru ghita kaike Hiama Pauna ta nohe hinae ka ia malau va vonavona ka mautunao mo God ka malaunao fate.

² Aianimu neke rivana manei ka ia galahena ta toraina maduana ka giliona ia toraina suga tapole ta maduana neke va tetuio ia Lod, nga eka ghua ghu ka ira kamedi noni.

³ Vununa leghu hiama paudi nga mu edi toraina mala rivai veala nia kudoveha, e toraina riva ghini haro ghu molamo Hiama Pauna iahi kaike veala.

⁴ Geke au la Zisas ghatunaina ka malau iahi peka, manei geala e deo ge boka meha kaike hiama ghu, vununa ghatunaina to kusu au ira hiama mala riva ghidira ira veala ta leghui ia vetula ka Mosese.

⁵ Maneri dike riva ka giliona kaike galahena ta maduana ta kaike totoghalena heve ta auna ka malauo God fate. Neke ghua mamu God ghe, neke kahe ghini va gigima nga Mosese ka ia fafata va tanai riva ghini manei ia Suga Tapole ta Maduana ka ngengene irahi: “O toraina riva ghidi agho ira vahina leghutauna nga Suga Tapole ta Maduana nia, leghuina ia totoghalena nake va podolo vananighono ara ka vuhuku ani.”

⁶ Nga ghatunaina mu Zisas ne kurui kaike riva beana ta toraina tongovona fuludu laori ira riva ka ira hiama dike rivaro ka malau iahi peka. Nia God ne vanani Zisas ia varivehai foforuna ta tongovona fuludu laoi ia varivehai sepa mala vanadina ira nona noni. Vununa ira leghutau neke naiungene ghidiro God vanadana ghita ka ia varivehai foforuna mu edi toraina veha fuludu laori ira leghutau neke naiungene ghidiro manei ka ia varivehai sepa.

⁷ Geke deo la ta zeana ka ia sesepana varivehai, geala e mala heve ma ghe ge holari nga ka kaike va paluna varivehaini.

⁸ Ghe God neke finiri ira noni dike zeana maneri neke kahe ghua ghu iahi: “!Nonomoho! Ka ravata ta meha ari nga kenu mo, ne ghua ia Lod, ta age riva ghinina ara ghatu kaike foforuna varivehai taremehadira ira nonidi Isiraeli nia taremehadira ira nonidi Zuda, e ghua.

⁹ Varivehai iahi mu e age haza ka nake vanadio ara ira faadi maneri, ka ia fafata posiri ara ira kamedi mala batu ghidi kavena Izipi. Vununa maneri dike huhughi ia varivehai ka ara, nake taghuru kairi ghu, ne ghua ia Lod God.

¹⁰ Nga iahi mo mu foforuna varivehai ta age riva ghinina ara, ka ira nonidi Isiraeli ka ravata ianimu, ne ghua ia Lod God: Ara a age nakairi ira nogu vetula ka ira nganganadi, nia kangava laori ka ira hihingodi, e ghua. Ara a age nodi God maneri, nia maneri gedi age nogu noni ghu ara, e ghua.

¹¹ E deo hei take mala va kakahe ghinina ia noni taremehana, ba ta kaheina, ‘Agho geala o avohi ia Lod,’ ta ghuana ka vari taghodighi, vununa maneri haroharo edi age avohoau ara, tataniga ka ira rekahadi noni dufu ghu ka ira ta noni faa.

¹² Vununa ara a age kai hazari ira muko ka maneri nia a toraina age nganakairi ira sasakedi maneri, e ghua.”

¹³ Ka ia tuturi ghini God “kaike foforuna varivehai” ta ghua ini mu, fafahakanana ia varivehai ta kenu to sesepa e ghua ka manei. Heve ia ta sesepa nia namo mukona mu, e age magali deo ghini.