Galesia 1 - Ia Foforuna Naiungene

Va Kenuna Pagahaina: Polo Ne Tetu Ghini Va Gigima Ia Varisute Ta Vanada Kakato God. 1:1–2:21 Ira Ungene Veha Ka Polo

¹ Ara Polo ia mane nonomoho nake kangavina leta iahi. Ara mu eka faeteau mo kaike pukuna noni, ba kaike noni ta kurui mana mala kopu, nga taghonai Zisas Kraes nia God ia Mama neke va tetu leghuio Zisas ka ia leme mo mu, neke faeteauna.

² Ira leghu noni ta va hohoghona nga ta au irahi di holara taremehagu ara va ghahe age nodi ungene vehana ka ira noni ta va hohoghona aiamu Galesia.

³ Ara na verevere fangai God ia noda Mama nia ia Lod Zisas Kraes, e vanamu ghu ia bule nia ia nona varisute ta vanamu kakato.

⁴ Kraes neke nomohi God ia noda Mama neke vanada ghu taghonai taghe kaike veala maladira ira sasake ka ghita, mala hio va doli ghitana ka ira nganganadi nia puhidi ta muko ira noni ka malau iahi peka.

⁵ Ianimu tuna ghe ge age toghunai nga helahela ghinina ghita God. Amen.

Kaike Nonomoho Ta Veha Mo

⁶ !Ara na nogu fere ka ghau! E deo ma ge sepa ghu, to fihiki kaini ghu ghau God ia neke kudo ghauno ka ia nona namaha nia varisute mala hio tufana ka ia doli soduai ta va mehai manei ka Kraes. Ghau mu noto leghui keha nonomoho ta vehana mo.

⁷ Ghe e deo mu keha nonomoho ta vehanani. Ghau mu dito va kingo ghau ira noni ta fihikini ta holari ghu ia hohoghona ghini Kraes.

⁸ Geta ghua ghu ghai ba kaike engizeli ka malauo God fate, nato tuturi beana va haza la ka ia Nonomoho Ta Veha nake tuturi beana vanamuo ghai, geala e veha ta sakomo kai laoina mane ianimu God ka giliona totoi ta doli fuludai aiani Gehena.

⁹ Ara ake kaheini heve nake to kaheio ghai sepao: Hei noni neto tuturi beana ghini la kaike nonomoho ta veha ta haza ka ia noke hioio ghau, geala e veha ta age sakomo kai laoina mane ianimu God ka giliona totoi ta doli fuludai aiani Gehena, nake ghuao.

¹⁰ !Ara mu e deo ga ghorevaha ghini ghu mala veha vanadira ira noni, nga na kabai ghini ta veha vananina God! Gake kabai ghini la ara ta veha vanadira ira noni, ara mu geala e deo ghu gake nona noni riva ghu Kraes.

Ia Nonomoho Ka Polo Mu E Meha Ka Kraes

¹¹ Ghau taremehaguro, ara na kabai ghini ghau ta avohina ta deona hei neke suna riva ghini vonana mu Nonomoho Ta Veha ta tuturi ghini beana iahi ara.

¹² Nonomoho iahi ka ara mu, neke toraina vanagu meha va lotoro taghonai Zisas Kraes, ka ia fafata podolo ghinagu manei. E deo hei keha noninani neke va kakahe ghinaguna ara.

¹³ Ghau to avohi taghe heve nake ghua ara leghurira ira ghaghahedi va totoana ghini God ka ghai ira Ziu. Vununa ara nake ghua ianimu, nake toraina ngovala va mukoi ghu ia kiloau ka God, toraina ghorevaha va gigimana mala huara va mukoina.

¹⁴ Ara nake leghuri ira ghaghahedi va totoana ghini God ka ira Ziu fuludurira ira keha noni Ziu ta varifata komuhudi ka ara, nake toraina va sisiva ghu ta leghu va vehari harora ira leghu puhi sepa nga ka ira faagu.

¹⁵ Ghe God ka ia nona varisute ta vanada kakato neke kusu faeteau, ghe nake doli nga ara, neke kudoau ghu ta mala riva vananina. Neke lao hihingo ghini ghu manei,

¹⁶ ta mala va podolina ia Tuunamane ka ara, a mala boka va podoli ghu ara ia Nonomoho Ta Veha ghinina Zisas ka ira noni taka Ziu ghu. Ka ia fafata dufuna iahi, ara e deo gake bobolo kave lao mala hio tatangana ghu ka hei noni.

¹⁷ E deo haroma gake vona lao ghu ani Zerusalemu mala la nonogele taremehadira ira dike kusu mane nonomohoro kenugu ara. Nga nake ghahe la haghele ani ka ia Babarana Arabia mo, ghe nake leghu lao nga tuna leghunana, ka ia malau leghaha ani Damasikasi.

¹⁸ Ianimu tuna ghe nake lao nga Zerusalemu leghuna lito komuhu, mala la sigho ghinina Pita, nake la au tana ghu manei tazoi gaha ravata.

¹⁹ Kehanani ka ira mane nonomoho nake dufuina ara mu Zemesi, ia tahina mane ia Lod lama.

²⁰ Ara a kahe kavei ghu ka kenuna God, ta deona ga sebo ghegu ghu ka heve ta kakangava ghidi age idi ara ka ghau.

²¹ Leghuna sigho ianimu, ara nake ghahe vai lao ka ira babaradi Siria nia Silisia, e ghua.

²² Ghe ira noni ta va hohoghona ka ira kiloau aianihi Zudia, e deo soni ngama gedi ke avoho va vehau ghu ara.

²³ Dike avohina maneri mu, ira ngengene ta ghua iahi lama ka ira noni, “Ia mane neke fani ngovangovala ghitao mu, neto ke tuturi beana ghini ia va hohoghona neke ghorevaha ghinio manei mala ngovalina,” ia ta ghua lama.

²⁴ Maneri dike helahela ghini ghu God, vununa ka heve neke va riva ghinaguo ara manei ka ia doli ara.