Filimoni 1 - Ia Foforuna Naiungene

Va Kenuna Pagahaina: Polo Ne Riva Ghini Ia Tarai Kudo Veha Vanani Filimoni 1:1-7 Ira Ungene Veha Ka Polo

¹ Leta iahi mu na kangavi ara Polo. Ara mu na au ghu aiahi ka pipiliga, vununa ka ia tuturi ghini beana ia Nonomoho Ta Veha ghinina Kraes Zisas. Leta iahi mu sipana haroma ka Timoti ia tahida mane ka Kraes. Ghai palu na ungene vehaigho agho Filimoni ia nomai mane baere kenuna ta riva varighara taremehamai ghai palu vanani God.

² Ghai palu na ungene vehai molamo Afia ia tahida fotati ka ia va hohoghona, nia Akipasi ia taremehada taghe kaike mane magara ia ta ghua tetu ghinina ia Nonomoho Ta Veha taremehada ghita nia ira keha noni kiloau ta va totoana varighara ka suga nia agho, e ghua.

³ Ara na verevere fangai God ia noda Mama nia ia noda Lod Zisas Kraes, e vanamu ghu ia varisute ta va meha kakatoi nia ia bule.

⁴ Ara a kudo vehai tudu ma God ka ira nogu verevere, ghinighona agho Filimoni,

⁵ vununa ara na nomohi ma na au ghu ia nou va hohoghona ka ia Lod Zisas nia ia namaha ka agho ta vanadi ira leghu nona noni nga God, e ghua.

⁶ Ara na verevere fangai ia au vari parekete varighara ka agho taremehadira ira ta va hohoghona, e age va avoavohigho ghu agho va fafahakarira ira leghu va beana ta au ghita nga ka ira dolida taremehana Kraes.

⁷ Ia nou namaha tahigu maneo, neto ke vanagu va ghazaghaza nia gigima e ghua, vununa agho noto ke va manemaneri ira hihingodi ira nona noni God.

Va Paluna Pagahaina: Polo Ne Fanga Lao Ka Filimoni Vanani Onesimasi 1:8-16

⁸ Ne ghua mamu ghe na fangaigho nga ara ta mala riva vanaguna keha leghutaura. Vununa ara mu nona mane nonomoho Kraes Zisas, a boka mo ghu ara kahe va gigimaighona mala riva ghinina ia leghutau ta lotoro.

⁹ Ghe vununa ka ia vari namahai ghita palu, na suna fangaigho ma ghu ara ia nou mane baere Polo, ia manekusu ta au ka pipiliga vanani Kraes Zisas ghatunaina.

¹⁰ Ara na fangaigho ghu ta kuruighona dudumana agho ka Onesimasi, ia nou mane mala varituhu. Manei mu taghe kaike torai tuugu mane a ghua ghini ara, vununa manei neke meha va hohoghona ka Kraes ka ia fafata va kakahe ghini ara ka giliona malau pipiliga ini aiahi.

¹¹ Sepao mu, Onesimasi neke deo lighorona ka agho, nga ghatunaina mu manei e toraina kuru lighorona ka agho nia ka ara, e ghua.

¹² Ara na va ghahe leghu agei Onesimasi ka agho, ia ta namaha ghini fuludu ara ka hihingogu kamoto ini.

¹³ Ara nake torai kabai ghini ta posi leghu taremehaguna manei, e boka mala holarigho ghu agho toka ghinaguna, ka fafata au iahi ara ka pipiliga, vununa ara nake tuturi beana ghini ia Nonomoho Ta Veha.

¹⁴ Ghe ara e deo nga ga posi leghui ghu manei aiahi, vununa agho e deo nga go va uvei ghu ta mala ghuana ianimu. Ara e deo ga kabai va tuufu ghinigho ghu ta mala toka ghinaguna, nga na kabai ghini ia toka ka agho ta mehana ka ia toraina lao hihingo taghou.

¹⁵ Haeba fafahakanana ghe neke ghahe kaigho nga manei birusuna fafata tei mu, o mala boka ke hio leghui ghu agho mala au taremehau fuludaina, neke ghua.

¹⁶ To deo mu taghe kaike mane mala varituhu ia ta ghua manei, nga e veha fuludu laoini ia noni mala varituhu. Manei mu toraina kaike tahida mane ka Kraes. Ara na toraina namaha ghini fuludu manei, geala agho mu e fuludu laoni ghu namaha ghinina manei. Vununa manei mu eka suna nou mane mala varituhu ma ghu agho, nga e tahiu mane haro molamo ka ia Lod.

Va Litona Pagahaina: Polo Ne Riva Ghini Kaike Naiungene Ka Filimoni 1:17-25

¹⁷ Noto nganai la ghu agho nia ara e ghua mu da kaike mo ka ia riva vananina Kraes ta ghuana, agho o ghua haroma ghu ke hio namaha leghuina Onesimasi, taghe ia ta ghua la agho hio namahauna ara.

¹⁸ Neto ke riva ghidi va zea la manei keha leghutau ka agho, ba neto kaonigho la manei keha leghutaura, o nai hinaeri ka ara mo.

¹⁹ Ara, Polo, na kangavina iahi ka ia torai kamegu taghogu, “Ara ta age lifu leghuina.” Ghe go ngana kai la ta kaoniau haro nia agho malana ia foforuna doliu agho ka ia tarunga, vununa ara nake toka ghinigho agho ta va hohoghonana ka Kraes.

²⁰ Uve, tahigu maneo ka Kraes, o riva vanagu ko leghutau ta fangai iahi ara vananina Onesimasi. O riva ghini iahi vananina ia Lod. Agho o age va manemaneau ara noto riva vanagu la agho leghutau iahi, taghe kaike mane taremehagu noni ta va hohoghona ka Kraes ta ghuana.

²¹ Ka ia kangavi ara leta iahi, ara na va hohoghonai ta age riva ghinina agho ghatu heve ta fangaigho ini ara nia fuludu laoini heve ta kahei ini ara, e ghua.

²² O va tana vanagu ko kaike ringifota mala maghoso, vununa ara na rangerangei God e age ungene tughuri ira nomu verevere, edi va kaveau ghu ka pipiliga ira noni nia va malumuau tuna ta ke magali leghu agena ara ka ghau, e ghua.

²³ Epafarasi, ta au taremehagu ini ka pipiliga ka ia leghui manei Kraes Zisas, ne va ghahe age nona ungene veha.

²⁴ Maki, Arisitakasi, Dimasi nia Luku e ghua, ira mane taremehagu ta riva varighara taremehagu ara, di kahe ghua haro molamo.

²⁵ Ara na tarai e age vanamu ghu ia Lod Zisas Kraes ia varisute ta vanada kakato.