Efesasi 6 - Ia Foforuna Naiungene

Ira Rekaha Nia Nodi Mamari Nodi Ukeri

¹ Ghau rekaha, o ungene nonomoho ka nomu mamari nomu ukeri, vununa ghau mu nona ia Lod. Iahi lamu leghutau lotorona ta mala riva ghinina ghu.

² “O heluhelu ghidi nomu mamari nomu ukeri,” ta ghua iahi lamu kusu ungene va gigima ta au taremehana naiungenena.

³ Iahi ghu mu naiungenena: Noto heluhelu ghidi la ghau nomu mamari nia nomu ukeri, “ira leghutau edi age ghahe va veha vanamu ghau, o age doli soduai ghu ghau ka malau iahi peka.”

⁴ Ghau ira nodi mama nodi uke ira rekaha tuna, oka va riva ghidi ghu ira nomu rekaha ira kokolodi puhi ta mala age hio va halari maneri. Nga o hio suteri taremehana tatangana nia ungene babatu ta meha ka ia Lod.

Ira Noni Vari Tuhu Nia Ira Faghina.

⁵ Ghau ira noni mala varituhu, o ungene nonomoho ka ira faghinamu ka malau iahi peka, taremehana heluhelu nia mamaghu, e ghua. O riva vanadi ka ira hihingomu kamoto taghe ta ghua niala ka ia riva vanani Kraes, o ghua.

⁶ O va sisiva ta riva va gigima tuduna mala veha vanadina ira manefaamu, ghe eka ghua ghu ma ka ia fata ta mato ghau maneri. Ghau mu nona noni varituhu Kraes, o riva ghini ghu ia lao nanafa ka God ka ira toraina hihingomu kamoto.

⁷ O riva taremehana ohoꞌoho, taghe ta ghua nia ka ia noke riva vananio ia Lod o ghua, nga taghe ta suna riva vanadi ma ira noni, oka ghua ghu.

⁸ O ngana avohi ta age sopai vanada tabarana ghatu ia Lod ka ira riva ta veha ta riva ghidi ghita, geta noni mala varituhu, ba, noni kalasada ghu ghita.

⁹ Taghe iala o ghua molamo ghau ira manefaa, o veha ghu ka ira nomu noni mala varituhu. Oka va mamaghuri ghu. O ngana avohi ta auna ma kaike faghinamu mo ghau palu ka malauo God fate, nia manei mu e varifate ma ka kaike ghaghahena mo faterira ira noni haroharo.

Ghita Mu Taghe Nona Mane Magara God

¹⁰ Va nonoghana nogu ngengenena mu, o va gigima ghau taghomu ka ia parekete taremehana ia Lod, nia va malumu ghau ta va gigima ghauna ka ia nona mana ta toraina gigima.

¹¹ O va vonari ghau ira leghu mala magara ta vanamu nga God, o boka tetu va gima ghu taga tetuina ia Faghinadi ira nazahi ka ira leghu sekesekei nga manei.

¹² Vununa ghita mu e deo gada taga teturi ghu ira noni, nga da taga teturi ira nazahi ta muko nia ira ta babatu ka maneri ta tetu kaputi malau ta nagoromo iahi peka, nia ira nazahi ta muko ta au ka kolangana fate, e ghua.

¹³ O va vonari ghu ira leghu mala magara ta vanamu nga God ghatunaina, mala neto la meha la ka hae fafata ia muko, o boka age kagara ghini ghau mo ghu taghomughi. Mala ka ia leghuna ia magara, ghau o boka age tetu va gima soni ngama.

¹⁴ O tetu va tana taghe kaike mane magara o ghua ghu. O au leghui ia hohoghona ka God, taghe kaike lilihiti ta va lighoto va ghiriti lilohi ka ghaghahounia mala va tanai magarana, o ghua. Au ka ia doli ta lotoro, ia ta kagara ghini ghau ka ira rapata Satana, taghe kaike poko tini ta aeana, ia ta bara kaputuri hihingomu nira ka ia magara ghau.

¹⁵ O toraina va hohoghonai tudu ghu ghau ia Nonomoho Ta Veha ia ta vanamu bule taremehana God, nia ta va tana ghau mala magarina Satana, e ghua, taghe ta ghua lama kaike mane magara ta va vona buti mala va tanai magarana, o ghua.

¹⁶ Taremehadi laora keha vahina leghutau irahi nga mu, va hohoghona ka Zisas, taghe kaike rereo ta hurei ghau mala va nodorira ira tupi ta burungu ta va fera ghini ghau age Satana.

¹⁷ Ghau o rangerangei ghu neke hio va doli ghauno God. Noto riva ghini la ghau ianimu, taghe ta va vonai kaike tarapae aeana mala bara kaputurira ira paumu, e ghua. Nia o hioi ia saorona God ia ta vanamu ia Tarunga Ta Maduana. Ianimu ghu mu, taghe kaike leboto sisilufu mala magari Satana, e ghua.

¹⁸ O riva ghidi ghu ka verevere leghu irahi nga, fangaina ia toka ka God. O verevere tudu ka ira leghu fafata nga ka ia mana ia Tarunga Ta Maduana ka leghu kokolodi verevere nga. Vununa ka va fafahaka iahi, o au va tana ghu, nia o verevere toka ghidi tudu ma o au ghu ira leghu nona noni nga God, e ghua.

¹⁹ Nia o verevere toka ghinagu haro ara e ghua, mala God e vanagu meha ghu ira ngengene ta lotoro nato ngengene la ara, mala aka age maughegu la ghu ara va fafahakina ia nona vatovato popoikana God, ghinina ia Nonomoho ta Veha ia ta maladi ira leghu noni nga.

²⁰ Ara mu na au ghu ka pipiliga ghatunaina, vununa ara nake tuturi ghini beana ia Nonomoho Ta Veha, ka ia varituhu ghinagu God. Ghe o verevere toka ghinagu ghau, a boka mala tuturi ghini va nadu ghu ara ia Nonomoho Ta Veha, taghe ia ta kabai ghini God riva ghinina ara.

Va Nonoghadi Ungene Veha

²¹ Tikikasi, ia tahida mane ta namaha ghini fuludu ghita nia ia ta riva vanani va veha ia Lod e ghua mu, ta age vanamuna nga leghu tuturi ghinagu nga ara, o mala avohi ghu ghau taghe heve ta ghua ta agena ghu ara.

²² Ianimu lamu ghu mu torai vununana ghe na tuhu agei nga ara ka ghau; o mala avohi ghu ghau taghe heve na ghua ghai ta ghuana nia e mala va gigima ghau ghu, e ghua.

²³ Ara na verevere fangai God ia Mama nia ia Lod Zisas Kraes, mala vanamu bulena ghau ira ta va hohoghona nia e toka ghini ghau ghu mala vari namahaina nia ta mala tetu va gima ma ta auna ghu ka ia nomu va hohoghona.

²⁴ Ara na tarai e age vanadi ghu God heiri haroharo ira taka nodo ghu namaha ghinina ia noda Lod Zisas Kraes ia varisute ta vanada kakato.