Efesasi 4 - Ia Foforuna Naiungene

Va Paluna Pagahaina: Agho O Au Ka Ia Kokolona Doli Ta Fata Ka Heiri Ira Ta Namaha Ghini God 4:1–6:24 Au Vari Parekete Ka Ia Tinina Kraes

¹ Ghe na au nga ara ka pipiliga mu, vununa ara na riva vanani Kraes. Ara na papada ghau ghu ta leghuina ia hangana ta lotoro ta fata ka heiri neke faeteriro God ta mala nona nonina taghonai.

² O au unuhu nia bule, e ghua. O au afa vanemoho ma, vari va fafahakarira ira nomu va zezea, vununa ka ia nomu namaha.

³ O au vari parekete tudu ma ka ia Tarunga Ta Maduana, posi varighara ghini ghau tuduna ka ia bule.

⁴ Ghita haroharo mu kaike tini mo nia kaike Tarunga ma ta au ghitana. Taghe iala molamo e ghua, da au ghita ghu kaike rangerange mo mala hiorira ira veha neke naiungene ghidi vanadaro God ka ia fafata kudo ghita.

⁵ Ta auna mu, kaike Lod mo, kaike va hohoghona mo nia kaike seselebeana mo, e ghua.

⁶ Ghita mu da va totoana ghini ma kaike God mo, ia noda Mama ghita haroharo. Manei mu e au ka fateda ghita haroharo, e riva ghu ka gilioda ghita haroharo nia e au ka gilioda ghita haroharo, e ghua.

⁷ Geta ghua mo ianimu ghe, manei neto ke vanada ira sopai nenemadi kaikadolo, leghuina heve neto ke vanada mehao Kraes.

⁸ Ne ghua mamu ghe, ne kahe ghua nga iahi ka ira Kakangava Ta Maduana, “Ka ia vona laona manei ka ia malau fateni, manei neke hio taremehana taghonai tehi noni dike seka ghidiro, nia neke vanadi kaikadolo ira nona noni,” ne ghua nga.

⁹ ?Heve mu fafahakanana, “neke vona fateni” ta ghua iahi? Toraina fafahakanana iahi mu, Kraes neke kusu hinae meha pekani ka malau ta aui iahi ghita, e ghua.

¹⁰ Manei neke hinae mehao lama mu neke vonao, fuludu laoina ia kamotona kolanga fate, mala ia kopu ka manei e au ghu hae ghe hae ghu ka kolangana fate nia ka malau iahi peka, e ghua.

¹¹ Manei lamu neke vananina ia kiloau ira kaikadolo; manei neke va tetu mane nomohori kehara, va noni porofetiri kehara, va noni mala va ongahi ia Nonomoho Ta Veha kehara, nia kehara tuna gedi ke noni mala va kakahe ghidi ghu ira noni ta va hohoghona ta kopuna ghidi maneri, dike ghua.

¹² Zisas neke vanadi ghu iranimu mala va tanarira ira nona noni God mala riva ghinina ia nona riva, ta mala va kodolo gigimaina ia tinina Kraes.

¹³ Iahi mu e age ghua ma e lao ghu, da vuhai meha parekete varighara ghu ghita ka ia noda va hohoghona nia ka ia avoavoho ghita ghinina ia Tuuna God e ghua, age zeolo taghe Kraes ta ghuana, nia age toraina kamoto taghe manei ta ghuana ghita.

¹⁴ Ianimu tuna ghe, taghe ira rekaha ta namo hio va hohoghona gadaka age ghua nga, ba taghe kaike vaka ta va leghi lao mehai ira boghuzu ta hio va felo lao mehai ghu ia dafe gadaka ghua nga. !Deo! Ghita daka age leghuri ghu ira turi sebo ka ira ta vari va kakahei sesebo.

¹⁵ Nga ghita mu da kahei ia hohoghona ka ia namaha, kodolo va faa ta auna ghu ka ira leghu ghaghahedi nga, taghe Kraes ia pauna ia kiloau, ta ghuana.

¹⁶ Ka ia pekana babatu manei, ira leghu pelona nga ia tini, di toraina age posi varighara va veha. Ira leghu pelona nga ia tini dito riva ghidi la ira riva ta mala sopai riva ghidi maneri, maneri edi age toka ghidi haro ira keha leghu pelona nga ia tini ta age kodolona, e mala age doli veha ghu ia kamotona tini fouduna ka ia namaha.

Ia Doli Foforu Ka Kraes

¹⁷ Ka ia nona mana mala kopu ia Lod, a kahei ghu ara iahi: Nodo auna ka ia doli ira noni bongihehe taka va hohoghona lao ghu ka God, ira ta deo lighorodi ira nganganadi.

¹⁸ Ira nganganadi maneri mu edi foudu ka nagoromo; maneri to age hau ka ia doli ta va mehai God, vununa maneri dito ke bakisiri ira nganganadi nia dike va marutanari ira hihingodi taga tetuina God, e ghua.

¹⁹ Maneri editoka haghava ghidi ghedi ghu ira leghutau ta muko tadi riva ghidi. Ianimu la ghe dito riva ghidi ngama ira vahina leghutau ta kuhana ghidi nga ira tinidi. Ira nganganadi tuna gedi toraina hagalai riva ghidi tudu ma ghu ira leghu kokolodi puhi ta muko nga, e ghua.

²⁰ Ghe eka ghua mo ianimu dike va kakahe ghini ghauna maneri ka ia fafata va kakahe ghini ghau ghinina Kraes.

²¹ Ghau noto ke kusu nomohi ia Nonomoho Ta Veha ghinina Zisas Kraes, edi hohoghona ghu mu ira leghutau dike va kakahe ghini ghauro maneri ghinina manei.

²² O nai kairi ghu ghau ira puhimu sepa ta muko ka noke fani auno ghau. Puhimu sepa ta muko iranimu dike sebo ghau, neke ngovalari ghu ira dolimu.

²³ Nga o va malumi ia Tarunga ta va foforurira ira nganganamu nia ira puhimu, e ghua.

²⁴ Ghau o toraina va podoli ia aꞌaumu ta foforu, vununa ghau mu to foforudi noni ta toraina lotoro, beana, nia hohoghona taghe taghonai God noto ghua.

²⁵ To nodo ghu turi sebona. Ghita da va kahe ghidi ia hohoghona ira keha noni ta va hohoghona, vununa ghita haroharo mu da meha kaike ma ka ia tinina Kraes.

²⁶ Noto haligho la, oka va malumi ghu ia haala ta hio va sasakeighona, nia oka haligho ghu ge vuhai age luduru ghu ia taunu, e ghua.

²⁷ Ka ghaghahena ianimu ghau noto deo go va malumi ghu ia Faghinadi ira nazahi ta batu ghini ghau laona ka ia sasake.

²⁸ Noto ke fani sisiko la agho, oto nodo sisikona. O au hohoghou ka ia doliu, o riva va gigima e mala kuruigho ghu keha leghutau mala tufari ghedira ira keha noni ta malanga dudumana.

²⁹ Oka mala ngengene ghu ira ngengene ta sota, nga ira ngengene ta mala vari tokai lama, mala ira ngengene ka agho edi mala vanadi gigima ghu, heiri ira ta nomoho ageigho.

³⁰ Oka riva ghini ghu kaike leghutau ghu ia ta age va muko hihingoi ia Tarunga Ta Maduana. Vununa God neke vanamu ghau ia Tarunga Ta Maduana mala va podolo kaveina ghau mu toraina nona noni hohoghona God, ta ghuana. God neke vanamu molamo ia Tarunga, o mala age avohi ghu ghau ta age kalasana ka ira sasake, ka ia va nonoghana ravata.

³¹ Nai kairi agho ira vahina ta minga vananigho nga, ira vari kanai, ira haala, ira rarautu, ira turi ghidi va muko ira keha noni nia ira leghu kokolodi vari kikipanai nia vari ngaziriai nga, e ghua.

³² Nga au varisute, vari dudumanai, nia o kai hazari ira sasake ka vari taghomughi o ghua, taghe God neto ke kai hazariro la ka Kraes, ira sasakemu.