Efesasi 2 - Ia Foforuna Naiungene

Foforuna Doli Ka Ghita Taremehana Kraes

¹ Sepao mu, ghau noke leme ka ia deo go va hohoghona ghu ka Zisas, noke leme ghu ka ia tarunga, vununa ghau noke sasake nia huhughi God, noke ghua.

² Ka fafata ianimu ghau noke fani leghuri ira puhina malau iahi peka ta sasake ka ia leghui Satana ia faghinadi ira nazahi ta muko. Manei lamu ia nazahi ta muko ta riva ka giliodi ira hihingodi ira noni ta pake ghedi leghuina God.

³ Ghita haroharo mu taghe maneri dake ghua haroma dake au leleghuri ghu ira puhi dake doli taremehadi meharo, riva ghidira ira heve ta ngagungagu ghidi ira tinida nia nganganada. Vununa ka ira puhida sepa ta ghua iranimu, ghita dake to va halini ghu God, neke mala age va kilasa ghita ghu manei, taghe ia ta age riva ghini haro lama manei ghatu ka heiri haroharo ira taka nomohi ghu taghonai.

⁴ Ghe God mu e toraina foudi dudumana nia e toraina namaha ghini ghita fuludu e ghua,

⁵ neke hio va doli ghita ghu ka ia va tetu leghui manei Kraes ka ia leme ka ia fafata dake lemeo nga ghita ka ia tarunga, vununa ka ira sasakeda. God mu neto ke hio va doli ghau ghu ka ia nona varisute neto ke vanamu kakato no.

⁶ Vununa ghita da au parekete taremehana Zisas Kraes, ne vanada doli ghu God taremehana Kraes, nia va au kopu ghita harona taremehanana manei ka malauo God fate, e ghua.

⁷ God neke riva ghini iahi mala va podolina ka ira leghu noni ta doli meha nga keha nareo, ia nona varisute leghaha ta va meha kakatoi manei ka ia namaha neke va podolo vanadao ka ia holara taremehada God ka ia vari parekete taremehana Zisas Kraes.

⁸ God neke hio va doli ghau ka ia nona varisute ta vanamu kakato manei, ka ia fafata va hohoghonamu ghau ka Kraes. Vununa neke ghidi keha leghutau noke riva ghidi ghau ghe neke hio va doli ghau nga God eka ghua ghu. Iahi mu kaike kaikadolo sipa mehana ka God.

⁹ Ia hio va doli mu eka tabaradi ghu ira leghutau ta veha dake riva ghidi va hokotoro ghita, e deo ghu go boka mala hadu varanga ghini ghu ghau.

¹⁰ God neto ke nai ghua ghini ghitana iahi, ne va foforuri ghu ira dolida, vununa ghita da au parekete taremehana Kraes, mala da riva ghidi ghu ghita ira riva ta veha, neke va tana vanada mehao manei sepaoni mala riva ghidira ghita.

Ghita Haroharo Mu Kaike Mo Vununa Ka Heve Neke Riva Ghinio Kraes

¹¹ Oka ngana kaini ghu ghau mu, taka Ziuna ghu ghau. Ghau mu “Ira noni taka papahe va ghilaghila ghu” dike ghua ghini ghau ira noni Ziu. Taghodi mu nona noni God, vununa di papahe va ghilaghila dike ghua ka ira nganganadi. Ghe ianimu ghu mu e maladi ma ira tinidi lama, nga eka maladi ghu ira hihingodi.

¹² Go ngana kai la ghu, noke deona ghau go avohi ghu Kraes sepao, nia noke deona ghau goke kaike taremehadi ghu ira nonidi Isiraeli, e ghua. Ghau mu noke au kave ghu ka ira varivehaidi naiungene neke riva ghinio God taremehadira ira nona noni faetaidi, ira Ziu. Ghau e deo goke avohi ghemu ghu ia toraina God ta hohoghona nia ghau e deo goke boka va hohoghonai ghu e ghua, ta boka age hioina ghau kaike leghutau ta veha ghu, ka leghuna ia lememu.

¹³ Nga ghatunaina mu, ghau to nona Kraes Zisas. Sepao mu ghau noke hauai ka God, nga ghatunaina mu ghau taghomu to hio namo ghau meha ka ia busakana Kraes.

¹⁴ Vununa taghonai Kraes neto ke hio vanada meha ghita ia bule ka ia meha va kaikeri ira noni Ziu nia ira taka Ziu ghu, e ghua. Manei neke huara hinaei ia riringi ta fotari maneri ka ia vari kanai.

¹⁵ Ka ia leme manei, neke hio kaini ghu manei ia vetula ka ira Ziu taremehadi ira ungene va gigima nia ira ungene tatangana e ghua, mala age va kaike foforuna nonirira maneri ira palu butubutu noni, ka ia au parekete taremehana taghonai, ta mala auna ghu ka ia bule ka ghaghahena ianimu.

¹⁶ Ka ia leme manei ka ia hekefalahata, Kraes neke huari ia vari kanai ka maneri. Ka ia hekefalahata, manei neke vari parekete ghidi palu butubutu noni irahi ka kaike tini mo, neke hio leghuri ghu ka God.

¹⁷ Kraes neke meha tuturi ghini beana ghu ia Nonomoho ta Veha ghinina ia bule ka ghau ira taka Ziu ghu noke varihauo ka manei, nia ka ghai ira Ziu nake namo laono ka manei, e ghua.

¹⁸ Ghatunaina mu ghita haro, ira Ziu nia ira taka Ziu ghu e ghua mu, da boka meha mo ghu ka ia Mama ka ia kaike Tarunga Ta Maduana mo, vununa ka heve neke riva va hokoto vanadao Kraes.

¹⁹ Ghatunaina mu, ghau ira taka noni Ziu ghu mu, to deo ghu go noni mehamu ghu nia noni tanimu ghu peghuruo, e ghua. Ghau mu to au holara haghele varighara taremehadi haroma ira noni ka God nia to meha kaike haroma ka ia butubutu God, e ghua.

²⁰ Ghita varighara mu nona suga God, neke riva va tetuio ka fatedi ira mane nonomoho nia ira porofeti e ghua, taghe ira sutuna suga ianimu ta ghuana. Nia taghonai Kraes Zisas tuna mu ia saloro ta mala zuka va gimana ia suga, e ghua.

²¹ Kraes lamu ta posi varighara ghinina ia kamotona suga, ta va kodolina ghu ka kaike Ringifota ta Maduana ka God, malana ia Lod.

²² Ka ia parekete varighara taremehana Kraes, ghau ira noni taka Ziu ghu mu, o meha kaike taremehadi haro ghu molamo ira keha noni ta va hohoghona, taghe kaike malau ka God ta mala au ia nona Tarunga, ta ghuana.