2 Zone 1 - Ia Foforuna Naiungene

Va Kenuna Pagahaina: Leghuri Ira Vetula Ka God. 1:1-6 Ira Ungene Veha

¹ Leta iahi mu sipana ka ara Zone ia manesepa ta babatu ka ia kiloau. Ara na kakangava age ka agho ia fotati neke faetighono God nia ka ira nou rekaha ta namaha ghidi ara ka ia hohoghona e ghua. Eka ghua la ghu ara lama, nga heiri haroharo ta avohi ia hohoghona ka God di namaha ghini ghau haro,

² vununa ia hohoghona ne au ka ghita e age au toghunai taremehada ghu.

³ Ara na tarai fangai God ia Mama nia Zisas Kraes ia Tuuna mala vanada kakatona ia varisute, ia dudumana nia ia bule ka ia va hohoghonai ghita ia vari va kakahei ta hohoghona, nia ghita da vari namahai e ghua.

Au Ka Hohoghona Nia Namaha

⁴ Ara nake puina age va manemane fuludu dufurira kehara ka ira rekaha agho ta auna maneri ka ia hohoghona, taghe neke ungene va gigima ghitao ia Mama.

⁵ Ghatunaina ara na fanga va gigimaigho ghu taremehagu fotati agho, geala tada vari namahaina ghita. Iahi mu eka ungene va gigima foforuna ghu, nga kaike ungene va gigima dake kusu avoho mehaio ka ia tatanigai leghuida mehani ghita Zisas Kraes.

⁶ Fafahakanana namaha ta ghua iahi mu, da riva ghini heve neto ke ungene va gigimaio God ka ghita. Manei neke ungene va gigima ghita ta vari namahaina, taghe noke nomoho mehaio ka ia tatanigainani.

Va Paluna Pagahaina: Oka Au Varighara Taremehadi Ghu Ira Ta Vari Va Kakahei Sesebo. 1:7-13

⁷ Tehi noni ta vari va kakahei sesebo dito ke kave laora ka malau iahi peka. Maneri edika va hohoghonai ghu neke hinae mehana Zisas Kraes ka ia tini noni ka malau iahi peka. Kokolona noni iahi mu e sesebo nia e kana ka Kraes, e ghua.

⁸ O balau ghidi ghau ta vari va kakahei sesebo irahi. Dito batu ghini ghau kave la ka ia vari va kakahei hohoghona ghinina Kraes, ianimu ia riva va faa ka ghau vanani God mu e age deo lighorona ma. Nga noto tetu va gima la noto lao ghu ghau, ghe ge age vanamu nga God ira leghutau ta veha neke nai ghidi ungene vanamuro manei.

⁹ Hei neto nanakai nona lao ngangana la taghonai, neto ghahe kaini ghu ia vari va kakahei ka Kraes, manei e deo ge age au parekete taremehana ghu God. Nga neto posi va gima la manei ka heve neke va kakahe ghinio, manei e age au parekete taremehana ghatu ia Mama nia ia Tuuna, e ghua.

¹⁰ Neto meha la ka ghau kaike noni mala va kakahe ghini ghauna, neto deo ghu ge vari va kakahei ghini ghu ia hohoghona ghinina Kraes, oka hio namahi ghu ka ira sugamu, ba oka ungene vehai ghu.

¹¹ Vununa hei ia ta toka ghini noni ianimu ka ghaghahena iahi mu, e age kaike taremehana manei nia toka ghini tuna ka ira riva ta muko manei, e ghua.

Va Nonoghadi Ungene Veha

¹² Tehi fuludu ta mala turi vanamuna ara, ghe ara e deo ga kabai tuturi vanamu age ghu ka kakangava. Vununa ara na rangerangei ta mala magali age sigho ghini ghauna tada toraina nohe vari talaina ghu ghe, gada turi nga. E ghua ianimu ghe ge toraina age kamoto nga ia va manemane ka ghita.

¹³ Ira rekaha ka ia kerau fotati, ia ta noni vehana neke faetio God taghe taghou la ia ta ghua molamo, di va ghahe age nodi ungene veha.