2 Timoti 3 - Ia Foforuna Naiungene

Ira Lelemeana Ka Ira Va Nonoghadi Ravata

¹ Agho Timoti geala o avohi molamo, ta age aura ghatu ira fafata ta mamarutana ka ira va nonoghadi ravata.

² Ira noni edi age luluto ka ia hagalai rongo nia edi namaha ghidi ma taghodi lama, e ghua ghatu. Maneri edi puina age turi va varavaranga, hadu varanga, ungene ngovalari ira keha noni, huhughuri nodi ukeri nodi mamari, nia deori kudoveha, edi ghua. Maneri haro edi age deo heve ta heluhelu ghinina ka ira leghutau ta beana.

³ Maneri edi age deori namaha, deori dudumana, turi ghidi sebo ira keha noni, deori banabana, noni ngongovaladi, nia edi hakohako ghidi ghedi ira leghutau ta veha, e ghua.

⁴ Maneri edi age namaha sebori ira nodi baere, gosugosu ka ia doli, fouduai hadu varanga, nia ngagungagu ghini ia doli ka ia tini, fuludu laoina ia namaha ghini God.

⁵ Maneri taghe noni ta leghu va vehai God edi ghua aꞌaudira, ghe edi age sokei ghatu ia mana ka God ia ta boka age va noni beanari. Agho o toraina au va takale ka kokolodi noni ta ghuara iranimu.

⁶ Kehara ka maneri edi hagheleri ira sugadi ira noni, edi la batu ghidi va zea ghu ira fotati ta paeke ta tahuri ira muko ka maneri nia ta auri leghu kokolodi lao hihingo ta muko nga, e ghua.

⁷ Kokolodi fotati irahi mu, edi leghuri tudu ma ira foforudi vari va kakahei, ghe edi deo boka avohidina ia hohoghona, e ghua.

⁸ Taghe dike ghuao la Zanisi ghe Zamubirisi dike taga tetuio Mosese edi ghua molamo noni vari va kakahei irahi, edi taga tetui ghu ia hohoghona. Ira nganganadi edi puina sota, nia ira nodi va hohoghona ge deo lighorodi ghu, e ghua.

⁹ Ghe e deo hae tadi la ghuduvura, e ghua. Kaike ravata ira noni edi age fini avohi mo ghatu ta torai noni kingodira maneri, taghe dike hadu kaveio la ka Zanisi ghe Zamubirisi.

Polo Ne Va Kahe Ghini Timoti Ta Tetu Va Gimana

¹⁰ Ghe agho Timoti to avohi heve nake vari va kakahe ghinina ara, nia heve mu ghaghahedi aura ka ia doli ara e ghua. Nia agho haro to avohi molamo heve mu nona vatovatona God malanana ia doli ka ara. Agho mu to avohi ia va hohoghona nia ia au afa ka ara, e ghua. Agho to avohi ia namaha nia ia tetu va gima ka ara mala riva va gigima tuduna.

¹¹ To avohi agho taghe niha ngavulu vari ngovala nia vavahagala e ghua, nato ke va fuludurira ara. To avohori haroharo agho, taghe heve dike ghua ngovangovalauna maneri aianihi Anitioko, Aekoniamu, nia Lisitara e ghua, ghe ia Lod neke hio va doliau ka leghu iranimu nga.

¹² Uve, nia heiri haroharo ira ta kabai au va lotoro ka Kraes Zisas ka ira dolidi e ghua mu, edi age au vavahagala haro molamo ka ira noni ta ngovangovalari maneri.

¹³ Nga ira noni ta muko nia sesebo e ghua mu, edi age muko laoni. Maneri edi sebori ma edi lao ghu ira keha noni nia age sebori haroma taghodi, edi ghua.

¹⁴ Ghe agho mu, o au hohoghou tudu ma ka ira leghutau dike va kakahe ghinighoro maneri. Avohi mo agho mu ta hohoghodira leghutau iranimu, vununa agho no avohori nia rangeri e ghua, heiri dike va kakahe ghinighoro.

¹⁵ Taniga ia rekahauni va kakahe ghinigho mehana maneri ka ira Kakangava Ta Maduana, dike vananigho ghu ia avoavoho mala hioina ia hio va doli ka God ta la meha ka ia rangerangei Kraes Zisas.

¹⁶ Ira leghu Kakangava Ta Maduana nga mu, dike la meha ka God, e au lighorodi ghu ta mala va kakahe ghini ghitana ka ira heve ta hohoghodi, nia ta mala fini avohorira ghita heve ira ta muko ka ira dolida, e ghua. E mala nai va totonu ghita, nia e mala va kakahe ghini ghita e ghua, da riva ghidi ghu ira ta lotoro.

¹⁷ Nona ngangana God mala pakara ghini ghitana ka ira leghu doli nga mu, ta hio va hokotorira ghita ira leghutau mala riva, ta mala boka riva ghidira ghu ghita ira leghu kokolodi riva ta veha nga.