2 Tesalonaeka 2 - Ia Foforuna Naiungene

Ia Ravutu Ka Ia Mane Ta Va Laolapu E Kusu Podolo Ghe, Ge La Leghu Meha Nga Zisas.

¹ Ghau tahimairo, ghatunaina ghai ake va kahe ghini ghau, ghini ia leghu meha ka ia noda Lod Zisas Kraes ghatu, nia ghini heve e ghua God hio varighara ghini ghitana mala dufuina manei.

² Oka magali naologhabili ghu, ba, hangapuaha ghu ka ira noni ta kahei, ia ravata ta ke la leghu meha ia Lod mu to dufu, ira ta ghua. Geta kahei ghu maneri dike nomohi ka ghai, ia Lod mu to dufu ta ghuana ka ia nonomoho, ba leta, ba geta kahei ghu maneri na turi ghini ghai kaike nonomoho sipana ka ia Tarunga Ta Maduana, geta ghua ghu maneri ghe, oka puina va hohoghonari ghu.

³ Oka va hohoghonari ghu ira leghu kokolodi sekesekei nga ka maneri. Vununa ravata ianimu ghu mu, e deo ge la meha ghu, e vuhai age au ghu ia fafata, ta age deke pauma ghini God ghatu tehi nonini, ka ira dolidi ka malau iahi peka, ta podolo ghu tuna ia mane ta va laolapu, ia ta age kai laoi gehena.

⁴ Leghunana, manei e age tetu kaputuri vahina leghutau ta va totoana ghidi, ba ta va kudo ghidi god ira leghu noni nga, e nai vonai ghu taghonai fatedi maneri haroharo. Manei e age haghele ghe ka ia Ringifota ta Maduana God aianihi Zerusalemu, e la nohe ghu gilio, kaheina taghonai mu God, ta ghuana.

⁵ ?E deo ma go nganai ghu ghau, nake va kahe ghini ghauo iahi ka ia fafata au taremehamuo ara?

⁶ Ghau to kusu avohi hei mu ne bara kaputina mane ta va laolapu iahi, mala eka kusu podolo la ghu manei ghe ge dufu nga ia nona fafata.

⁷ Mane ta va laolapu iahi mu to toraina riva ma to au ghu, ghe manei mu e poika ma e au ghu, e vuhai age va rizu kavei ghu God, hei ia ta bara kaputi mane ta va laolapu iahi.

⁸ Ka fafata ianimu tuna ghe, ge age podolo nga ia mane ta va laolapu.

⁹ Manei e la meha taremehana ia mana ka Satana, va podolorira manei ghatu leghu kokolodi riva ta sesebo nga ka ira hahaima, ka ira va ghilaghila nia ka ira leghutau ta fefereana e ghua, va ghonarira ira noni ka ira nganganadi, ne riva ghidi God, ta ghuana.

¹⁰ Ghatu manei e riva ghidi leghu kokolodi sesebo ta muko nga, mala va zearira ira noni taka avohi ghu God, vununa di pake ghedi va hohoghonaina ia hohoghona ta mala hio va doliri.

¹¹ Vununa ghini iahi, e age riva ghidi ghu God ghatu keha leghutau ta toraina age sebo va mukori maneri, mala age va hohoghonarira ira sesebo.

¹² Ianimu tuna ghe ge age fateri nga God ghatu, ge age hotori ghu tuna ira ta deo gedi va hohoghonai ghu ia hohoghona, ta veveha ghidi auna ka ia doli ta muko. Ghe oka anga ghemu ghu, vununa Zisas e la meha mo ghatu, leghuna mane ta va laolapu iahi. Ka fafata ianimu, Zisas e age va lemei ghatu, ka ia dafe ta hingo ghini kave manei ka ia paetena, nia e toraina va mukoi haroma e ghua, ka ia pelarana ia meha ka manei.

Ghita Da Toraina Tetu Va Gima Ka Ia Hohoghona Dake Kusu Avohio.

¹³ Nga ghai mu, na kudo vehai tudu ma God ghini ghauna ghau ira tahimai ta namaha ghini ghau ia Lod. Ghe neke va vuhai nga malau iahi peka God, manei neke to kusu faete ghau ta mala hio va doli ghauna, ka ira nomu va hohoghonai ia hohoghona, ta meha ka ia mana ia Tarunga Ta Maduana ta va noni beana ghau.

¹⁴ Manei neke kudo ghau lao ka ia hio va doli ka God ka ia fafata va kahe ghini ghau ghai ia Nonomoho Ta Veha; ghatunaina mu, ghau o boka hio tufa haroma ghu, ka ia pelarana varanga ia noda Lod Zisas Kraes.

¹⁵ Ka ngangana irahi, ghau tahimairo, o tetu va gima ghu, posi va gima tuduna ka ira vahina leghutau nga, nake va kakahe ghini ghauro ka ia fafata dufu ghau, nia ka ia kusu nomai leta, e ghua.

¹⁶ God ia noda Mama ne namaha ghini ghita, neke vanada ghu ia va kakapoto nia ia rangerange ta namanama ta au toghunai, vununa manei neke vanada kakato ia nona varisute.

¹⁷ Ghai na tarai fangai ia noda Lod Zisas Kraes nia God ia noda Mama e ghua, ta age va gigimarira hihingomu nira, ta vanamuna ghu ia gigima ka ira vahina leghutau ta veha nga, ta riva ghidi nia ta kaheri e ghua, ghau.