2 Pita 1 - Ia Foforuna Naiungene

Ia Va Kenuna Pagahaina: Heiri Ira Ta Va Hohoghona Ka Zisas Mu Edi Toraina Au Ka Ia Ghaghahena Ta Fata Ka Ira Ta Leghui Zisas. (1:1-21) Ira Ungene Veha Sipadi Ka Pita

¹ Leta iahi mu sipana ka ara Saemoni Pita, ia nona mane varituhu nia nona mane nonomoho Zisas Kraes. Ara na kakangava age ka ghau haroharo noke hioio ia va hohoghona ta namanama ta varifata ka nake hioio ghai, ia va hohoghona neke vanadao Zisas Kraes, ia noda God nia ia Va Doli ta va lotoro ghita ka God.

² Ara na verevere fangai God e va foudu ghau ghu ka ia nona varisute nia bule e ghua, ka ia nomu avoavoho ghinina God nia Zisas ia noda Lod, e ghua.

Kodolo Ka Ia Avoavoho Ghini Kraes

³ God ka ia nona mana ta maduana, neto vanada ira vahina leghutau nga ta hagala ghidi ghita mala auna ka ia doli ta veha vanani manei. Ghita dato hiori leghu irahi nga ka ia meha avohi manei, ia neke kudo ghita laono ka taghonai ka ia nona varanga ta namanama nia ka ia nona veha, e ghua.

⁴ Nia ka varanga nia veha ianimu lama, neke vanada ghu ira nona naiungene ta torai gigima nia namanama. Vununa ka nona naiungene irahi, neke vanamu ghu ia nona maduana, o mala maduana taremehana ghu taghonai ghau. Nia o boka kalasa mo ghu ghau ka ira ngagungagu ta muko ka malau iahi peka ia ta va mukori ira noni, e ghua.

⁵ Vununa ka ira vahina tato riva vanamu nga God, o riva va ngazuluai ghu, mala leghutau irahi edi fate age ghu ka ia nomu va hohoghona ka Kraes: au ka ia doli ta lotoro, avoho va veha laoinani God,

⁶ paufuri ira ta riva ghidi nia ta kaheri ghau, tetu va gima ka ia dufu ghau ira mamarutana, au ka ia ghaghahena ta veha vanani God,

⁷ o hio suteri ira noni ta va hohoghona ka Kraes, nia namaha ghidi ira noni haroharo, e ghua.

⁸ Noto riva va fuludu laori la ghau leghutau irahi, ianimu ne va podoli ia nomu avoavoho ghinina ia Lod Zisas Kraes mu ne au lighorona ne va vuha veha ghu ka ira dolimu.

⁹ Noni neto deo la ge kurui ghu leghutau irahi ka ia dolina, manei mu deo ge fini varihau ghu ba ne kivi, vununa manei neto ngana kaini ghena ia tihi kairi ira sasakena sepao.

¹⁰ Ghau tahiguro ka Kraes, ka va fafahaka iahi mu, o va gigima laoni ghu, mala ia kudo ghau nia ia faete ghau neke riva ghinio manei, e age au va nadu ma ghu e age ghu. Ghau noto riva ghini la kokolona ianimu, e marutana fuludu ta riufuna ghau ka ia nomu va hohoghona.

¹¹ Ianimu tuna ghe, ge toraina age hio namaha ghau nga God ka ia Ravutu ta toghunai ta nona ia noda Lod nia ia noda Va Doli Zisas Kraes.

¹² Geta to kusu avohori mo ghu ghau leghutau irahi, kusu tetu va naduna ka ia hohoghona ghe, ara a age va ngana ghini ghau leghu tudu ma leghu irahi nga.

¹³ Ka nganganagu ini, e veha ta toka ghini ghauna ara mala ngana leghurira leghu iranimu nga, ka malai dolina nga tinigu ini.

¹⁴ Ara nato avohi ta age namo ghahe kainina doli iahi ka malau ini peka, vununa ia noda Lod Zisas Kraes neto kusu va fafahaka vanagu va veha.

¹⁵ Nia ara a age toraina riva va veha, o mala boka ngana leghuri ghu ghau leghutau irahi, geta to age ghahe kai ghau ghu ara leghunana.

Ia Holara Ka Ia Tinina Zisas Ne Va Podoli Ta Hohoghonana Ia Saorona God

¹⁶ Ghai e deo gake suna va vuvuha turi ma ghu, ka ia fafata turi vanamu ghinina ia mana ka ia noda Lod Zisas Kraes nia ghinina eke la leghu meha keha ravatara ia ta ghua, e ghua. Ghai nake toraina fini hibamai ghinina ia varanga ta namanama ka manei.

^17-18 Ghai nake au taremehana Zisas ka ia vuhuku beana. Ka fafata ianimu God ia nona mama neke ungene va vonavonai Zisas nia neke vanani ia varanga ta pelara, e ghua, neke nomohi ghu Zisas ngengene iahi sipana ka God kahe ghua laona iahi ka manei, “Iahi mu torai Tuugu Mane ia ta namaha ghini ara. Ara na puina va manemane ghini manei,” ia ta ghua. Nia ghai taghomai nake nomohi ngengene ani ka God ia ta puina varanga sughavona neke ngengene mehao ka kolangana fate.

¹⁹ Vununa ghidi heve dake finiri nomohoriro, na toraina rangerange laoni ghu ghai ka ia nonomoho dike va ongahio ira porofeti. E veha ka ghau ta va malumina heve dike kangavariro maneri, ta va fegala ghau ta laona ghu, taghe kaike zuta ta fegala ka giliona kaike malau ta nagoromo ta ghuana, ta vuhai ke leghu mehana ghu Kraes. Ia meha ka manei mu taghe ka ia nganaifugho e ghua, ka ia vonana Zisas ta fegala ghu ka hihingomu nira, taghe ia babaghunu leghufugho, ta ghuana.

²⁰ Ia tongovona leghutau ta mala avohina ghau mu, e deo kaike turi vai kenu ghu ka ia Kakangava Ta Maduana neke sipa mehana ka ira nganganadi taghodi ira porofeti.

²¹ Maneri deo gedi ke kabai turi vai kenu ghu taghodi. Nga ia Tarunga ta Maduana mo neke babatu ghidira ira nganganadi ira porofeti leleghu fafata ka ia tuturi ghini maneri ia nonomoho neke sipa mehao ka God.