2 Koriniti 3 - Ia Foforuna Naiungene

Ia Foforuna Naiungene Ka God

¹ ?Heve, ghai mu na tatanigai ke turi va varanga ghaini taghomai ka ia kahe ghua iahi ghai? Ira keha noni mu edi va ghahe taremehadi lao leta mala fini avohorina di toraina maneriva mamu ka God maneri ta ghuana, nga ghai mu e deo ga ghua ghu ianimu.

² Ghau taghomu lama mu taghe leta mala va kahe ghidira ira noni ghini ghaina ghai. Leghu noni nga edi boka finiri mo ira dolimu ghau edi age va fafahaki ghu ghai mu ira nona maneriva ta veha God ta ghuana.

³ To dodoruana mu taghe ghau mu kaike leta neke kangavi Kraes neke kave meha ghu ka riva beana iahi ghai, ta ghuana. Kraes e deo geke kakangava ghu ka kaike leghutau ta age magali nogha taghe baero, nga neke kakangava ka ia leghutau ta age au fuludai, ia Tarunga ta Maduana ta meha ka God ia ta doli. Manei e deo geke kangavi ghu ka ghahipa tetepele, nga manei neke kangavi ka ira hihingomu ghau.

⁴ Ka ira nahalina God mu, ghai na torai va hohoghonari leghu irahi nga mu e hohoghodi, vununa ghai na parekete taremehana Kraes.

⁵ Ghai e deo ga nganai ghu ta fatana ghai mala riva ghinina riva ta veha iahi ka ia nomai gigima taghomai. Ia mana nia gigima ka ghai mu e meha ma ka God lama.

⁶ Manei neke boka va fata ghaina mala tuturi beana ghinina ia nona foforuna varivehai. Iahi mu ia varivehai ta deo ge leghui ghu ia vetula ka Mosese, nga e leghui ia Tarunga ta Maduana. Leghuina ia vetula ka Mosese mu e ghuduvu ka leme, nga ka ia foforuna varivehai mu, ia Tarunga ta Maduana e va meha doli.

⁷ Ia vetula neke kangava hinaeio God ka ira palu kipedi ghahipa tetepele mu neke va meha leme ka noni. Geta ghua mo ianimu ghe, ia vetula neke meha taremehana ia pelarana varanga ka God neke va pelario ia hihilina Mosese. Nia geta toke age vai hinae mo ia pelarana ia hihilina Mosese ghe, ira nonidi Isiraeli dike deo gedi boka mato va sepa laoi ghu manei.

⁸ Ghe pelarana varanga iahi ka God neke meha taremehanao ia riva ka ia Tarunga ta Maduana mu eke faa fuludu laoni.

⁹ Neto ke pelara varanga la ia vetula ta va meha varifate nia leme, ianimu ne va podoli ia foforuna naiungene ta pelara varanga fuludu laonani, vununa ne nai va lotoro ghita ka ira nahalina God.

¹⁰ Ia kusu pelarana varanga ka ia vetula neke tongovonao sepao mu to deo ge tongovona ghu ghatunaina, vununa ia pelarana varanga ka ia foforuna naiungene ne veha fuludu laoni.

¹¹ Ia sesepana naiungene mala leghui ia vetula neto ke nai kainio neto pelara varanga la, ia foforuna naiungene ta au toghunai mu e pelara varanga fuludu laoni.

¹² Vununa ghai na avohi ta deona ge age nogha ghu foforuna naiungene iahi, na deo ghu maughemaina.

¹³ Ghai mu taghe Mosese e deo ga ghua ghu, neke toufu kaputio ia hihilina ka poko ta laalaa, mala deona ira noni Isiraeli gedi boka finini ghu ia vai dakona ta ogoro ghu ia pelarana varanga ka God ka ia hihilina manei.

¹⁴ Ghe God neke va nagoromori ira nganganadi ira noni Ziu dito ke deo ghu ghe boka va fafahakidina dufu ghu ghatunaina ia varivehai sepa ka ia fafata izumidi, vununa ira nganganadi dike nagoromo ngama dike au ghu. Taghe ia ta toufu kaputuri ka kaike poko e ghua ghu, ghe poko iahi mu e boka hio kaini ma ka ia va hohoghonai Kraes.

¹⁵ Geta ghua ghu ghatunaina ghe, leleghu fafata izumi maneri ia vetula ka Mosese, poko ianimu e va nagoromori ngama e au ghu ira nganganadi.

¹⁶ Nga leleghu fafata fihiki lao hei noni ka ia Lod mu, ia Lod e hio kaini ia poko totoufu.

¹⁷ Lod ianimu ghu mu ia Tarunga ta Maduana. Nia hae ta auna ia Tarunga ta Maduana mu, manei e va kalasa ghita.

¹⁸ Ghita haroharo ta va hohoghona mu, to hio kaini totoufu ianimu ka ira hihilida ghita, da va podoli ghu ia pelarana varanga ka ia Lod. Nia ka ia riva ia Tarungana ia Lod ka gilioda ghita, dato meha taghe manei dato ghua laoni ghu ghita va podolo va veha laoinani ia varanga ta pelara ka manei.