1 Timoti 1 - Ia Foforuna Naiungene

Polo Ne Ungene Vehai Timoti

¹ Leta iahi mu sipana ka ara Polo, ia nona mane nonomoho Kraes Zisas, neke faeteauo ka ia ungene va gigima God ia noda Va Doli nia Kraes Zisas ia noda rangerange, e ghua,

² Vananigho ghu agho Timoti ia torai tuugu mane ka ia va hohoghona. Na tarai fangai ghu ara God ia noda Mama nia Kraes Zisas ia noda Lod e ghua, edi vananigho ghu ia varisute, dudumana nia bule, e ghua.

Banabana Ghidi Ira Vari Va Kakahei Ta Sesebo

³ Ara na kabai ghinigho ta auna ma agho aiamuhu Efesasi, taghe nake va kahe ghinighono la ka ia fafata ghahe vai lao ara aianihi Masedonia, mala kahe va gigimari ta mala va nodorira ghu ira noni ta vari va kakahei sesebo.

⁴ Oka va malumuri ghu ira noni, ta va poponoe ravatana ka ira turi sepa ta deo fafahakadi nia turi ghidira ira pagusu ta toraina sodu, e ghua. Leghutau irahi mu e va memeha magara ma; e deo ge toka ghidi ghu ira noni ta auna ka ia doli ta mala va hohoghonai maneri God.

⁵ Torai fafahakanana nakai ungene va gigima iahi ka ara mu, mala ira leghu noni kiloau nga aiamuhu, edi fouduri ghu ia namaha ta sipa ka ia hihingo ta fegala, ngangana ta kalasa nia ka ia toraina va hohoghona ka God, e ghua.

⁶ Keha nonira dito taghuru kairi irahi, dito fihiki lao ghu ka ira turi ta deo lighorodi.

⁷ Maneri edi kabai mane vari va kakahei taghodi ka ira vetula Mosese, ghe gedi deo nga tuna avohina heve di turi ghidira, geta nganai ghu maneri di avohori ta ghuana.

⁸ Ta avohina ghita mu, vetula iahi e veha, dato va rivai la ghita ka ia totonuna.

⁹ Ghita da avohi haro molamo mu, taka maladira ghu ira noni ta lotoro mu vetula iahi. Vetula iahi mu e maladi ira noni ta huhughu nia ira ta va laolapu, e maladi ira noni e deo ge au ghu God ira ta ghua ka ira dolidi nia ira ta auri muko, e maladi ira taka lotoro ghu nia ira taka heluhelu ghini ghu God, e maladi ira ta atunguri nodi mamari, ba nodi ukeri, e maladi ira ta vari atungu,

¹⁰ e maladi ira ta kikirase nia e maladi ira ta babaere vari mamanei nia vari ghaghasei, e maladi ira ta siko noni ta tatabara ghidi ghu, e maladi ira ta sesebo nia ira ta va bebereana sesebo ka giliona ia koti, nia e maladi heiri ira ta riva ghidi ira leghutau taka leghuri ghu ira vari va kakahei ta lotoro

¹¹ ia ta meha ka ia Nonomoho Ta Veha, neke vanaguo ia noda God ia ta beana nia varanga sughavona, e ghua.

Polo Ne Kudo Vehai God Ka Ia Nona Vari Sute Ia Lod Ta Vanani Kakato.

¹² Ara na kudo vehai Kraes Zisas ia noda Lod, neke vanaguo ia gigima malana nogu riva ini. Ara na kudo vehai manei na fata mo ara ta ghua ini ta faeteau ini ghu mala riva vananina,

¹³ geta fani ungene va mukoi ghu ara ia babaolona Kraes. Ara nake sukutu leleghuri ira nona noni mala va mukorira ka ira vahina kokolodi vari ngovala nga. Ghe God neke dudumana ghinagu, vununa ara nake au nga ka ia zea nia e deo nga gake va hohoghona ghu ka manei, e ghua.

¹⁴ Ia nona varisute ia noda Lod ta vanada kakato, neke va losa kakai vanagu meha taremehana ia va hohoghona nia ia namaha ka Kraes Zisas, e ghua.

¹⁵ Ngengene iahi mu e hohoghona, geala ghita haroharo da va hohoghonai ghu: Kraes Zisas neke meha ka malau iahi peka mala hio va dolirira ira ta kururi muko. Ara lamu nake toraina muko fuludu laona ghu ka maneri haroharo.

¹⁶ Ka toraina va fafahaka ianimu lamu ghe, neke dudumana ghinagu nga God, mala Kraes Zisas e boka toraina au afa ghinagu ghu ara ia ta toraina muko fuluduri ira leghu noni ta kururi muko nga. E ghua mamu ianimu ghe, gedi boka age fini avohi nga ira keha noni, gedi boka va hohoghona ghu molamo taghodi ka manei, mala hioina ia doli soduai.

¹⁷ !Ara a tarai fangai ta age vanani tuduna ia heluhelu nia varanga e ghua ia kaikena God ia ta au toghunai, ia Mane Ginitaukela ta au fuludai, ia taka finini ghu! Amen.

¹⁸ Tuugu maneo Timoti, ungene babatu ta vananigho irahi ara mu edi va dedeke ka heve dike kaheriro ira keha porofeti kaike fafata sepao ghinighona agho. Noto leghuri la agho ngengene irahi, agho o age magara taghe kaike mane magara ta veha, o ghua.

¹⁹ O posi va gima ghu ka ia nou va hohoghona ka Kraes, nia ta riva ghidi tudura ira ta lotoro ta avohori agho e ghua, ta mala auigho tuduna ghu ia ngangana ta kalasa. Keha nonira dike deo gedi va ghunaghuna ghu riva ghidira ira leghutau ta lotoro ta avohori maneri, dito ke age ngovalari ghu ira nodi va hohoghona, taghe ta ghua nia ia vaka ta nohe ta muko ghu.

²⁰ Haemeneasi ghe Alekesada lamu dike ghuara ianimu. Ara nato nai vanani lao ghu Satana mu palu mane irahi taghe mala va vavahagalarira mala edika age lausasaba ghini la ghu God. Ara e deo ghu ga va malumuri ghu palu mane irahi ta vari dudufu varighara taremehadira ira noni ka ia kiloau, mala va totoanana. Ka ghaghahena iahi, ara na va malumi Satana ta riva ghidira heve leghutau ta kabai riva ghidira manei ka maneri palu. Nake riva ghini nga ara iahi mu, mala edi fini avohi ghu maneri palu ghu ta riva va zeana nia va kahe ghidi tuna ta nodona lausasaba ghinina God e ghua, nake ghua.