1 Tesalonaeka 4 - Ia Foforuna Naiungene

Ghita Da Toraina Au Ka Ia Doli Ta Lao Hihingo Ghini God

¹ Va nonoghanana ghau tahimairo, ghai na fanga ghau ka ia babaolona ia Lod Zisas, ta auna ka ia doli ta veha vanani God, taghe nake va kakahe ghini ghauno la. Ghau mu noto riva ghini ghu iahi, na toraina fanga ghau ghu ta riva ghini tuduna.

² Vununa ghau no avohori ma no au ghu, heve ungene babatu nake vanamuro ghai ka ia mana ia Lod Zisas.

³ Nona lao nanafa God vanamu ghau mu, ta auna ghau ka ia doli ta kalasa, geala o peholo ghini ghu ia kikirase.

⁴ Geala ghau o au leghu ghidi ira tinimu taghomu, o au ghu ka ia doli ta kalasa nia ta heheluana e ghua,

⁵ nga oka au ghu ka ia doli ta nonoro, taghe ta ghua nira ira noni ta deo gedi avohi ghu God.

⁶ Oka namaha seboi ghu ia tahiu noni kiloau ka kokolona puhi iahi, ta zaveina ghu ia keranau, vununa ia Lod e va vavahagalari ira noni, ka kokolodi muko ta ghuara irahi, taghe nake toraina kahe va gigimaio la.

⁷ God neke faete kave ghita ta auna ka ia doli ta kalasa, nga eka ghua ghu ka ia doli ta kikirase.

⁸ Hei ia ta pake ghena leghurira ungene babatu irahi mu, e deo ge huhughuri ghu ira puhi mala leghuri ira noni, nga ne sokei God nia ia Tarunga Ta Maduana ia ta vanamu manei, e ghua.

⁹ Eka mala ke kakangava ghini age ghu ara ka ghau mu, ghinina ia vari namahai ka ia kiloau ia ta mala va podoli vari hoataidi ira nona noni God. Vununa taghonai God to va kakahe ghini ghau ta vari namahaina.

¹⁰ Hohoghona fuludu, ia namaha ka ghau mu to puina gigima mamu ka ira noni kiloau haroharo aiamuhu, ka ia kamotona Masedonia. Geta ghua mo ghe, ghai na toraina fanga ghau, ghau tahimairo, ta namaha ghidi laonani.

¹¹ Geala ta tongovonana ka ia doli ghau mu, iahi. O au unuhu, oka va saguposo la ghu ka ira nodi riva ira keha noni, nga o sopai riva ma ka kamemu nira mala toka ghini ghauna taghomughi, taghe nake va kahe ghini ghauo lama sepao.

¹² Leleghonana mu, ira taka noni kiloau ghu, edi heluhelu ghini ia doli ka ghau, e deo ghu boka age va ghighiu laona ghau ka ira keha noni, ghidira ira mahai ketuhu ta malanga ghidi ghau.

Zisas E Toraina Ke La Leghu Meha Mamu.

¹³ Ghau tahimairo, ghatunaina ghai na kabai ghini ta avohina ghau, heve ta age dufuna ghatu ka ira noni kiloau dike lemero, mala oka muko hihingomu la ghu ghau, taghe ira noni ta deori rangerange, ta ghuana.

¹⁴ Vununa ghai na va hohoghonai Zisas neke leme nia ke tetu leghu tuna ka ia doli neke ghua, na va hohoghonai haro ghu molamo ka ia mehana Zisas ghatu, God e la hio mehari taremehana Zisas, ira noni kiloau haroharo dike lemero.

¹⁵ Heve ta va kakahe ghini ghau ini ghai ghatunaina mu, e leghuri ira ngengene ka taghonai ia Lod: Ghita ira ta doli nga ka ia leghu mehana ia Lod mu, e toraina deo gada age kusu vona ghu ka ira noni ta va hohoghona dike kusu lemero, mala dufuina ia Lod.

¹⁶ Vununa taghonai ia Lod e la hinae meha ka malauo God fate taremehana kaike kudona ungene va gigima, taremehana ia kudo ka ia engizeli ta kenu, nia taremehana ia nakelena kufili ka God, e ghua. Ta kusu tetu leghura ghatu ka ira bekudi mu, ira noni kiloau haroharo dike lemero, ta va hohoghona ka Kraes.

¹⁷ Ianimu tuna ghe, gada vari dudufu taremehadi nga maneri ka ira toba, dufuina ia Lod ghita ira noni ta doli nga ta au ghu ka malau iahi peka, age au toghunai taremehanana manei.

¹⁸ O vari va gigimai ghu ka ngengene irahi.