1 Koriniti 16 - Ia Foforuna Naiungene

Kakai Maladi Ira Ta Va Hohoghona Ta Malanga

¹ Ghatunaina mu ghidi ira kakai maladi ira noni ka God ani Zerusalemu: O riva ghini heve nake va kahe ghidiro ara ira suga taraidi Galesia ta mala riva ghinina maneri.

² Ka ia va kenuna ravata leleghu kolabana, ghau o sopai nai nenemari keha rongo ka heve rongo ta hiori ghau, mala ka ia mehagu ara, kakai iahi to kusu riva ghini va hokoto ghau.

³ Ka ia meha sabaragu, ara a vanadi ira leta ira mane ta faeteri ghau mala va fafahakina lao ani ka maneri, nia mala va hio taremehadi laona aianihi Zerusalemu nomu kakai nia, e ghua.

⁴ Nia neto kuru fafahakana ta veha la ta mala laona ara aianimu, maneri edi boka ghahe taremehagu lao mo ara.

Ira Vatovatona Ia Ghaghahe

⁵ Leghuna ghahe fuludu ara giliona Masedonia, ara a meha sigho ghini ghau mo ghatu, vununa ara a ghahe fuludu aianimu ghatu.

⁶ Nia haeba ara a age au soduai birusuna taremehamuna ghau; ba geta va fuludi ghu ara ia kamotona rabongi mala boka toka ghinaguna ghau ka ia ghaghahe ara, hae ta ghuana ma ta mala laona ara.

⁷ Ara e deo ga kabai age fini ghau ghu ghatunaina mala suna age sigho ghini ghau fuluduna ma. Ara na kabai age au tamu soduai birusuna laona neto va malumuau la ia Lod.

⁸ Ghe ara age au lao birusunana ghatu aiahi Efesasi dufu ghu ka ia ravata va manemanena Pedekosi,

⁹ vununa kaike makatana leghaha maladi ira tehi riva ta kuru lighorodi, neto ke tobehe vanagu mala riva ghidira ara, geta tehi ghu ira noni ta huhau ara.

¹⁰ Neto meha la Timoti, ghau o toraina hio sutei ghena taremehana heluhelu, vununa manei ne riva ghini ia riva ka ia Lod, taghe ta ghua ini la ara.

¹¹ Geala e deo ghu hei ta fini va hinaeina manei, nga ghau o toraina toka ghini va ghaheina ka ia bule e mala ke leghu meha ghu manei ka ara. Ara na au afa ghini manei take la leghu meha taremehadira ira noni taremehada ta va hohoghona.

¹² Ghatunaina mu ghinina Apolosi ia taremehada ta va hohoghona: ara nake toraina va ohiohini ta mala agena ka ghau manei taremehadira ira noni taremehada ta va hohoghona. Manei e deo geke ohoꞌoho ghu ta mehana ghatunaina, ghe manei e age mo ghatu, ka ia kurui manei ia fafata ta veha.

¹³ O toraina mato va veha. Tetu va gima ka ia va hohoghona; Hioi hetamuna; va gigima.

¹⁴ O riva ghidi vahina leghutau nga ka namaha.

¹⁵ Ghau no avohi mo dike kusu meha noni kiloaura ka ia babarana Akaea mu Setefanasi nia ira noni ka ia suga manei, e ghua. Maneri dito ke nakairi ghu taghodighi ta mala riva vanadira ira noni ka God. Ghau taremehagu noni ta va hohoghona mu, ara a va ohiohi ghau,

¹⁶ ta mala leghurira ira kokolodi noni babatu taghe maneri nia ira keha haroharo ta holara ka ia riva ngazuluai taremehadi maneri, e ghua.

¹⁷ Ara na puina va manemane ghidi Setefanasi ghe Forotunatusi, nia Akaikusi e ghua tato dufura aiahi, vununa maneri dito ke vanaguna ia toka noke deo no go boka vanagu ghu ghau, vununa ghau no deo go au ghu aiahi.

¹⁸ Maneri di vanagu gigima, taghe dike ghua ghini ghauro la ghau. Ghau o toraina va vonavonari ghu kokolodi noni irahi.

¹⁹ Ira noni kiloau ka ia babarana Esia di va ghahe age nodi ungene veha ka ghau. Akuila ghe Pirisila nia ira noni kiloau ta varighara ka suga ani maneri mu, di toraina ungene veha ghau fuludu ka ia babaolona ia Lod.

²⁰ Ira leghu taremehada noni ta va hohoghona nga aiahi di va ghahe age nodi ungene veha ka ghau. Ghau o vari ungene veha ka angoho beana.

²¹ Ara, Polo, na kangavi ungene veha iahi ka toraina kamegu ini taghogu.

²² Hei ia ta deo ge namaha ghini ghu ia Lod mu, noni ianimu e au ka pekana tibiri. !Meha agho Lod!

²³ Ara na tarai e age vanamu ghu ia Lod Zisas Kraes ia varisute ta vanada kakato.

²⁴ Nogu namaha ka ghau haroharo ka Kraes Zisas. Amen.