1 Koriniti 13 - Ia Foforuna Naiungene

Namaha

¹ Geta boka ngengene ghu ara ka ira leghu ngengene nga ira noni nia ka ira ngengene ira engizeli ghe, nato deo la ga namaha ghidi ghu ara ira noni, ara mu taghe kaike belo ba kaike kodakana aeana ta keta va nakenakele kakatoi maneri, a ghua ma.

² Ga kuruau la ara ia kaikadolona mala turi ghidi kave ira nonomoho ta hiori ka God, nia ga boka va fafahakari la ira leghu popoikadi vatovato nga ka God nia va fafahakari vahina leghutau nga, nia ga kuruau la ara kaike va hohoghona ta boka va rizuri ira vuhuku, e ghua- ghe deo au tuna namaha nato ghua la, ara mu e deo lighorogu ma.

³ Nato vanadi la ara ira ta kuma ira leghu ta taghori nga ara nia nato va malumi haro la ghe tiniguini ka ira ta kana ghinagu ta mala saligaina, ghe nato deo au la namaha, e deo ta hioina ara ka ianimu.

⁴ Namaha mu e unuhu. Namaha mu eka kakabai ghu, eka mala turi ghidi ghu heve ira ta bokari, ba eka hadu varanga ghu.

⁵ Namaha mu eka va haghavari ghu ira keha noni, eka luluto ghu, ba eka tuma hali ghu, nia namaha mu eka ngana leghuri fuludai ghu ira muko ka ira keha noni.

⁶ Namaha mu eka va manemane ghini ghu ia muko, nga e va ghazaghaza ghini ia hohoghona.

⁷ Namaha mu e toraina deo ge boka bualefo ghu, va hohoghona tudu ma, rangerange tudu ma, nia e au va nadu tudu ma, geta heve ta dufuna.

⁸ Namaha mu e toghunai. Nga hae ta auna kaike kaikadolona mala turi ghidi kave ira nonomoho ta hiori ka God mu, e age nogha; hae ta auna kaike kaikadolona mala ngengene ka ira keha ngengene haza mu, e age nogha haro ghatu, nia hae ta auna ia kaikadolona avoavoho ta meha ka God mu e age nogha.

⁹ Vununa ia avoavoho ka ghita mu e birusuna ma, nia ia kaikadolona mala turi ghidi kave ira nonomoho ta hiori ka God mu, birusuna ma ne va podolina,

¹⁰ nga ka ia mehana heve ia ta hokoto mu, kaikadolo ta deo irahi gedi hokoto ghu, edi age ogoro.

¹¹ Ka ia rekahagu nga ara mu, ara nake ngengene taghe kaike rekaha, nake ngangana taghe kaike rekaha, nia nake va fafahaka taghe kaike rekaha. Ka ia meha kaike manefaa ara mu, ara nake nai kairi puhi rekaha iranimu.

¹² Ghatunaina mu ghita dato fifini, ghe taghe kaike totoghale ta dako ka ia tiro e ghua ma. Ghe keha nareo ghita da age fini va vehari vahina leghutau nga taghe ta ghua nia ka ira toraina hibada. Ghatunaina mu ara na avoho birusuna ma ghinina God; ianimu tuna ghe gake age avoho va hokoti nga ara manei, taghe God ta avoho va hokotoau ini la ara ghatunaina.

¹³ Lito leghutau mu ta age au toghunaira- ia va hohoghona, rangerange, nia namaha. Ta torai kenu laona ka irahi mu, namaha.