1 Koriniti 10 - Ia Foforuna Naiungene

Balau Ghini Ia Va Totoanai Nguzunguzu

¹ Ghau taremehagu noni kiloau, ara na kabai ghini ghau taka ngana kairira ghu ira faada dike leghuio Mosese. Maneri haroharo dike au ka pekana ia toba neke batu ghidiro nia maneri haroharo dike ghaghahe kadolo ka keha pelonao mo ka ia fafata fotai God ia Tahi Busaka.

² Ka ia toba nia ka ia tahi mu, maneri taghe dike seselebeana mala leghuina Mosese dike ghua,

³ nia maneri haroharo dike mahaini ma kaike bereti neke vanadio God,

⁴ nia maneri haroharo dike ketuhu ma ka kaike ketuhu neke va ologho kave vanadio God ka ia ghahipa neke ghahe leghurio, e ghua. Ghahipa ianimu ghu mu taghonai Kraes.

⁵ Neke ghua mo ianimu ghe, God deo geke veha vanani ghu ka tehidira ka maneri, dike va libo lao mehari ghu ira tinidi ta leme ka ia malau koroghana ta karango.

⁶ Leghutau neke dufuri irahi maneri mu mala hio avoavoho ka ghita, mala taghe maneri daka ghua la ghu kuhanai ghidira ira muko dike riva ghidiro maneri.

⁷ Taghe ira keha ka maneri dike va totoanai nguzunguzuro oka ghua ghu ghau; taghe ia ta kahei la ka ira Kakangava Ta Maduana, “Ira noni dike nohe hinae dike mahai ketuhu ghu, nia tetu vona tuna gedi riva ghidi ghu ira ragi ta muko, dike ghua,” ia ta ghua.

⁸ Ghita geala daka rivai ghidi ghu ira zave lao meha, taghe dike ghuaro la kehara ka maneri dike lemero ghu varadaki lito togha noni ka giliona kaike ravata mo.

⁹ Ghita geala daka va sisiva rivai sasake ghu mala kabai avohina e fate ghita mo ia Lod ba deo, ta ghuana, taghe dike ghuaro la kehara ka maneri, dike lemero ghu ka ira adogho.

¹⁰ Nia ghita daka ngunungunu ghu, taghe dike ghuaro la kehara ka maneri, neke atunguriro ghu ia Engizelina Leme.

¹¹ Leghutau irahi neke dufuri maneri taghe mala balauna ka ghita; dike kangava hinaeri ghu mala va kakahe ghini ghitana, vununa ghita mu dato au namo age ka ira va nonoghadi fafata.

¹² !Noto nganai la ghu ghau no tetu va gima ta ghuana, o banabana ghini ghau taghomu, oka age riufu la ghu!

¹³ E deo auau mu neto ke dufu ghauna ghau, nga ira auau ta fani dufuri ira noni lama. Nia God ge sutei tudu ghu ia nona naiungene e ghua; manei e deo ge boka va malumi ghu ia auau ta deo go boka paufi ghu ghau. Nga noto dufu ghau la auau, manei e age vanamu haro molamo ia hangana mala kave kainina ghau, ta boka mala tetu kaputi ma ta laona ghu.

¹⁴ E ghua ghu ghau nogu baere, ghau o pelo kaini ia va totoanai nguzunguzu.

¹⁵ Na ngengene age nga ara ka ghau mu, vununa ara na avoho ghau ta noni boka va fafahakana ghau. O riva vanamu kave ghu taghomu, neto hohoghona la heve ta age mala kaheina ara.

¹⁶ Ia panikenina kudoveha ta mala kudo vehai ghita God mu, hio tufa ka ghita ka ia busakana Kraes. Nia ia bereti ta kipei ghita mu, hio tufa ka ghita ka ia tinina Kraes.

¹⁷ Vununa ghita da mahai varighara ghini kaike bereti mo, ghita mu kaike tini mo, geta tehi ghu ghita.

¹⁸ Oke ngana laorina ira nonidi Isiraeli: Maneri edi meha kaike ka ia mahairi ira heve dike veala ghidiro ka ia sopebeana.

¹⁹ ?Heve, ia veala ta mala kudoveha lao ka ia nguzunguzu mu e kuru lighorona a ghua ta kaheina ara, ba ia nguzunguzu mu e toraina God hohoghona, a ghua?

²⁰ !Toraina deo hohoghona. Na kaheina ara mu, veala irahi mu di veala ghidi lao ka ira nazahi, nga eka ghua ghu ka God. Ara e deo ghu kabai ghini ghauna ta holara taremehadira ira nazahi.

²¹ E deo ge lotoro ghu ketuhuna ghau ka ia nona panikeni ia Lod, ghe take ketuhu harona nga ka ia panikeni ira nazahi. Nia e deo ge lotoro ghu ta mahaina ghau ka ia nona tevo ia Lod, ghe take mahai harona nga ka ia tevo ira nazahi.

²² ?Heve, ghita mu da va sisiva halini ia Lod, e kakabai ghu manei? ?Ghita mu da gigima fuludi manei?

²³ “Vahina leghutau nga mu e malumu mo” no ghua ghau- ghe eka ghua ghu vahina leghutau nga mu ta vanamu vehana. “Vahina leghutau nga mu e malumu mo”- no ghua ghau, ghe eka ghua ghu vahina leghutau nga mu ta age toka ghidira ira keha.

²⁴ E deo hei mu geala ta hadu vananina ia veha taghonai, nga e hadui ia ta mala veha ghini ira keha noni mo.

²⁵ O mahai ghemu ma ka heve leghutau ta ghuana, ta tatabara ghidi ka ia maketedi ira vilahi mala mahai, nga oka notohi ghu neke mala veala lao ka ira nguzunguzu, ba deo ta ghuana,

²⁶ vununa ne kahe ghua iahi ka ira Kakangava ta Maduana, “Malau iahi peka nia ira vahina leghutau nga ka ia giliona mu, nona ia Lod,” ne ghua.

²⁷ Dito fanga ghau la keha noni ta deo gedi va hohoghona ghu mala la mahai taremehadira, noto kabai lao ghu, o mahairi ma heve ghano ta ghuana ta nai vanamu mehana maneri, nga oka notohi ghu hae mo dike la sipa mehara ghano ari.

²⁸ Nga neto ke va kahe ghini ghau la kehara, neke mala veala lao ka ira nguzunguzu ghano ani ta ghuana, ghau oka mahaini ghu, vununa e deo ge veha ghu ta va mukoina ia nganganana hei neke va kahe ghinighono.

²⁹ Ka ia nganganamu ghau mu ne veha mo, nga oka va mukoi ghu ia nganganana keha noni ani. ?Heve mu ia nganganana ia keha noni ghe, ne va nodoi nga heve ia ta kalasa vanagu ara?

³⁰ Nato kudo vehai la ara God ghinina ia ghegu ghano, heve di ghua maneri ghe na riva va muko ara di ghua ghinagu nga makutuauna.

³¹ Geta mahai ghu, ba ketuhu ghu ghau, ba heve leghutau ta ghuana ta riva ghinina ghau ghe, o riva ghidi haroharo malana ia varanga ka God.

³² Oka riva ghidi ghu ira leghutau ia ta age va mukori ira nganganadi ira noni Ziu, ba ira noni taka Ziu ghu, ba ia kiloau ka God.

³³ Ara haro na va sisiva ka ira leghu ghaghahedi nga ta mala veha vanadira leghu noni nga. Vununa ara e deo ga hadui ghu ia veha malagu taghogughi, nga ia veha ta maladi ira tehi noni mo, mala ge boka la mo hio va dolirira.